Izikẹlụ 34 - Ika

Isi Nke Mmẹnọ Kwasị Ọgụn Osolobuẹ K'e Wepụ Eje Ndị ndu

¹ Osolobuẹ sị m:

² “Nwa-ịhịan, bu amụma, ku ihiẹn k'e mẹ ndị-ndu Izrẹlụ; bu amụma sị wẹ wụ ndị-ndu: Osolobuẹ Nwọn Ihiẹn Ile sị: ‘O k'a jọ ndị-ndu Izrẹlụ njọ, nị enwẹn wẹ sụọ kẹ w'e lepụ ẹnya! Ẹlẹ anụ kẹ ndị e du anụ k'a gha e lepụ ẹnya?

³ Ụnụ hụ a ra mirin ẹran wẹ, e gi ẹṅẹnrẹn wẹ a kparị ẹkwa, e gburi ndị tutuni; lepụ nị nwan anụ ẹnya, ụnụ a jụ.

⁴ Onwọndẹni ihiẹn ụnụ mẹ nị ndị kẹnrẹnlẹni kẹnrẹn; ndị emu rị a kụ ụnụ azụọnị, ụnụ ekẹnmẹni wẹ ụkụ lẹ ẹka wẹ kpagi; ụnụ e welụanị ndị kpahuni, ụnụ achọnị ndị tuhuni wekinhẹn; ụnụ hụ e gi ẹka-ikẹn a kịgbu wẹ.

⁵ “ ‘A gbayịya wẹ makẹni onyẹ k'e duni wẹ arịa; eje-anụ ile rị ọfịa hụ e bu wẹ e ri.

⁶ Atụnrụn m hụ a wahunmẹ ugu ile lẹ òke ile jẹn elu. Wẹ rị nwan ebe ile elu-ụwa, onwọnni onyẹ a jụ ukwere wẹ, onwọnni onyẹ a chọjẹnni wẹ.

⁷ “ ‘Ndị-ndu, gọn nị nwan ntịn ihiẹn Osolobuẹ ku;

⁸ Osolobuẹ Nwọn Ihiẹn Ile sị: Ma isi m, ebe o mẹ ni atụnrụn m wụ nwan anụ hụn anụ-ọfịa ile a chụ, e gburi, makẹni onyẹ k'e duni wẹ arịa, ebe o mẹ ni ndị e duni m atụnrụn achọjẹnni atụnrụn m, kama wẹ hụ e lepụ enwẹn wẹ ẹnya, la atụnrụn m tọ,

⁹ gọn ni nwan ntịn ihiẹn Osolobuẹ ku, ụnụ ndị-ndu:

¹⁰ mmẹ, Osolobuẹ Nwọn Ihiẹn Ile sị: mmẹ lẹ ndị ahụn rị e du atụnrụn rọ! M k'a jụ wẹ ukwere atụnrụn m. M k'a chụ wẹ ọrụn, elepụkọzị wẹ atụnrụn ndị hụ ẹnya, elepụbehi wẹ enwẹn wẹ ẹnya a sị nị wẹ rị e lepụ atụnrụn m ẹnya. A zụọpụha m atụnrụn m ọnụ wẹ, o mẹkọzị ihiẹn-oriri ẹka wẹ.

¹¹ “ ‘Makẹni, Osolobuẹ Nwọn Ihiẹn Ile sị: Mmẹ lẹ enwẹn m sikọ nwan d'a chọ atụnrụn m, chọ wẹ ru alị.

¹² Kẹ onyẹ e du atụnrụn rị igunrun atụnrụn dọn a chọ ndị kpapụnị, ẹrịra kẹ m k'a dọn chọ atụnrụn m. A zụọpụha m wẹ ebe-lẹ-ebe wẹ gbajẹn ụhụọhịn igwere fọnlẹni.

¹³ M k'e wepụha wẹ alị ndị ọzọ wẹ rị, gha alị ndị ọzọ hụ kpọnlụa wẹ alị wẹ; a nọ m elu ugu ndị rị alị Izrẹlụ lẹ ọdanmgbugbu alị Izrẹlụ lẹ ebe ile ịhịan e bi imẹ ẹ dumẹ wẹ.

¹⁴ Ebe ezigbo ẹfịfịa rị kẹ m'a nọ zụn wẹ; elu ugu ndị rị Izrẹlụ kẹ wẹ k'a nọ a kpa nni. Ẹghẹẹ, wẹ k'e ri, dinẹ ebe ẹfịfịa rị mma jun, wẹ k'a nọ elu ugu Izrẹlụ ebe ẹfịfịa rị mma rị a kpa nni.

¹⁵ Mmẹ k'e du atụnrụn m, mẹ wẹ ri, dinẹ. Ya kẹ Osolobuẹ Nwọn Ihiẹn Ile ku.

