Izikẹlụ 27 - Ika

Isi Nke Ẹsa Kwasị Ọgụn Alị Taya E Tikpọgụọ Lekẹ Ụgbọ-mirin

¹ Osolobuẹ sị m,

² “Nwa-ịhịan, kwannị Taya ẹkwan.

³ Sị alị Taya rị ọnụ ohimin, onyẹ-afịa ndị rị ichẹn-ichẹn lẹ alị bu ọda rị ohimin, ‘Lee ihiẹn Osolobuẹ Nwọn Ihiẹn ile ku: Taya, y'e kuọlẹ sị, “Mma m zu oke!”

⁴ Adamada ohimin te wụ nke i; ndị tụnnị ị tụn ị mma ị e zu oke!

⁵ Ezigbo osisi fe alị Sẹnịru kẹ wẹ gi tụn ị; ogwe sida alị Lẹbanọnụ kẹ wẹ gidẹ kẹnye ahịma ị.

⁶ Ezigbo osisi okuu alị Bashanị kẹ wẹ gi tụn amaran wẹ gi a nyan ị; ezigbo osisi saịprẹsị alị Saịprọsụ kẹ wẹ gi ma alị ị, gi eze ẹnyi nyan a.

⁷ Ẹkwa linẹni wẹ kpa imẹ alị Ijiptu kpayesọnmẹ ihiẹn ma mma kẹ wẹ tanma ufere gi e bu yụ wụ ụgbọ-mirin, o họnrin ahịma ị; ẹkwa bru lẹ pọpụ pụ ichẹn ndị alị Ẹlisha kẹ wẹ gi kwa ẹtu-ụlọ ghahunmẹ i.

⁸ Ndị Sidọnụ lẹ ndị Avadị te a nyann'ị; ndị Taya ụnụ marịn ẹnya ụgbọ-mirin te wụ ndị-isi ụgbọ ị.

⁹ Ndị-ọka alị Gẹbalụ lẹ ndị ọrụn-nka wẹ te wụ ndị e dọnzin'i ebe ile rị e hini. Ụgbọ-mirin ile e jẹn ohimin te a bịa d'e ṅọnnarịn ị ihiẹn.

¹⁰ “ ‘Kẹ ndị alị Pẹshịa kẹ ndị alị Ludu kẹ ndị Putu te rị ndị-agha ị. W'e kọnmẹsọnmẹ akpaịn lẹ okpu-agha wẹ imẹ i, e wẹhẹni i mgbaye.

¹¹ “ ‘Ndị-agha alị Avadị lẹ alị Hẹlẹkị (Silisia) te wụ ndị-nche e fihunmẹ mgbọn i ile; ndị-agha alị Gamadị te e che nche ebe ile zeni i gi dọn ẹnya. Wẹ te e kọnmẹ akpaịn wẹ mgbọn i, gi ẹ mẹ mma ị zu oke.

¹² “ ‘Ndị Tashishi te wụ ndị-afịa ị yeni okẹn akụ-lẹ-ụba ị; w'e gi siliva, igwe, igwe-ogbogoro lẹ igwe-lẹdi a zụnarịn ị afịa.

¹³ “ ‘Ndị Griki, ndị Tubalụ lẹ ndị Mẹshẹki te wụzị ndị-afịa ị, igbọn lẹ ihiẹn igwe-bronzu kẹ wẹ gi e ṅọnnarịn ị ihiẹn.

¹⁴ “ ‘Ndị Bẹt-Togama e gi ẹshin lẹ ndị-agha gi ẹshin a lụ agha lẹ anyịnyan-mulu e ṅọnnarịn ị ihiẹn.

¹⁵ “ ‘Ndị alị Rodu te wụzị ndị-afịa ị, alị bu ọda rịsọnmẹ ohimin te wụzịkwọ ndị-afịa ị, e gi eze-enyi lẹ ezigbo osisi ẹbọni a kụ ị ụgwọ.

¹⁶ “ ‘Alị Ẹdọm te wụzị onyẹ-afịa ị makẹni ụnụ e mẹmẹ ihiẹn bu ọda; wẹ e gi tọkwọzị nwẹnẹ goru a kụ ị ụgwọ, ya lẹ ẹkwa pọpụ pụ-ichẹn lẹ ẹkwa ndị wẹ kpayesọnmẹ ihiẹn lẹ ezigbo ẹkwa linẹni; wẹ e gizi okpokoro-egi pụ ichẹn lẹ rubi nwẹnẹ goru a kụ ị ụgwọ.

¹⁷ “ ‘Juda lẹ alị Izrẹlụ te wụzị ndị-afịa ị, e gi ọka-witi ndị Miniti lẹ ogbe figi bu ọda w'a pịngbama a kụ ị ụgwọ, ya lẹ mirin-ẹnwụn, ofugbọn-olivu lẹ ori.

