Izikẹlụ 26 - Ika

Isi Nke Isin Kwasị Ọgụn Ihiẹn K'e Mẹ Alị Taya Rị Mkpẹnrẹn-ohimin

¹ Osolobuẹ gwa m oku ahụa nke mmanaị wẹ kpụnhan ẹnyi alị Babilọnụ, ụhụọhịn ibuzọ imẹ ifọn ibuzọ, sị,

² “Nwa-ịhịan, ebe Taya nọ sị Jerusalẹm, ‘Ẹhẹn! E tikpọgụọ wẹ i, ọnụ-mgbọn nwẹn rị alị ile mkpa! Ụzọ a kpọpụgụọnị m nwan! M k'a gha nwan ihun hụnnị ọ dan!’

³ Osolobuẹ Nwọn Ihiẹn Ile sị nwan: M k'e mẹ yụ wụ Taya ihiẹn! M wela alị bu ọda d'a maye i nọkẹ ẹbiri-ohimin.

⁴ Wẹ k'e tikpọpụ mgbọn alị Taya, tikpọpụ ebe ile rịn'a wẹ gi e dọn ẹnya; m k'a kọchanpụdẹ ẹjan rị alị Taya, ọ họdụ ọmụma mmakalaka.

⁵ Ọmụma w'a tanma ọga wẹ gi e gbu azụụn k'o k'a wụ ebẹhụ ọ rị ohimin. E kuọlẹ m'a. Ịya kẹ Osolobuẹ Nwọn Ihiẹn Ile ku. Alị ndị ọzọ k'e weri ẹ.

⁶ Ọpịa-agha k'e ri ụmụ-alị rị okpuru Taya ndị rị mkpẹnrẹn ohimin hụ. Ogẹn ahụn kẹ w'e gi marịn nị mmẹ wụ Osolobuẹ.

⁷ “Osolobuẹ Nwọn Ihiẹn Ile sị: M sikọ nwan d'a gha ẹbamịn-ugu wẹhẹ Nebukadineza eze Babilọnụ, eze rị a kị ndị-nze, n'ọ bịa d'a lụsọn Taya agha. O kịla ẹshin lẹ ụgbọ-ẹshin lẹ ndị gi ẹshin a lụ agha lẹ igwerigwe ndị-agha.

⁸ O k'e gi ọpịa-agha gbupụ ndị bisọnmẹ ụmụ-alị Taya rị mkpẹnrẹn ohimin; o k'e kehunmẹ i, a tụnnị wẹ i mkpọnyin hụ wẹ nọ a lụsọn alị nwọn mgbọn agha, nyinrin ẹ lụsọn i agha, e dọngbama akpaịn wẹ nọkẹ okpukpu ụlọ e zinmẹn'i.

⁹ O k'e gi ihiẹn o gi a kụtu mgbọn kụtu mgbọn i, gi ihiẹn-ọgụn a tikpọ ebe ile zeni i gi dọn ẹnya.

¹⁰ Ẹshin wẹ k'e bugbu enwẹn wẹ ọda, uzunzun ụkụ wẹ k'e kpọn k'e kpumẹdẹ i. Mgbọn i k'e mẹhunmẹ yeni ụzụn ẹshin-agha lẹ trọkụ-agha lẹ ụgbọ-ẹshin agha ogẹn o k'a banhan. Makẹni, ndị-agha k'a zụnbanhan imẹ i kẹ w'a zụnbanhan obodo wẹ tikpọgụ mgbọn ẹ.

¹¹ Ẹshin ẹ ndị ahụn k'a zọkpọchanrịn ọgbara-ogbe i ile; o k'e gi ọpịa-agha gbu ndị nke i, adansụn ị ndị ahụn zeni a danru alị.

¹² Wẹ k'a kwarị akụ-lẹ-ụba ị, kpọnrin ibu afịa ị; wẹ k'e tikpọpụ mgbọn i, kụkpọchanrịn ụlọ-ọma ị ile, nu ọmụma ị lẹ ogwe osisi lẹ ẹjan wẹ gi tụn ị ye imẹ ohimin.

¹³ M k'a kụsị ị ẹbụ ị; anụkọzị wẹ ukwere ụbọ ị.

¹⁴ M k'e mẹ i wụrụ ọmụma nwọnlẹni ihiẹn rị elu ẹ, ọmụma w'a tanma ọga wẹ gi e gbu azụn. Atụndọnzikọ wẹ i. Mmẹ wụ Osolobuẹ ku ẹ. Ya kẹ Osolobuẹ Nwọn Ihiẹn Ile ku.

¹⁵ “Osolobuẹ Nwọn Ihiẹn Ile sị alị Taya: Ọdịdan ị jẹnkọ d'e mẹhunmẹ alị ndị ọzọ rị ibẹka ohimin ọda-ọda — makẹni wẹ k'a rị a nụ udẹn ndị wẹ rụ ẹhụ rị a sụn wẹ gha e gbu ụnụ.

¹⁶ Ogẹn ahụn, ndị-nze alị ile rị ohimin a gha ukpo wẹ hidan, gbụ ẹkwa-nze wẹ lẹ ẹwuru rị mma wẹ ye ụsụọ, egun a wụrụ ẹkwa wẹ, akpakalị e họnrin ukpo wẹ, a mama wẹ piripiri, ihiẹn hụn mẹn'i a gụ wẹ ndụn.

¹⁷ Wẹ k'a gha a kwan ị, a sị ị: ‘Oree! Y'a lagụọ iwi, okẹn alị rị ohimin! Alị nwẹn a kpọnị, hụn te wụ dikẹn ohimin; ịya lẹ ndị bi imẹ ẹ te rọn ndị ile bi ibẹka ohimin egun.

¹⁸ Alị ndị rị ibe ohimin rị nwan a ma piripiri, nị y'a dan; alị ndị rị ibe ohimin rị nwan a tụ egun n'e wepụgụọ wẹ i.’

¹⁹ “Osolobuẹ Nwọn Ikẹn Ile sị: ogẹn m'e gi mẹ i gba okpokoro rịkẹ alị ndị hụ ịhịan bilẹni, m k'e mẹ ohimin kpumẹ i, mẹ okẹn mirin rukpumẹchanrịn ị.

²⁰ E we m'i cheni ndị lagụ mmọn rị imẹ ili, y'e buru ndị mbụ-mbụ. E mẹ m'i biri imẹ-imẹ alị, nọkẹ alị ndị wẹ tikpọ mbụ-mbụ, yụ lẹ ndị lashigụ imẹ ili a nọdị, nkewụnị y'a rịkọzị. E nwọnrin m ọghọ imẹ ndị rị ndụn.

²¹ M k'e wẹhẹni i ihiẹn-egun, nkewụnị y'a rịkọzị. Wẹ k'a chọ ị, ahụnkọzị wẹ i jẹnrin ejẹn. Ya kẹ Osolobuẹ Nwọn Ihiẹn Ile ku.”