Izikẹlụ 36 - Ika

Isi Nke Mmisin Kwasị Ọgụn Makẹ Ẹfan Osolobuẹ, O K'e Dọnzi Alị Izrẹlụ

¹ “Nwa-ịhịan, buni ugu ndị rị Izrẹlụ amụma. Sị wẹ: Ugu ndị rị alị Izrẹlụ, gọn ni ntịn ihiẹn Osolobuẹ ku!

² “Osolobuẹ Nwọn Ihiẹn Ile sị: Makẹni ndị-iṅẹnrẹn sị, ‘Ẹhẹn! Ugu ẹdẹi ndị hụ e họnringụọ nwan nke ẹnyi!’

³ Bu nwan amụma, sị: Osolobuẹ Nwọn Ihiẹn Ile sị, Makẹni e tikpọgụọ wẹ ụnụ la iwi, gha azụụn ile maye ụnụ, nke wụnị ụnụ e họnringụọ nke alị ndị ọzọ, wụrụ ihiẹn wẹ gi a ta ẹtụ lẹ ihiẹn wẹ gi a ka ụka,

⁴ ugu ndị rị Izrẹlụ, gọn ni nwan ntịn ihiẹn Osolobuẹ Nwọn Ihiẹn Ile ku: Ọ rị a gwa ugu lẹ òke lẹ mgbugbu lẹ ọdanmgbugbu Izrẹlụ oku, ọ rị a gwazị obodo ndị gba nwan okpokoro imẹ ẹ lẹ ndị hụn ịhịan gba tọ. Alị ndị ọzọ fihunmẹ Izrẹlụ rị nwan e mẹ k'ọ sụọ wẹ, a mụ wẹ ẹmụ:

⁵ Osolobuẹ Nwọn Ihiẹn Ile sị: E gigụọ m okẹn olulu m lẹ ẹnya rị a fụnị m ku ihiẹn m k'e mẹ alị ndị ọzọ lẹ Ẹdọm ile, ndị rị e mẹ alị m lekẹsị nke wẹ rọ, ọ hụ a sụọ wẹ, lelịa Izrẹlụ, e weri ọfịa ndị wẹ nọ a zụn anụ rịn'a.”

⁶ Osolobuẹ sị, “Bu nwan amụma banyeni alị Izrẹlụ, sị ugu lẹ òke lẹ mgbugbu lẹ ọdanmgbugbu: Osolobuẹ Nwọn Ihiẹn Ile sị: E gigụọ m ọnụma lẹ ẹnya rị a fụnị m ku oku yeni mkpari ụnụ rị a narịn ẹka alị ndị ọzọ.

⁷ Osolobuẹ Nwọn Ihiẹn Ile sị nwan: m rị a kịshi ẹka elu e kun enwẹn m nị alị ndịnị fihunmẹ ụnụ sikọ d'a narịnrịrị mkpari nke wẹ!!

⁸ “Kanị, ugu Izrẹlụ, osisi ndị rị elu i k'a wasọnmẹ agalaba, a mịnị ndị nke m wụ Izrẹlụ mkpụrụ, makẹni w'e d'a lụahama.

⁹ Lee ẹ, m nọyeni ụnụ anọyeni, m k'e lee ụnụ ẹnya ihun: wẹ k'a dụkpọzị alị ụnụ, rụnzị a ugbo,

¹⁰ m k'e mẹ ịhịan ba ụba elu ụnụ imẹ Izrẹlụ ile; ịhịan k'e bizi obodo ndị rị Izrẹlụ; wẹ k'a tụnkin ndị hụ wẹ tikpọ la iwi.

¹¹ M k'e mẹ kẹ ịhịan kẹ anụmanụ ba ụba elu ụnụ, mụ ụmụ ọda-ọda, barahị. M k'e mẹ ịhịan biri elu ụnụ kẹ wẹ dọn bi ẹ mbụ, mẹ ihiẹn rịnị ụnụ mma karị k'ọ rị mbụ. Ogẹn ahụn, ụnụ a marịn nị mmẹ wụ Osolobuẹ.

