Izikẹlụ 3 - Ika

Isi Nke Ẹtọ

¹ Ọ sị m, “Nwa-ịhịan, ri ihiẹnni ị rị a hụn, ri ibe ẹkụkwọnị — y'e jẹnmẹ d'a gwa ikpụlọ Izrẹlụ oku.”

² Ya m nọ shịapụ ọnụ, ọ nọ ye m ibe ẹkụkwọ hụ ri.

³ Ọ sị m, “Nwa-ịhịan, ri ibe ẹkụkwọnị m rị e ye i; ri ẹ n'o jun i ẹfọ.” Ya m nọ ri ẹ, ọ sụọ m ọnụ kẹ mirin-ẹnwụn.

⁴ Ọ nọ sị, “Nwa-ịhịan, buru nwan ikpụlọ Izrẹlụ d'a gwa wẹ ihiẹn m ku.

⁵ Ẹlẹ itumunyẹ asụsụ wẹ a fụ ọrụn ọghọta kẹ m zikọ ị d'e kunrun kanị ikpụlọ Izrẹlụ —

⁶ ẹlẹ alị ichẹn-ichẹn bu ọda asụsụ wẹ a fụ ọrụn mọbụ ndị o mẹ ni y'a ghọtakọ ihiẹn wẹ rị e ku. Omẹni wẹ rọ, nkẹ e gọndẹ wẹ i ntịn.

⁷ Kanị ikpụlọ Izrẹlụ egọnkọ ị ntịn, makẹni achọnị wẹ nị wẹ gọn m ntịn, makẹni ikpụlọ Izrẹlụ ile wụ ndị isi-ikẹn obi wẹ ze.

⁸ Kanị, e mẹgụọ m n'ị yụ nwẹn wụrụnị wẹ onyẹ isi-akwanran nọkẹ uwẹ, onyẹ ghalẹni a nụ nke ịhịan.

⁹ E mẹgụọ m'ị ze kẹ ọmụma zenahịn ibe ẹ, mẹ i zenahịndẹ ọmụma flịntị. Atụlẹ nwan egun wẹ mọbụ lee wẹ ẹnya ihun tụma egun, kẹ w'e mẹhanlẹ ndị nnupụ-isi.”

¹⁰ Ọ nọ sị m, “Nwa-ịhịan, gọn ntịn ihiẹn ile m rị a gwa ị, y'e bu wẹ che obi,

¹¹ y'e buru ndị nke ụnụ rị imẹ ndị wẹ kpụnhan alịnị d'a gwa wẹ oku. Sị wẹ, ‘Lee ni ihiẹn Osolobuẹ nwọn ihiẹn ile ku.’ Kẹ wẹ gọn ntịn kẹ egọnni wẹ.”

¹² Ya kẹ Mmọn Osolobuẹ nọ buli m elu, m nọ nụ ụzụn ibe azụụn m, ụzụn ahụn nọ kẹ ụzụn okẹn mirin. Ọghọ ahụn m hụn Osolobuẹ gi pụha ebẹhụ a pụkakwọ ichẹn!

¹³ Ụzụn hụn m nụ wụ ẹka-nku ihiẹn ẹnịnọ hụ rị ndụn kẹ wẹ rị e kunrunsọnmẹ ẹka-nku ibe wẹ lẹ ụzụn wili ndị hụ rịsọnmẹ ụsụọ wẹ; okẹn ụzụn rọ, nọkẹ ụzụn okẹn mirin.

¹⁴ Mmọn-Osolobuẹ nọ buli m elu, weri m, mmẹ lẹ ẹfọ rịlẹni a sụọ m ụsụọ lẹ olulu jun m obi; ẹka Osolobuẹ kwọndọn m ọda-ọda.

¹⁵ A hụnzị m enwẹn m ebẹhụ ẹnyi ndị Izrẹlụ wẹ kpụnrụn bi imẹ obodo Tẹlụ-Abibu hụn rị mkpẹnrẹn Iyi Kẹba. M nọ nọdị akpọhịn ẹsa; ihiẹn m hụn e ri m ọnụ.

