Izikẹlụ 35 - Ika

Isi Nke Mmisẹn Kwasị Ọgụn Ihiẹn Osolobuẹ K'e Mẹ Ugu Sẹẹ Wụ Ẹdọm

¹ Osolobuẹ nọzị sị m,

² “Nwa-ịhịan, bu ihun zinmẹ Ugu-Sẹẹ wụ Ẹdọm, bu amụma ihiẹn k'e mẹn'ẹ,

³ sị, ‘Osolobuẹ Nwọn Ihiẹn Ile sị: Mmẹ lẹ yụ rọ, Ugu Sẹẹ, ẹka m k'e bitụ ị, e mẹ m'i gba okpokoro, mẹ i la iwi.

⁴ M k'e tikpọ obodo rịsọnmẹ imẹ i la a tọ mkpọkọ-mkpọkọ, y'a wụrụ ebe ịhịan bilẹni. Ogẹn ahụn kẹ y'e gi marịn nị mmẹ wụ Osolobuẹ.

⁵ “ ‘Makẹni i bu iwe Izrẹlụ ẹfọ kete-kete, we wẹ ye ọpịa-agha gbu ogẹn eje-ihiẹn gi kunrun wẹ, ogẹn wẹ gi rị e ye wẹ afụnfụn hụ kachanrịnnị yeni njọ wẹ,

⁶ Osolobuẹ Nwọn Ihiẹn Ile sị: Ma isi m, m k'e we i ye ndị k'e gbun'i; ẹdeke k'a chụ ị ọsọ. Ebe o mẹ ni ize ẹdeke ezen'i, ẹdeke k'a chụ ị.

⁷ M k'e mẹ Ugu Sẹẹ gbachanrịn okpokoro, mẹ wẹ aghazịl'a: kẹ ndị e jẹnni kẹ ndị a lụanị.

⁸ M k'e mẹ ozun ndị wẹ gbu jun ugu ndị rị alị ị; ndị ọpịa-agha k'e gbu k'a danjun elu òke lẹ ọdanmgbugbu lẹ olu rị alị ị.

⁹ M k'e mẹ i gbaferi okpokoro, ebikọzị wẹ obodo ndị rị imẹ i. Ogẹn ahụn kẹ ụnụ e gi marịn nị mmẹ wụ Osolobuẹ.

¹⁰ “ ‘Makẹni y'a sịgụọ, “Izrẹlụ lẹ Juda lẹ alị wẹ ẹbụbụọ k'a wụ nke ẹnyi. Ẹnyi k'e weri wẹ.” Ya kẹ ụnụ ku, kanị mmẹ wụ Osolobuẹ hụ ebẹhụ.

¹¹ Osolobuẹ Nwọn Ihiẹn Ile sị: ma isi m, olulu lẹ ẹnya-ụfụ hụ i gi sọn wẹ makẹni iwe wẹ rị e we i kẹ m'e gi sọn i; m mẹgụ ị ihiẹn m k'e mẹ i, e gi w'ẹ marịn nị m rị imẹ igunrun wẹ.

¹² Ogẹn hụ kẹ y'e gi marịn nị mmẹ wụ Osolobuẹ a nụghọ eje-ihiẹn ndị hụ i ku banyeni alị Izrẹlụ lẹ ugu ndị rịn'a, ebe ị nọ sị, “E tikpọgụọ wẹ wẹ la iwi; e wegụọ wẹ wẹ ye ẹnyi ri!!”

¹³ Ị hụ a nyan isi e kuja oku m; y'e kuhọdụdẹni; a nụgụọ m wẹ ile.

¹⁴ Osolobuẹ nwọn ihiẹn ile sị: m k'e mẹ i gba okpokoro hụn elu ụwa ile e gi ghọghọ.

¹⁵ Ọghọghọ hụn ị ghọghọ nị e tikpọgụọ wẹ ukuu alị Izrẹlụ la iwi kẹ m'e gi sọn i: Ịyụ wụ Ugu Sẹẹ lẹ alị ụnụ ile wụ Ẹdọm k'a gba okpokoro, o k'a gbachanrịn okpokoro! Ogẹn ahụn kẹ w'e gi marịn nị mmẹ wụ Osolobuẹ.’ ”