¹² M k'e mẹ ịhịan, ndị nke m Izrẹlụ, jẹn ijẹn elu ụnụ wụ ugu Izrẹlụ. Wẹ k'e nwọnrin ụnụ, ụnụ a wụrụ nke wẹ; ụnụ egbukọzị ụmụ wẹ.

¹³ “Osolobuẹ Nwọn Ihiẹn Ile sị: Ebe o mẹ ni ndị alị ọzọ rị a sị ụnụ wụ ugu Izrẹlụ, ‘Ụnụ e gbu ịhịan, e gbunarịn ndị nke ụnụ ụmụ wẹ,’

¹⁴ ụnụ egbukọzị nwan ịhịan mọbụ gbunarịn ndị nke ụnụ ụmụ wẹ. Ya kẹ Osolobuẹ Nwọn Ihiẹn Ile ku.

¹⁵ Emẹkọzị m ụnụ a narịn mkpari ẹka alị ndị ọzọ, alị ndị ọzọ elegberikọzị ụnụ; ụnụ emẹkọzị ndị alị ụnụ dan. Ya kẹ Osolobuẹ nwọn ihiẹn Ile ku.”

¹⁶ Osolobuẹ nọzị gwa m oku, sị m:

¹⁷ “Nwa-ịhịan, ogẹn ndị Izrẹlụ te gi bi alị wẹ, wẹ gi obibi wẹ lẹ eje-ihiẹn ndị wẹ rị e mẹ mẹrụ a. Obibi wẹ nọ m kẹ ezi okpoho rị a sọ.

¹⁸ Ya kẹ m nọ gi ọnụma m mẹ wẹ ihiẹn yeni ọchụn wẹ gbu alị wẹ lẹ mmọn ndị wẹ gi mẹrụ a.

¹⁹ M nọ feyịya wẹ ye alị ndị ọzọ, wẹ nọ rị alị ichẹn-ichẹn ndị hụ. Ya wụ, obibi wẹ lẹ eje-ihiẹn ndị wẹ mẹ kẹ m gi kin wẹ ikpe.

²⁰ “Ebe-lẹ-ebe wẹ ru imẹ alị ndị ahụn, e wiwi wẹ Ẹfan m rị nsọ, makẹni w'e ku oku wẹ, a sị, ‘Ndịnị wụ ndị nke Osolobuẹ, kanị a ghakwọ wẹ alị a kpụnhan wẹ ebeni.’

²¹ Ya kẹ m nọ nwan romẹ banyeni Ẹfan-nsọ m, hụn ndị Izrẹlụ rị e wiwi imẹ alị ndị ọzọ wẹ rịsọnmẹ.

²² “Sị nwan Izrẹlụ nị Osolobuẹ Nwọn Ihiẹn Ile sị: ‘Ẹlẹkwọ ụnụ wụ ndị Izrẹlụ haịn m k'e gi mẹ ihiẹn m chọ nwan nị m mẹ, Ẹfan-nsọ m ụnụ rị e wiwi imẹ alị ndị ọzọ ụnụ rị haịn.

²³ M k'a ghọsị nị Ẹfan m rị nsọ, ezigbo ẹfan m hụn ụnụ wiwigụ nwan imẹ alị ndị ọzọ, Ẹfan m ụnụ wiwigụ ẹnya wẹ. Alị ndị ọzọ k'a marịn nị m wụ Osolobuẹ ogẹn m'e gi mẹ ihiẹn k'a ghọsị nị m rị nsọ imẹ igunrun ụnụ idẹnya wẹ.’ Ya kẹ Osolobuẹ Nwọn Ihiẹn Ile ku.

²⁴ “M sikọ nwan d'e weri ụnụ imẹ alị ndị ọzọ, e wegbama m ụnụ welụa alị ụnụ.

