Izikẹlụ 28 - Ika

Isi Nke Ẹsatọ Kwasị Ọgụn Ihiẹn Osolobuẹ K'e Mẹ Eze Taya

¹ Osolobuẹ nọ sị m:

² “Nwa-ịhịan, gwa onyẹ rị a kị Taya, sị a: Lee ihiẹn Osolobuẹ Nwọn Ikẹn Ile ku: Makẹni ị rị a pache, a sị, ‘Mmọn kẹ m wụ; m rị ukpo mmọn etintin ohimin ebeni a kị,’ bụ ịhịan k'ị wụ, y'ẹlẹ mmọn, ọsụọn'a n'ị rị a sị enwẹn i n'ị wụ mmọn.

³ “Y'a marịnka-o! Ịyụ kadẹ Danẹlụ ihiẹn a marịn! Onwọnni ihiẹn w'a saẹka e zuemẹni i.

⁴ Y'e gigụọdẹ amamihiẹn i lẹ nghọta ị kpa akụ-lẹ-ụba, kpọn goru lẹ siliva jun ụlọ-akụ ị.

⁵ Y'e gigụọdẹ ẹnya afịa ị marịn hikẹnmẹ ọdanfịn, gi akụ-lẹ-ụba ị hụ pachemẹ.

⁶ Ufiri ẹ, Osolobuẹ Nwọn Ihiẹn Ile rị nwan a sị: ‘Ebe i ro n'i nwọn uche kẹ mmọn,

⁷ m sikọ nwan d'e zihẹ itumunyẹ d'a maye i, alị ẹfọ kachanrịn a jọ; wẹ k'e sepụha ọpịa-agha tikpọ ihiẹn hụ ile ma mma hụn i gi amamihiẹn i rụn; wẹ k'e wiwi ọghọ ị ahụn rị e gbukepụnị.

⁸ Wẹ k'a tụ i ye mgbugbu hụ; i k'a nwụn ọnwụn-ikẹn imẹ ohimin.

⁹ N'ị hụnzị ọnụ sị “M wụ mmọn” idẹnya onyẹ rị e gbun'i? Ịhịan mmaka k'i k'a wụ ẹka ndị rị e gbun'i, ẹlẹ mmọn.

¹⁰ Ị k'a gha ẹka itumunyẹ nwụn ọnwụn ifẹnrẹn nọkẹ ndị ghalẹni e fe Osolobuẹ. Mmẹ ku ẹ.’ Ya kẹ Osolobuẹ Nwọn Ihiẹn Ile ku.”

¹¹ Osolobuẹ sị m:

¹² “Nwa-ịhịan, goo eze Taya: sị a, Osolobuẹ Nwọn Ihiẹn Ile sị, ‘Yụ kẹ wẹ te gi a marịn ihiẹn zu oke; i te marịn ihiẹn ọda, mazịkwọ mma zu oke.

¹³ Imẹ Idẹni wụ ugbo Chuku k'ị te rị. Ọmụma ile rị mkpa e gbukeni kẹ wẹ te gi chọ ị mma: rubi, tọpazị, lẹ ẹmaradị; krisolaịtị, ọnik'si lẹ Jaspa; safaya, tọkwọzị lẹ berilu. Elu goru kẹ wẹ te kụmasọnmẹ wẹ ile, ghakwọrị ụhụọhịn wẹ ke i.

¹⁴ M tumẹ i chẹrobu hụn e che nche. Mmẹ ye ị ọnọdị hụ. Ugu nsọ Chuku k'i te rị; i te rị ebẹhụ ọmụma rị e nwun ọkụn rịsọnmẹ a ghahunmẹ.

¹⁵ Y'e te nwọn nkọrịanị kete w'e kelẹ i, d'e ru ogẹn hụ wẹ gi hụn eje-ihiẹn imẹ i.