¹⁸ “ ‘Damaskọsụ te wụzịkwọ onyẹ-afịa ị, e ṅọnnarịn ị ihiẹn bugbu enwẹn ẹ ọda ụnụ e mẹmẹ, yeni okẹn akụ-lẹ-ụba ị, e gi manya ndị Hẹl'bọnụ lẹ oruru alị Zaha a kụ ị ụgwọ.

¹⁹ “ ‘Kẹ ndị Danị kẹ ndị Java ẹgbẹrẹ Uzalụ te e gi ihiẹn igwe magbu enwẹn e mma lẹzi ẹgbụgba osisi kashịa lẹ mkpọgụn kalamusu e kun fuẹin e ṅọnnarịn ị ihiẹn.

²⁰ “ ‘Dedanị te wụzịkwọ onyẹ-afịa ị; ihiẹn wẹ gi a nọdị alị elu anyịnyan kẹ wẹ te gi e ṅọnnarịn ị ihiẹn.

²¹ “ ‘Alị Arebịa lẹ ndị-nze Kẹda ile te wụ ndị-afịa ị hụn y'e ṅọnnarịn atụnrụn lẹ ebulu lẹ ewu.

²² “ ‘Ndị-afịa alị Shẹba lẹ Raama te e ṅọnnarịnzịkwọ ị ihiẹn, e gi ihiẹn ile w'e gi e mẹ ihiẹn-oriri a sụọ a kụ ị ụgwọ, lẹ ihiẹn ndị ọzọ nọ kẹ goru lẹzi goru lẹ enwẹn ẹ.

²³ “ ‘Ndị alị Haranị, ndị alị Kanẹ, ndị alị Idẹni lẹ ndị-afịa rị Shẹba, Ashuru lẹ Kimadị te wụzịkwọ ndị-afịa ị,

²⁴ hụn a bịa afịa ị d'e re ẹwuru pụ-ichẹn lẹ ẹkwa bru pụ ichẹn lẹ ẹkwa ndị wẹ kpaye ihiẹn, ẹkwa wẹ gi a fụrụ oyi lẹ eriri ndị wẹ kpa ọhụnma zeni.

²⁵ “ ‘Ụgbọ-mirin uku ndị e jẹndẹ Tashishi te e bun'i ibu-afịa. Ihiẹn i nọ jun, a nyịn ntan, a nyịn imọn elu ohimin.

²⁶ “ ‘Ndị a nyannị ị e bugụọ ị ru etintin ohimin, ufere ọwụwa-ẹnyanwụn e tikpọpụ ị, tikpọtọ imẹ-imẹ ohimin.

²⁷ Ẹfe i, afịa ị lẹ ibu-afịa ị, ndị a nyann'ị ụgbọ, ndị-isi ụgbọ ị lẹ ndị e dọnzini y'ẹ, ndị a zụnị ị afịa, ndị-agha ị ile rị imẹ i lẹ ndị ile rị imẹ i wẹ ile e ruban imẹ-imẹ ohimin, ụhụọhịn ọdịdan ị.

²⁸ Ogẹn w'e gi nụ oro ndị-isi ụgbọ ị, alị ndị rị mkpẹnrẹn ohimin k'e mẹhunmẹ.

²⁹ Ndị hụ ile gi amaran ụgbọ-mirin a nyan, k'a gha ụgbọ-mirin wẹ hidan; ndị a nyan ụgbọ-mirin lẹ ndị-isi ụgbọ k'e wuzohụ akpak'alị mkpẹnrẹn mirin.

³⁰ Wẹ k'e weshi olu elu, kwannị ị ẹkwan ọda-ọda; e kpọn uzunzun e ye isi, e kpere imẹ ntụn.

³¹ Wẹ k'a kọn'ị isi, jeri ẹkwa ndị ihiẹn mẹ. Wẹ k'a kwann'ị ụya, kwan a ọda-ọda.

³² Wẹ k'a rị e goo ebe wẹ rị a kwan ị, e goo i, a sị, “Onyẹ kẹ wẹ mẹ gbachanrịn nkịtịn kẹ Taya dọn nwan gbachanrịn nkịtịn adamada ohimin?”

³³ Ibu-afịa ị te fetu ohimin e ye ndị alị bu ọda ihiẹn wẹ chọ; i te gi okẹn akụ-lẹ-ụba ị lẹ afịa ị e mẹ ndị-nze ụwa e hi ọdanfịn.

³⁴ Kanị ohimin e tikpọgụọ ị nwan tọ imẹ mirin ẹ. Ibu-afịa ị lẹ ndị ile rị imẹ i e sọngụọ ị ruban akpakalị ohimin.

³⁵ Ndị ile bi mkpẹnrẹn ohimin amarịnzị hụn w'e mẹ; ndị-nze wẹ hụ a ma piripiri; ihun wẹ efọnzini.

³⁶ Ndị-afịa rị alị ichẹn-ichẹn hụ a man'ị ụsụa; eje-ihiẹn a tụ egun e mẹọlẹ i; y'a rịkọzị.’ ”