²⁵ E fekpu m ụnụ mirin nwunni, gi ẹ fepụ ụnụ ụrụ ile ụnụ rụ lẹ mmọn ile ụnụ fe.

²⁶ M k'e ye ụnụ obi ọhụn, bu mmọn ọhụn che imẹ ndụn ụnụ; e wepụ m obi-ọmụma imẹ ụnụ, ye ụnụ obi rị alụlụa.

²⁷ M k'e bu Mmọn m che imẹ ndụn ụnụ, e mẹ ụnụ e dọnmẹ Iwu m, e gi usọnrọn m e bi.

²⁸ Ụnụ e biri alị ahụn m ye ndị nẹdi ụnụ kanị, ụnụ a wụrụ ndị nke m, mmẹ nwẹn a wụrụ Chuku ụnụ.

²⁹ “M k'a zụọpụha ụnụ imẹ ụrụ ile ụnụ rụ. M k'a sị ọka ụnụ k'e ri ya jun, m'ẹ barahị; ewẹhẹkọnị m ụnụ ụnwụn.

³⁰ M k'e mẹ mkpụrụ-osisi lẹ ihiẹn-ugbo barahị, nke wụnị onwọnni ogẹn ụnwụn e gizi kpọrị ụnụ ihun alị ndị ọzọ.

³¹ Ogẹn ahụn, ụnụ a nyanhan eje-obibi ụnụ lẹ eje-ihiẹn ndị hụ ụnụ mẹ, ize enwẹn ụnụ a ban ụnụ yeni njọ ụnụ lẹ arụ ile ụnụ mẹ.

³² “Osolobuẹ Nwọn Ihiẹn Ile sị, m chọ nị ụnụ marịn nị ẹlẹkwọ ụnụ haịn m gi rị e mẹ ihiẹnni. Obibi ụnụ ya mẹgbu ụnụ ifẹnrẹn, fa ụnụ, ụnụ ndị Izrẹlụ.

³³ “Osolobuẹ Nwọn Ihiẹn Ile sị: ‘Ụhụọhịn ahụn m k'e fepụ ụnụ ẹhụ njọ ile, m k'e mẹzi ịhịan bikin obodo ichẹn-ichẹn rị alị ụnụ, mẹ wẹ tụndọnzi ndị tikpọnị;

³⁴ a rụnmazị wẹ ugbo alị ndị hụ wẹ latọ te wụ ihiẹn la iwi ẹnya ndị ile a ghafen'ẹ.

³⁵ Wẹ k'a sị, “Alịnị wẹ te lagụ iwi a nọgụọ nwan kẹ ugbo Idẹni! Obodo ndị nwẹn te lagụ iwi, gba okpokoro, dankpọchanrịn, kẹ wẹ tụnhunmẹgụ nwan mgbọn, biri!”

³⁶ Ogẹn ahụn kẹ alị ndị nọkunmẹ ụnụ hụn k'a họdụnị e gi marịn nị mmẹ wụ Osolobuẹ a tụndọnzigụọ ihiẹn tikpọnị, rụnzị alị te lagụ iwi ugbo. Mmẹ wụ Osolobuẹ e kuọl'a; m k'e mẹ ẹ.’

³⁷ “Osolobuẹ Nwọn Ihiẹn Ile sị: ‘M k'a nịzị ndị Izrẹlụ rịọ m mẹni wẹ ihiẹn; m k'e mẹ ndị nke wẹ barahị nọkẹ atụnrụn,

³⁸ nọkẹ atụnrụn ndị wẹ gi a chụn ẹjan, lekẹ atụnrụn ndị ahụn e jun Jerusalẹm ogẹn mmẹmmẹ-nsọ wẹ rị ichẹn-ichẹn. Ẹrịra kẹ ịhịan k'e jun imẹ obodo ndị hụ te lagụ iwi imẹ Izrẹlụ. Ogẹn ahụn, wẹ k'a marịn nị m wụ Osolobuẹ.’ ”