¹⁶ Afịa ị rị a zanị kẹ ẹka-ikẹn gi jun imẹ i, i nọ mẹ njọ. M nọ chụ ị ọchụchụ-ụya, chụpụ ị ugu Chuku. M nọ chụpụchanrịn ị, chẹrobu e che nche, chụpụ ị ebe ọmụma ndị ahụn rị e nwun ọkụn rị.

¹⁷ Ị hụ a pache makẹni i ma mma-ẹhụ, ị nọ wiwi amamihiẹn i ebe ị rị e mẹ oku ọghọ ị. Ya m nọ tụ ị ye alị; bu i tọ kẹni ndị-nze a gba ị ile.

¹⁸ Y'e gigụọ njọ ị bu ọda lẹ ịzụ afịa rịlẹni mma, mẹrụ ebe rị ichẹn-ichẹn ị nọ e fe ofufe. Ya m nọ mẹ ọkụn gha imẹ i pụha, ọ nọ ripụ ị, e mẹ m'i họnrin ntụn rị alị, idẹnya ndị ile hụn ị mbụ.

¹⁹ Alị ile marịnn'ị amarịnzị hụn w'e mẹ, eje-ihiẹn a tụ egun e mẹọlẹ i. Y'a rịkọzị.’ ”

Ihiẹn Osolobuẹ K'e Mẹ Alị Sidọnụ

²⁰ Osolobuẹ sị m,

²¹ “Nwa-ịhịan, bu ihun zinmẹ alị Sidọnụ, bu amụma ihiẹn k'e mẹn'ẹ.

²² Sị, ‘Lee ihiẹn Osolobuẹ Nwọn Ihiẹn Ile ku: Alị Sidọnụ, mmẹ lẹ ịyụ rọ! M k'e gi ihiẹn m k'e mẹ imẹ i nwọnrin ọghọ. “ ‘Ịhịan ile k'a marịn nị mmẹ wụ Osolobuẹ, ogẹn m'e gi ye Sidọnụ afụnfụn ndị m k'e ye ẹ. M k'a ghọsị ndị Sidọnụ nị m rị nsọ.

²³ M k'e zi emu e gbuni ye imẹ ẹ, mẹ ẹdeke hu ọgbara-ogbe ẹ ile. Ndị wẹ rị e gbu k'a rị a dantọsọnmẹ alị imẹ ẹ yeni ọpịa-agha wẹ gi bunụmanị a azụụn ile. Ogẹn ahụn kẹ w'e gi marịn nị mmẹ wụ Osolobuẹ.

Osolobuẹ Rị E Mẹ N'ọ Rịnị Izrẹlụ Mma

²⁴ “ ‘Ogẹn ahụn, ndị Izrẹlụ enwọnkọzị ndị iṅẹnrẹn ndịnị fihunmẹni wẹ, e legberi wẹ, ndị hụn nọkẹ ogun-lẹ-ọkịnkan ebe wẹ rị. Ogẹn ahụn, a marịn wẹ nị mmẹ wụ Osolobuẹ Nwọn Ihiẹn Ile.

Izrẹlụ K'e Birizi Udọn-lẹ-Ndọnkwa

²⁵ “ ‘Osolobuẹ Nwọn Ihiẹn Ile sị: M ghagụ alị ile wẹ feye ndị Izrẹlụ wekinhẹn wẹ, m k'a nọ imẹ igunrun wẹ ghọsị nị m rị nsọ, ndị alị ichẹn-ichẹn a hụn a. Ogẹn ahụn, Izrẹlụ e biri alị wẹ hụn m ye odibo m wụ Jekọpụ nẹdi wẹ.

²⁶ Wẹ k'e biri ebẹhụ udọn-lẹ-ndọnkwa, tụnrụn ụlọ, rụnrụn ugbo; wẹ k'e biri udọn-lẹ-ndọnkwa ogẹn m'e gi mẹgụ ndị bikunmẹni wẹ hụn rị e legberini wẹ ihiẹn ile m k'e mẹ wẹ. Ogẹn hụ kẹ w'e gi marịn nị mmẹ wụ Osolobuẹ, hụn wụ Chuku wẹ.’ ”