Izikẹlụ 29 - Ika

Isi Nke Itenẹi Kwasị Ọgụn Ihiẹn Osolobuẹ K'e Mẹ Alị Ijiptu

¹ Ahụa nke iri wẹ kpụnhan ẹnyi alị Babilọnụ, nke akpọhịn mmẹbụọ imẹ ifọn nke iri, Osolobuẹ gwa m oku, sị m,

² “Nwa-ịhịan, bu ihun zinmẹ ebe Fẹro eze Ijiptu rị, y'e bu amụma ihiẹn k'e mẹn'ẹ lẹ ihiẹn k'e mẹ ndị Ijiptu ile.

³ Sị: Osolobuẹ Nwọn Ihiẹn Ile sị: ‘Mmẹ lẹ yụ rọ, Fẹro eze Ijiptu, ẹregede eje-anụ hụn dinẹ ebẹhụ Iyi Naịlị rị, hụn sị, “Iyi Naịlị wụ nke m; ẹka m mẹni m'ẹ.”

⁴ Kanị m k'e bu ukpo che i agban, e mẹ m azụn rị Iyi Naịlị ị hụ kụnrụnsọnmẹ i okpukpu. A gha m imẹ Iyi Naịlị hụ dọkpụnpụha ị, yụ lẹ azụn Naịlị hụ ile kụnrụn ị okpukpu;

⁵ a la m'ị tọ alị imẹ atụ alị-ọkpọnkụn, yụ lẹ azụn hụ ile rị Iyi Naịlị ị. Ụnụ a tọ ogige ebẹhụ, ekpọnkikomẹkọ wẹ ụnụ, ekpọnrịnkọ wẹ ụnụ, makẹni e bugụọ m'i tọnị anụmanụ lẹ nnụnụ ri.

⁶ Ndị ile bi Ijiptu k'e gi ẹ marịn nị m wụ Osolobuẹ. “ ‘Makẹni, a wụrụọlẹni wẹ Izrẹlụ ọkpọ achara hụn wụlẹni ọkpọ.

⁷ Izrẹlụ kwọndọn i ẹka n'ị ghọdọn wẹ, y'a kpagi, ẹka nku wẹ ile a kwahị; a danbemẹ wẹ i, ị nọ tigipụ, akị wẹ ile a kwahị.

⁸ “ ‘Ya wụ, Osolobuẹ Nwọn Ihiẹn Ile sị: M k'e wẹhẹni i ọpịa-agha, o gbunarịn ị kẹ ịhịan kẹ anụmanụ.

⁹ Ijiptu k'e họnrin alị ịhịan bilẹni lẹ alị la iwi, e gi w'ẹ marịn nị m wụ Osolobuẹ. “ ‘Makẹni ị sị, “Iyi Naịlị wụ nke m, ẹka ọrụn m rọ,”

¹⁰ mmẹ lẹ yụ rọ, kẹ yụ kẹ Iyi Naịlị ị; m k'e mẹ nwan alị Ijiptu họnrin alị la iwi ịhịan bilẹni — ghakwọrị Mig'dọlụ d'e ru Aswanị, d'e rukwọrị okẹn yụ lẹ alị Ẹtiopịa.

¹¹ Onwọnni ụkụ ịhịan mọbụ anụ k'a ghan'a, onwọnni onyẹ k'e bin'ẹ, ọrọgbọ ahụa ọgụnnaị.

¹² M k'e mẹ alị Ijiptu gba okpokoro karị alị ndị ọzọ tikpọnị, mẹ obodo ndị rịn'a la iwi karị obodo ndị ọzọ. Wẹ k'a gba okpokoro ọrọgbọ ahụa ọgụnnaị. M k'e feyịya ndị Ijiptu ye alị ndị ọzọ; m k'e fe wẹ ye alị ichẹn-ichẹn.

¹³ “ ‘Osolobuẹ Nwọn Ihiẹn Ile sị: Ahụa ọgụnnaị hụ zugụ, m k'a gha alị ndị hụ wẹ feyesọnmẹ ndị Ijiptu wegbama wẹ.

¹⁴ A gha m ebe lẹ ebe wẹ kpụnjẹn wẹ welụa wẹ, wekinhẹn wẹ imẹ Patrọsị alị Ijiptu, ọkpụlọ wẹ. A nọdị wẹ ebẹhụ wụrụ alị-eze rị alụlụa.

¹⁵ Ya sikọ d'a ka alị-eze ndị-ọzọ alụlụa, ọ karịkọzị alị ndị ọzọ ẹka. M k'e mẹ wẹ wụrụ alị nta, nkewụnị onwọnzini mgbe o gi kị alị ndị ọzọ.

¹⁶ Ijiptu awụkọzị ihiẹn ndị Izrẹlụ gi e dọn ẹnya, ihiẹn wẹ gi a nyanhanzịnị m njọ wẹ mẹ, ọgbasọn ahụn wẹ gbasọn wẹ ogẹn mbụ d'a chọ eyemẹka. Ogẹn ahụn kẹ w'e gi marịn nị m wụ Osolobuẹ Nwọn Ihiẹn Ile.’ ”

Nebukadineza K'a Kwarị Ihiẹn Ndị Ijiptu

¹⁷ O ru ahụa nke ẹsa kwasị ọgụn, ụhụọhịn ibuzọ imẹ ifọn ibuzọ, Osolobuẹ nọ sị m,

¹⁸ “Nwa-ịhịan, Nebukadineza wụ eze Babilọnụ e mẹgụọ ndị-agha a rụn ntan rụn imọn ebe wẹ nọ a lụ Taya agha, isi a fịanpụ wẹ ile, isi-uvun ile a mara. Kanị kẹ ya kẹ ndị-agha a enwọnhẹnni ihiẹn ọwụlẹ agha hụ ile wẹ lụ Taya.

¹⁹ Lee nwan ihiẹn Osolobuẹ Nwọn Ihiẹn Ile ku: M sikọ nwan d'e we Ijiptu ye Nebukadineza eze Babilọnụ, o k'e kpọnrinchanrịn akụ-lẹ-ụba a, kwarị ihiẹn ọ kwalụa, narịn a ihiẹn ọ narịn ndị-ọzọ, gi wẹ kụ ndị-agha a ụgwọ ihiẹn wẹ mẹn'ẹ ndị Taya.

²⁰ Ụgwọ ọrụn hụn ọ rụn kẹ m gi nwan Ijiptu kụ a, makẹni mmẹ kẹ ya lẹ ndị agha a rụnnị ọrụn. Ya kẹ Osolobuẹ Nwọn Ihiẹn Ile ku.

²¹ “O ru ụhụọkịn hụ, m k'e mẹ mpịn hụn a zụọpụhanị suepụhanị Izrẹlụ, a shịapụ m'ị ọnụ imẹ igunrun wẹ. Ogẹn ahụn, a marịn wẹ nị m wụ Osolobuẹ.”