Izikẹlụ 33 - Ika

Isi Nke Mmẹtọ Kwasị Ọgụn Izikẹlụ Wụ Onyẹ-nche

¹ Osolobuẹ sị m,

² “Nwa-ịhịan, gwa ndị alị ị oku, sị wẹ: ‘Omẹni m wẹhẹ ọpịa-agha d'e bu nụmanị alị, nị ndị alị ahụn a họrị ịhịan tumẹ ẹ onyẹ-nche,

³ omẹni onyẹ nche hụ a hụn kẹ ọpịa-agha lala alị hụ, o gbu opi (ọdụ) gi gwa ndị alị nị nsọngbu lala,

⁴ ịhịan a nụ opi hụ bụ o gin'ẹ dọn, nị ọpịa-agha a bịa, gbu ẹ, ẹdeke ẹ k'a rị ya lẹ enwẹn ẹ isi.

⁵ Ebe o mẹni ọ nụgụọ kẹ wẹ gbu opi bụ o gini ẹ dọn, ẹdeke ẹ k'a rị a isi. Omẹni o te gi ẹ dọn, nkẹ ọ zụọrị isi ẹ.

⁶ Kanị, omẹni onyẹ-nche hụ a hụn ọpịa-agha hụ k'ọ lala bụ o gbuni opi gi gwa wẹ nị nsọngbu lala, nị ọpịa-agha hụ a bịa, gbu ịhịan, onyẹ-njọ hụ k'a nwụntọ imẹ njọ a nke-esi, kanị ẹka onyẹ-nche hụ kẹ m'a nọ chọ ẹdeke ẹ.’

⁷ “Nwa-ịhịan e tumẹgụọ m'ị nwan onyẹ-nche ndị Izrẹlụ; i sikọ d'e gọn ntịn oku m, y'a gwakwọnị m wẹ ihiẹn m ku.

⁸ M sị eje-ịhịan, ‘Eje-ịhịan, ị k'a nwụnrịrị!!’ bụ y'a gwan'a kẹni ọ latọ eje-obibi ẹ, eje-ịhịan hụ k'e gi ufiri njọ a nwụn. Kanị ẹka ị kẹ m'a nọ chọ ẹdeke ẹ.

⁹ Kanị omẹni y'a gwagụọ eje-ịhịan ahụn latọ eje-obibi ẹ, bụ o kwerini, ịya jẹnkọ d'a nwụn yeni njọ a, kanị yụ nwẹn a zụọrịgụọ isi i.

Ndị Izrẹlụ, Kị Ụnụ K'a Nwụnnị?!

¹⁰ “Nwa-ịhịan, sị ndị Izrẹlụ: Ụnụ hụ a sị, ‘Mmẹfie ẹnyi lẹ njọ ẹnyi hụ e gbu ẹnyi nwan, ẹnyi hụ e gi ufiri wẹ a la. Nanị ẹnyi a dọn nwan rị ndụn?’

¹¹ Sị wẹ nwan nị mmẹ, Osolobuẹ Nwọn Ihiẹn ile, sị, ‘Ma isi m, o mẹkwọ nị ọnwụn eje-ịhịan a sụọ m asụọ! Ihiẹn m chọ wụ n'o bihutọ ẹka, rị ndụn!! Bihutọ nị ẹka! La nị eje-obibi ụnụ tọ! Kị ụnụ ndị Izrẹlụ k'a nwụnnị?’

¹² “Nwa-ịhịan, sị nwan ndị alị ụnụ, ‘Onyẹ ezi-omumẹ nupụ isi, ezi-omumẹ ẹ azụọpụhakọ a; eje-ihiẹn hụn eje-ịhịan mẹ egbukọ a omẹni ọ latọ a, bimẹ ọhụnma. Onyẹ ezi-omumẹ mẹ njọ o gikọ ezi-omumẹ hụn o mẹ mbụ rị ndụn.’

¹³ M sị onyẹ ezi-omumẹ n'o k'a rịrịrị ndụn, bụ o gi ezi-omumẹ ẹ dọn ẹnya, mẹmẹ eje-ihiẹn, anyanhankọ wẹ ezi omumẹ ẹ; o k'a nwụnrịrị.

¹⁴ O mẹzikwọ nị m sị eje-ịhịan, ‘Ị k'a nwụnrịrị!!’ kanị o bihutọ ẹka, mẹmẹ ihiẹn furuni, mẹmẹ ezi-omumẹ —

¹⁵ o wekin ihiẹn o gi fieri ụgwọ, o wekin ihiẹn o zu, o dọnmẹmẹ iwu w'e dọnmẹ a rị ndụn — mẹbehi eje-ihiẹn, o k'a rịrịrị ndụn; ọ nwụnkọ.

¹⁶ Onwọnni njọ a wẹ k'a nyanhann'a. O mẹgụọ ihiẹn furuni, mẹ ihiẹn rị mma; o k'a rịrịrị ndụn.

¹⁷ “Kị ndị alị ụnụ rị nwan a sịnị, ‘Kẹ Osolobuẹ dọn e mẹ ihiẹn ẹ arị mma,’ bụ uwẹ rị e mẹ ihiẹn rịlẹni mma?

