Izikẹlụ 37 - Ika

Isi Nke Mmẹsa Kwasị Ọgụn Ọdanmgbugbu Ọkpụkpụ Ọkpọ-nkụn Jun

¹ Osolobuẹ mẹtụ m ẹka, gi Mmọn Osolobuẹ wepụha m, bu m che etintinnaị ọdanmgbugbu ohu. Ọkpụkpụ jun ọdanmgbugbu hụ.

² Osolobuẹ nọ mẹ m ghahunmẹ imẹ wẹ — ọkpụkpụ rị akpakalị ọdanmgbugbu ahụn e bukẹ ọda! Wẹ kpọ nkụn ọda-ọda!

³ Osolobuẹ nọ sị m, “Nwa-ịhịan, nị ọkpụkpụ ndịnị sazị ẹka rị ndụn?” M nọ sị a, “Osolobuẹ Nwọn Ihiẹn Ile, yụ sụọ marịn.”

⁴ Ọ sị m, “Buni ọkpụkpụ ndịnị amụma, sị wẹ, ‘Ọkpụkpụ ọkpọ-nkụn ndịnị, gọn ni ntịn ihiẹn Osolobuẹ ku!

⁵ Osolobuẹ Nwọn Ihiẹn Ile sị ọkpụkpụ ndịnị: M sikọ nwan d'e mẹ uzun ban imẹ ụnụ, ụnụ a rị ndụn.

⁶ M k'e bu akwanran ẹhụ che ụnụ, mẹ uru pụha, mẹ akpụkpọ-ẹhụ kpumẹ ụnụ, e bu m uzun che imẹ ụnụ, ụnụ a rị ndụn. Ogẹn ahụn, ụnụ a marịn nị mmẹ wụ Osolobuẹ.’ ”

⁷ M nọ bu amụma k'o dọn gwa m. Hụn m gihụ bu amụma hụ, a nụma m kọkrọ-kọkrọ — hụn ọkpụkpụ gi rị a nọgbama, onyẹ lẹ nke ẹ, onyẹ lẹ nke ẹ.

⁸ E lee m ẹnya, akwanran-ẹhụ hụsọnmẹ wẹ, uru nkẹ nọ pụhasọnmẹ, akpụkpọ-ẹhụ e kpumẹ wẹ; kanị uzun arị imẹ wẹ.

⁹ Ya kẹ Osolobuẹ nọ sị m, “Bu amụma gwa ufere oku; nwa-ịhịan, bu amụma, sị ufere, ‘Osolobuẹ Nwọn Ihiẹn Ile sị: Ufere, gha ẹbamịn ẹnọ fehẹ n'i ban imẹ ozun ndịnị nị wẹ hụn ụzọ rị ndụn!’ ”

¹⁰ Ya m nọ bu amụma k'o dọn gwa m, uzun nọ ban imẹ wẹ, wẹ nọ rị ndụn, wuzo ọtọ: igwerigwe ndị-agha!

¹¹ Osolobuẹ nọ nwan sị, “Nwa-ịhịan, ọkpụkpụ ndịnị wụ ndị Izrẹlụ ile. Wẹ rị nwan a sị, ‘Ọkpụkpụ ẹnyi a kpọgụọ nkụn, ẹnyi enwọnzi olilẹnya; nke ẹnyi a gụgụọ!’

¹² Bu nwan amụma sị wẹ, ‘Osolobuẹ Nwọn Ihiẹn Ile sị: Ndị nke m, lee ẹ, m jẹnkọ d'e kpupụ ili ụnụ, wepụha ụnụ imẹ wẹ, e welụa m ụnụ alị Izrẹlụ.

¹³ Ụnụ ndị nke m k'a marịn nị m wụ Osolobuẹ ogẹn m'e gi kpupụsọnmẹ ili ụnụ, wepụha ụnụ.

