Izikẹlụ 32 - Ika

Isi Nke Mmẹbụọ Kwasị Ọgụn Osolobuẹ Sị Wẹ Kwan Eze Ijiptu

¹ Ahụa nke mmẹbụọ wẹ kpụnhan ẹnyi imẹ Babilọnụ, ụhụọhịn ibuzọ imẹ ifọn nke mmẹbụọ, Osolobuẹ nọ sị m,

² “Nwa-ịhịan, kwanma Fẹro eze Ijiptu, sị a: Ị rị e mẹ ẹwọrọ-ẹwọrọ ebe alị ndị ọzọ rị; kanị ị rịhụ kẹ eje-anụ rị imẹ ohimin: ị hụ a zụnlihi imẹ Iyi i, e gi ụkụ e gberụrụ mirin, a rụrụ mirin Iyi hụ.

³ “Osolobuẹ Nwọn Ihiẹn Ile sị: M k'a tụ ọga m kpu i; m k'e gi alị bugbu enwẹn wẹ ọda kịgbamanị mẹ ẹ, e gi wẹ ọga m dọkpụnpụha ị.

⁴ M k'a la ị tọ alị mkpẹnrẹn mirin, tụ ị ye elu ẹfịfịa. E mẹ m nnụnụ ile e fe elu bekwasị ị, gi i yejun anụmanụ ile a kpa alị ẹfọ.

⁵ M k'e bu anụ ị che ugu ichẹn-ichẹn; m k'e bu ozun i hụ hi ogbe che ọdanmgbugbu.

⁶ M k'e mẹ alị guhu yeni ẹdeke i d'e rudẹ elu ugu; ẹdeke i k'e hujunzi ọdanmgbugbu.

⁷ Ogẹn m'e gi tinyụn ị, m k'e mẹ igwere gba ishi, mẹ kokisẹ kebehi; e gi m orukpu kpumẹ ẹnyanwụn; ifọn nkẹ etikọ.

⁸ Anịkọ m ukpẹ ọwụlẹ rị igwere nwunn'i; m k'e mẹ alị ị gba ishi. Ya kẹ Osolobuẹ Nwọn Ihiẹn Ile ku.

⁹ M k'e mẹ obi kọnrin alị bu ọda elu, ogẹn m'e gi wẹhẹni alị ndị ọzọ ozi nị e tikpọgụọ wẹ i, kẹ alị ndị hụn ị marịnlẹni!

¹⁰ M k'e mẹ ihiẹn mẹn'i ri alị bu ọda ọnụ; ndị-nze wẹ k'e mẹhunmẹ ọda-ọda yeni egun, ogẹn m'e gi gi ẹ fe wẹ ọpịa-agha ẹnya; onyẹ-onyẹ k'a rị a ma piripiri yeni ndụn a ụhụọhịn ọdịdan ị.

¹¹ “Makẹni, Osolobuẹ Nwọn Ihiẹn Ile sị: ‘Ọpịa-agha eze Babilọnụ k'a bịa d'a maye i.

¹² M k'e gi ọpịa-agha ndị odogun-agha gbuchanrịn igwerigwe i, Ijiptu, ọpịa-agha ndị odogun-agha alị hụ ẹfọ kachanrịn a jọ. Wẹ k'e tikpọ ihiẹn ile Ijiptu gi a họnrọn, gbupụ igwerigwe ẹ ile.

¹³ M k'e gbupụ anụ-ụlọ a ile a kpa mkpẹnrẹn mirin ẹ ile, onwọnzini onyẹ k'a họdụ Ijiptu hụn o gi gberụrụma mirin ẹ, anụ arịkọzị a hụn o gi gberụrụma wẹ.

¹⁴ Ogẹn ahụn, e mẹ m mirin wẹ dọn, mẹ Iyi wẹ humẹ kẹ udẹn. Ya kẹ Osolobuẹ Nwọn Ihiẹn Ile ku.

¹⁵ Ogẹn m k'e gi mẹ alị Ijiptu gba okpokoro, zapụchanrịn ihiẹn ile rị imẹ ẹ, gbuchanrịn ndị ile bi ebahụn, a marịn wẹ nị mmẹ wụ Osolobuẹ.’

¹⁶ “Ẹbụ w'e gi kwan ịhịan rọ. Wẹ k'a gha a bụ a; ikpoho alị ichẹn-ichẹn k'a gha a bụ a. Ijiptu lẹ igwerigwe ẹ ile kẹ wẹ k'a bụsọnmẹn'ẹ. Ya kẹ Osolobuẹ Nwọn Ihiẹn Ile ku.”

Fẹro Sikọ Alị-mmọn D'e Buru Ibe Ẹ Ndị Kịgbu Ịhịan

¹⁷ Nke akpọhịn mmisẹn imẹ ifọn ahụn, imẹ ahụa nke mmẹbụọ hụ, Osolobuẹ nọ sị m:

¹⁸ “Nwa-ịhịan, kwan igwerigwe alị Ijiptu, n'i wetu Ijiptu lẹ okẹn alị ndị ọzọ kpa ikẹn che ebe kachanrịn e mi imẹ alị, we wẹ cheni ndị lashigụ mgbugbu hụ.

¹⁹ Sị Ijiptu, ‘Yụ kadẹ nwan ndị ọzọ mma ra? Shi imẹ ili d'e dinẹyeni ndị felẹni Osolobuẹ.’