¹⁶ M k'a chọ ndị tuhuni; m k'e wekinhẹn ndị kpahuni. M k'e kẹnmẹ ndị rụ ẹhụ ebe wẹ rụ ẹhụ, e mẹ m ndị kẹnrẹnlẹni kẹnrẹn. Kanị m k'e tikpọ ndị tutuni lẹ ndị kẹnrẹnni hụn rị a kpangbu ibe wẹ. M k'e du wẹ ile k'o dọn furu.

¹⁷ “ ‘Ụnụ nwẹn hụn wụ atụnrụn m, Osolobuẹ Nwọn Ihiẹn Ile sị: M k'a hannị atụnrụn lẹ atụnrụn eṅẹn, hannị ebulu lẹ ibe ẹ, hanzịnị ewu lẹ ibe ẹ.

¹⁸ O hini ụnụ nị ụnụ nọ ẹfịfịa rị mma e ri? Omẹni ụnụ egini ụkụ zọkpụkpọ ẹfịfịa họdụnị, ọzọba rọ? Ụnụ ragụ mirin rị mma nị ụnụ egini ụkụ gberụrụ mirin họdụnị, ọzọba rọ?

¹⁹ Nị atụnrụn m e ri nwan ẹfịfịa ụnụ zọkpụkpọ, a ra mirin ụnụ gi ụkụ gberụrụ?

²⁰ “ ‘Osolobuẹ Nwọn Ihiẹn Ile sị wẹ nwan: Lee n'ẹ, m sikọ d'a hannị atụnrụn tutuni lẹ hụn tutulẹni eṅẹn.

²¹ Makẹni ụnụ gi ẹkụnkụn lẹ uvun e nu ibe ụnụ, a sụn ibe ụnụ ndụn rịlẹni mpịn, d'e runi ụnụ a chụpụ wẹ,

²² m k'a zụọpụha atụnrụn m, achụkọzị wẹ wẹ e gburi. M k'a hannị atụnrụn lẹ ibe ẹ eṅẹn.

²³ “ ‘M k'e bu wẹ che okpuru onyẹ-ndu ohu, o lepụ wẹ ẹnya ọhụnma. Odibo m wụ Defidi rọ, ya nwọn du wẹ; ịya k'e lepụ wẹ ẹnya.

²⁴ Mmẹ wụ Osolobuẹ k'a wụ Chuku wẹ, odibo m wụ Defidi a wụrụ onyẹ-isi wẹ. Mmẹ wụ Osolobuẹ e kuọl'a.

Osolobuẹ K'e Mẹ N'ọ Rịzịnị Ndị Nke Ẹ Mma

²⁵ “ ‘M k'e kwe wẹ nkwa hụn m k'e gi mẹ n'ọ rịnị wẹ mma; m k'a chụpụ eje-anụ alị wẹ, nkewụnị wẹ k'a sadẹ ẹka biri imẹ atụ, sazị ẹka ranhịn imẹ ẹgboko — ihiẹn emẹkọ wẹ.

²⁶ M k'e mẹ uwẹ lẹ ebe ile fihunmẹ ugu m wụrụ ngọzi. M k'e zihẹ mirin udu ẹ, mirin hụn k'e wẹhẹ ngọzi.

²⁷ Osisi k'a gha a mị mkpụrụ wẹ; alị k'a gha e mẹ ihiẹn-ugbo; ẹhụ k'e fu ịhịan imẹ alị wẹ. Wẹ k'a marịn nị mmẹ wụ Osolobuẹ, ogẹn m'e gi kpagipụ aba wẹ gi kpọdọn wẹ, zụọpụha wẹ ẹka ndị rị a kpa wẹ igbọn.

²⁸ Alị ndị ọzọ egbukọzị wẹ a kwarị, eje-anụ egburikọzị wẹ. Wẹ k'e biri udọn-lẹ-ndọnkwa, onwọnni onyẹ k'e rọn wẹ egun.

²⁹ M k'e mẹ alị wẹ wụrụ alị wẹ gi alị ihiẹn-ugbo marịn, ụnwụn erukọzị wẹ ẹhụ, ndị alị ọzọ elegberikọzị wẹ.

³⁰ Ogẹn ahụn, wẹ k'a marịn nị mmẹ, Osolobuẹ wụ Chuku wẹ, nọyeni wẹ anọyeni, marịnzịkwọ nị wẹ wụ ndị Izrẹlụ wụ ndị nke m. Ya kẹ Osolobuẹ Nwọn Ihiẹn Ile ku.

³¹ Ụnụ wụ atụnrụn m, atụnrụn m'a zụn hụn wụ ịhịan; mmẹ wụ Chuku ụnụ. Ya kẹ Osolobuẹ Nwọn Ikẹn Ile ku.’ ”