¹⁸ Onyẹ ezi-omumẹ bihutọ ẹka, mẹmẹ eje-ihiẹn, o k'a nwụn yeni eje-ihiẹn ndị ahụn.

¹⁹ Kanị eje-ịhịan bihutọ ẹka, mẹbehi eje-ihiẹn, mẹmẹ ihiẹn furuni, mẹmẹ ezi-omumẹ, o k'a rị ndụn yeni ezi-omumẹ ẹ.

²⁰ Kanị ụnụ ndị Izrẹlụ hụ a sị, ‘Kẹ Osolobuẹ dọn e mẹ ihiẹn ẹ arị mma.’ “Obibi onyẹ-onyẹ kẹ m'e gi kin onyẹ-onyẹ imẹ ụnụ ikpe, ụnụ ndị Izrẹlụ.”

A Kọwa Wẹ Ọdịdan Jerusalẹm

²¹ Nke akpọhịn isẹn imẹ ifọn nke iri imẹ ahụa nke mmẹbụọ hụ wẹ kpụnhan ẹnyi Babilọnụ, okẹnnyẹ ohu imẹ ndị hụn isi wanahịn ogẹn wẹ gi tikpọ Jerusalẹm nọ bịa d'e kunrun m, sị, “E tikpọgụọ wẹ Jerusalẹm!”

²² W'a kpọ a ẹnyasị ụnyanhụn nị okẹnnyẹ hụ d'a bịa, Osolobuẹ mẹtụ m ẹka, shịapụ m ọnụ, o ru ogẹn okẹnnyẹ ahụn gi bịa ụtụntụn, ọnụ m nọ kpupụ, agbazịnị m nkịtịn.

²³ Osolobuẹ nọ sị m,

²⁴ “Nwa-ịhịan, ndị bi obodo ndị hụ mẹ nwan mkpọkọ-mkpọkọ imẹ alị Izrẹlụ rị a sị, ‘Ebraham wụ onyẹ ohu sụọ, kanị ọ nọ saẹka nwọnrin alịnị. Ẹnyi nwẹn e bughọ nwan ọda — ya wụ nị ẹnyi k'a saẹka nwọnrin alịnị.’

²⁵ Sị wẹ nwan nị Osolobuẹ Nwọn Ihiẹn Ile sị, ‘Ụnụ hụ e ri ẹdeke anụ, e fe mmọn, e gbu ịhịan, nanị ụnụ e dọn nwan nwọnrin alị hụ?

²⁶ Ụnụ hụ e gi ọpịa-agha ụnụ e bi, e mẹ arụ, onyẹ-onyẹ lẹ nwunyẹ ibe ẹ hụ e mẹ arụ. Nanị ụnụ e dọn nwan nwọnrin alịnị?’

²⁷ “Sị wẹ nị Osolobuẹ Nwọn Ihiẹn Ile sị, ‘Ma isi m, ọpịa-agha k'e gbu onyẹ ọwụlẹ họdụ imẹ obodo ndị ahụn mẹ mkpọkọ-mkpọkọ imẹ Izrẹlụ, m jẹnkọ d'e we ndị rị alị-ọfịa ye anụ-ọfịa gburi, gi eje-emu gbu ndị warịsọnmẹ ebe a fụ ọrụn ọbanye lẹ okporo.

²⁸ M k'e mẹ alị Izrẹlụ gba okpokoro, mẹ ẹ la iwi, ikẹn ẹ ahụn o gi a họnrọn a gụ; ugu ndị rị Izrẹlụ k'a gba okpokoro makẹni onwọnzini onyẹ k'a ghazị elu wẹ.

²⁹ Wẹ k'a marịn nị mmẹ wụ Osolobuẹ, ogẹn m'e gi mẹ alị wẹ gba okpokoro, mẹ ẹ la iwi, yeni ihiẹn-ụrụ ndị hụ wẹ mẹ.’

³⁰ “Yụ nwẹn, nwa-ịhịan, ndị alị ụnụ hụ e ku oku i ebe-lẹ-ebe wẹ zu ụsụọ-ẹjan lẹ ọnụmụzọ iwe wẹ; wẹ rị a sị ibe wẹ lẹ umunẹ wẹ, ‘Nị ẹnyi d'a nụ k'o nwọnghọ ihiẹn Osolobuẹ ku.’

³¹ Ndị nke m hụ a bịa d'e kunrun i kẹ wẹ dọn a bịa, a nọdị ihun i, e gọn ntịn oku i, kanị a rị wẹ e mẹ ihiẹn wẹ rị a nụ. E nwọnkẹ wẹ ọnụ-ọma, kanị wẹ hụkwọ a chọ nke wẹ nke wẹ.

³² Ị nọ wẹ kẹ olu ọma rị a bụ ẹbụ ihiẹn-ọsụsụọ, a kụ egu ọhụnma, makẹni w'a nụhụ ihiẹn ị rị e ku, bụ w'a ra mẹ ẹ.

³³ “Kanị, ihiẹn lalanị mẹgụ — makẹni wẹ k'e mẹrịrị — a marịn wẹ nị onyẹ amụma a nọgụọ imẹ igunrun wẹ.”