²⁰ “Ndị Ijiptu nkẹ sikọ d'a danzị kẹ ndị ọzọ ọpịa-agha gbu. E wepụhagụọnị wẹ wẹ ọpịa-agha. Kpụnrụn ya lẹ igwerigwe ẹ ile!

²¹ Ndị uku kpazị ikẹn k'a nọ imẹ ili sị Ijiptu lẹ ndị kwadọnn'ẹ alụa, sị, ‘Wẹ nwẹn e ruzi ili ebeni; e dinẹyeni wẹ ndị felẹni Osolobuẹ, ndị ọpịa-agha gbuzi.’

²² “Alị Asiria nkẹ hụzị ili, ịya lẹ igwerigwe ndị agha a ile fihunmẹn'ẹ ebẹhụ. Ọpịa-agha e gbuchanrịngụọ wẹ.

²³ Wẹ rị nwan ili wẹ ebe kachanrịn e mi imẹ alị; ndị itu wẹ fihunmẹ wẹ imẹ ili. Wẹ ile a nwụnhụngụọ, ọpịa-agha e gbugụọzị wẹ. Ndị nwẹn te e rọn ndị rị elu-ụwa egun.

²⁴ “Alị Ẹlam nkẹ hụzị ili, ya lẹ igwerigwe ndị agha a ile fihunmẹn'ẹ ebẹhụ; a nwụnchanrịngụọ wẹ. Ọpịa-agha e gbuchanrịngụọ wẹ. A lagụọ wẹ nwan ebe kachanrịn e mi imẹ alị, wẹ ile felẹni Osolobuẹ. Wẹ te e rọn ndị rị elu ụwa egun, kanị ifẹnrẹn rị nwan e mẹgbu wẹ imẹ ili lekẹ ndị ọzọ.

²⁵ E yegụọ w'a bẹdi imẹ ndị hụ wẹ gbu, ya lẹ igwerigwe ndị agha a fihunmẹn'ẹ ebẹhụ. Wẹ ile wụ ndị felẹni Osolobuẹ. Ọpịa-agha e gbuchanrịgụọ wẹ. Wẹ te e rọn ndị rị elu ụwa egun, kanị wẹ rị nwan imẹ ili nọkẹ ndị ọzọ, ifẹnrẹn hụ e mẹgbu wẹ nọkẹ ndị ọzọ wẹ gbuzi lashigụ imẹ ili.

²⁶ “Mẹshẹki lẹ Tubalụ hụzị ili, ya lẹ igwerigwe ndị agha a ile fihunmẹn'ẹ ebẹhụ. Wẹ ile wụ ndị felẹni Osolobuẹ. Ọpịa-agha e gbuchanrịngụọ wẹ. Wẹ te e rọn ndị rị elu-ụwa egun.

²⁷ Elini wẹ wẹ ọhụnma kẹ ụfọdụ ndị odogun-agha ibe wẹ felẹni Osolobuẹ, hụn wẹ bu ihiẹn-ọgụn wẹ cheni wẹ imẹ ili, bu ọpịa-agha wẹ cheni wẹ gi firi isi. Ndị odogun aghanị hụzịdẹ e gi ọkpụkpụ wẹ họdụnị e bu ihiẹn wẹ mẹ, ihiẹn egun te gi tụgbu elu-ụwa ile.

²⁸ “Yụ nwẹn wụ Fẹro alị Ijiptu, wẹ k'e tikpọ ị nọkẹ ndị ọzọ felẹni Osolobuẹ, y'e dinẹyeni ndị wẹ gizi ọpịa-agha gbu.

²⁹ “Alị Ẹdọm hụ ebahụn — ya lẹ ndị-nze wẹ lẹ ndị-isi wẹ; kẹ w'a kpahanlẹ ikẹn, wẹ rị nwan imẹ ndị wẹ gi ọpịa-agha gbu, ndị felẹni Osolobuẹ hụn lashigụ imẹ ili.

³⁰ “Ndị-nze alị ile rị ẹbamịn-ugu lẹ ndị alị Sidọnụ ile rịzịkwọ ebẹhụ; wẹ rịzịkwọ alị imẹ ndị wẹ gbu. O tuni egun ile wẹ rọn ịhịan lẹ ikẹn ile wẹ kpa. Wẹ rị nwan alị kẹ ndị felẹni Osolobuẹ; wẹ rị nwan imẹ ndị wẹ gi ọpịa-agha gbu. Ifẹnrẹn hụ e mẹ wẹ nọkẹ ndị ọzọ wẹ gbuzi lashigụ imẹ ili.

³¹ “Fẹro k'a hụn wẹ, obi e mẹ ẹ jụụ — nị ẹlẹ ịya lẹ igwerigwe ndị agha a sụọ kẹ wẹ gi ọpịa-agha gbu. Ya kẹ Osolobuẹ Nwọn Ihiẹn Ile ku.

³² Ọsụọn'a e gigụọ m Fẹro rọngbarị elu-ụwa egun, wẹ k'e bu Fẹro li imẹ igunrun ndị ahụn felẹni Osolobuẹ wẹ gi ọpịa-agha gbu, ya lẹ igwerigwe ndị agha a ile. Ya kẹ Osolobuẹ Nwọn Ihiẹn ile ku.”