¹⁴ M k'e bu Mmọn m che imẹ ụnụ, ụnụ a rị ndụn, e bu m ụnụ che alị ụnụ biri. Ogẹn hụ, ụnụ a marịn nị mmẹ wụ Osolobuẹ e kuọl'a, mẹ ẹ. Ya kẹ Osolobuẹ ku.’ ”

Alị Ohu, Eze Ohu

¹⁵ Osolobuẹ nọ sị m,

¹⁶ “Nwa-ịhịan, weri ibe osisi ohu, y'e deye ẹ, ‘Ọnwan wụ nke Juda, ya lẹ ndị Izrẹlụ ya lẹ wẹ rị azụụn ohu.’ Y'e werizi ibe osisi ọzọ, deye ẹ, ‘Ọnwan wụ nke Josẹfụ nẹdi ndị Ifrem, ya lẹ ebọn rịsọnmẹ Izrẹlụ ya lẹ wẹ rị azụụn ohu.’

¹⁷ Wegbama ibe osisi ẹbụbụọ hụ n'i hụn ụzọ kwọndọn wẹ ẹka ohu.

¹⁸ “Ndị alị ụnụ sị ị, ‘Y'a gwakọ ẹnyi ihiẹn i gi ihiẹnni e ku?’

¹⁹ Sị wẹ, ‘Osolobuẹ nwọn ihiẹn ile sị: M jẹnkọ d'e weri ibe osisi Josẹfụ hụn rị ẹka Ifrem lẹ ebọn Izrẹlụ ya lẹ wẹ rị azụụn ohu, w'ẹ cheni ibe osisi Juda, e mẹ m wẹ họnrin ibe osisi ohu, a wụrụ wẹ ohu ẹka m.’

²⁰ Kwọndọn ibe osisi ndị ahụn i deye ihiẹn n'ọ nị wẹ e legha;

²¹ y'a sị wẹ, ‘Osolobuẹ nwọn ihiẹn ile sị: M sikọ d'e weri ndị Izrẹlụ imẹ alị ndị hụ wẹ rị, e wegbama m wẹ, ebe lẹ ebe wẹ rịlẹ, welụa wẹ alị wẹ.

²² M k'e mẹ wẹ wụrụ alị ohu imẹ alị Izrẹlụ, elu-ugu rịsọnmẹ alị Izrẹlụ; eze ohu k'a kịma wẹ ile, onwọnzini ogẹn w'e gi wụrụ alị ẹbụọ mọbụ kebezi họnrin alị-eze ẹbụọ.

²³ Egikọzị wẹ mmọn lẹ ụrụ lẹ mmẹfie mẹrụ enwẹn wẹ, makẹni m k'a zụọpụhachanrịn wẹ ebe ile wẹ nọ dankin azụụn, ebe ile wẹ nọ mẹ njọ, e fepụ m wẹ ẹhụ. A wụrụ wẹ ndị nke m, a wụrụ m Chuku wẹ.

²⁴ “ ‘Odibo m wụ Defidi k'a wụrụ eze wẹ, wẹ ile e nwọnrin onyẹ-ndu ohu, e gi wẹ usọnrọn m tumẹni wẹ e bi, e dọnmẹ Iwu m.

²⁵ Wẹ k'e biri alị hụ m ye odibo m wụ Jekọpụ, alị hụ ndị nẹdi ụnụ kanị bi. Wẹ lẹ ụmụ wẹ lẹ ụmụ-ụmụ wẹ k'e biri ebahụn jẹnrin ejẹn, odibo m wụ Defidi k'a wụferi eze wẹ.

²⁶ M k'e kwe wẹ nkwa hụn m k'e gi mẹ n'ọ rịnị wẹ mma; o k'a wụ nkwa itẹbitẹ. M k'e mẹ wẹ gbọrị, mẹ wẹ ba ụba; m k'e bu Ụlọ-nsọ m che imẹ igunrun wẹ jẹnrin ejẹn.

²⁷ M sikọ d'e du wẹ biri, a wụrụ m Chuku wẹ, a wụrụ wẹ ndị nke m.

²⁸ Ogẹn ụlọ-nsọ m e gi rịferi imẹ igunrun ndị Izrẹlụ, alị ndị ọzọ k'e gi ẹ marịn nị mmẹ wụ Osolobuẹ rị e mẹ Izrẹlụ a rị nsọ.’ ”