Onyẹ-ozi Osolobuẹ Wụ Onyẹ-nche Alị

¹⁶ Akpọhịn ẹsa a gharịgụ, Osolobuẹ nọ sị m,

¹⁷ “Nwa-ịhịan, e tumẹgụọ m'ị onyẹ-nche ikpụlọ Izrẹlụ. I sikọ nwan d'a gha e gi ihiẹn ị nụ ọnụ m a gbanị m wẹ mkpịnsịn-ẹka ẹnya.

¹⁸ “M sị eje-ịhịan, ‘Ị jẹnkọ d'a nwụnrịrị,’ bụ y'a gban'a mkpịnsịn-ẹka ẹnya mọbụ gwapụ a kẹn'o bibehi eje-obibi hụ ọ rị e bi, gi ẹ zụọpụha a, eje-ịhịan hụ k'a nwụn makẹ njọ a, kanị ẹdeke ẹ jẹnkọ d'a rị ị ẹka.

¹⁹ Kanị, o mẹni y'a gbagụọ eje-ịhịan mkpịnsịn-ẹka ẹnya, bụ ọ latọnị eje-ihiẹn ọ rị e mẹ mọbụ eje-obibi ẹ, o k'a nwụn makẹ njọ a; kanị yụ nwẹn a zụọrịgụọ isi i.

²⁰ “O mẹzikwọnị onyẹ ezi-omumẹ a latọ ezi-omumẹ ẹ, mẹmẹ eje-ihiẹn, nị e bu m uke tọn'a; o k'a nwụn. Ebe o mẹ ni y'a gban'a mkpịnsịn-ẹka ẹnya, o k'a nwụn makẹ njọ a. Anyanhankọ m ihiẹn rị mma o mẹ; ẹdeke ẹ jẹnkọ d'a rị ị ẹka.

²¹ Kanị, omẹni y'a gbaghọ onyẹ ezi-omumẹ mkpịnsịn-ẹka ẹnya, sị a emẹlẹ njọ, n'o mẹni njọ, o k'a rịrịrị ndụn, makẹni o gi mkpịnsịn-ẹka ị gba a dọn; yụ nwẹn a zụọrịgụọzị isi i.”

²² Osolobuẹ nọ bu ẹka kwasị m ebẹhụ m rị, sị m, “Lihi ọtọ shi ọdanmgbugbu, m jẹnkọ d'a nọ ebẹhụ gwa ị oku.”

²³ Ya m nọ lihi ọtọ, shi ọdanmgbugbu. E lee ọghọ Osolobuẹ gi pụha k'ọ mawuru ebẹhụ nọkẹ hụn m hụn mkpẹnrẹn Iyi-Kẹba; m nọ bu ẹfọ mama alị.

²⁴ Mmọn-Osolobuẹ nọ ban imẹ m, bu m wuzo. Ọ nọ sị m, “Jẹnmẹ d'a kpọkin enwẹn i ye imẹ ụlọ iwe i.

²⁵ Wẹ k'e kẹn yụ wụ nwa-ịhịan ẹgbụn, y'a sakọ ẹka pụ ezi ebe ndị ọzọ rị.

²⁶ M k'e mẹ ire nyanrịn ị okpo kẹni i gba nkịtịn, amamgbe y'a jụgbọma wẹ, ọsụọn'a nị ebọn nnupụ-isi kẹ wẹ wụ.

²⁷ Kanị, m gwa ị oku, a shịapụ m'ị ọnụ, y'a gwa wẹ ya, sị wẹ, ‘Lee ni ihiẹn Osolobuẹ ihiẹn ile rị okpuru ẹ ku.’ Onyẹ chọ n'o gọn ntịn y'a gọn; onyẹ sị o gọnkọ, y'e gọnlẹ; ebọn nnupụ-isi kẹ wẹ wụ.”