Izikẹlụ 23 - Ika

Isi Nke Ẹtọ Kwasị Ọgụn Umunẹ Ẹbụọ Rị A Gba-ịgbaraja

¹ Osolobuẹ gwà m oku, sị,

² Nwa-ịhịan o nwọn ikpoho ẹbụọ nnẹ ohu mụ.

³ Wẹ ẹbụọ gba ịgbaraja kẹ wẹ rị alị Ijiptu; wẹ gha alị gbama ịgbaraja! A pịnghọ wẹ wẹ ẹka ẹran ebẹhụ, a pịnghọ wẹ wẹ ẹka ọnụnụ-ẹran ebẹhụ.

⁴ Ẹfan hụn kanị wụ Ohola; ẹfan nwẹnẹ ẹ wụ Oholiba. A lụrụ m wẹ, wẹ nọ mụ ikẹnnyẹ lẹ ikpoho. Ohola wụ alị Sameria, Oholiba wụ alị Jerusalẹm.

Ohola

⁵ “Ohola a nọdị okpuru m, e bi kẹ ịgbaraja, e sọn ndị rị a chanban a ẹnya, ndị Asiria, ndị odogun-agha,

⁶ wẹ ile lẹ ẹwuru bru wẹ a la ẹnya, ndị-isi ndị-isi, ndị ndu-agha ndị ndu-agha, ikorọbịa pu mma, hụn e nyin ẹshin.

⁷ O we ẹhụ a yechanrịn wẹ: ụmụ Asiria ndị hụ rịgbu enwẹn wẹ mma, gi wẹ ile ọ rị a gbasọn lẹ mmọn wẹ mẹrụ enwẹn ẹ.

⁸ Ohola ahapụnị ịgbaraja hụ ọ gbama imẹ alị Ijiptu, ebẹhụ ikẹnnyẹ nọ sọn ẹ ranhịn, wa a ụkụ, pịn a ẹka ọnụnụ ẹran, gba a k'ọ dọn gụn wẹ.

⁹ “Ya m nọ mẹ ẹ kpaban ẹka ndị ahụn ya lẹ wẹ rị a sụọ, ẹka ndị alị Asiria hụ ọ rị a gbasọn.

¹⁰ Wẹ nọ gba a ọtọ, kpọnrin ụmụ a ikẹnnyẹ lẹ ikpoho, gi ọpịa-agha gbu ẹ, o họnrin ihiẹn ikpoho gi e ku oku; ẹrịra k'o dọn narịn afụnfụn furun'ẹ ẹka ndị alị Asiria hụ.

Oholiba

¹¹ “Oholiba nkẹ a hụnghọ elu nwẹnẹ ẹ wụ Ohola, kanị ihiẹn-ọlịlẹnya nke ẹ a karị, ịgbaraja nke ẹ a karị nke nwẹnẹ ẹ.

¹² Ya nwẹn nọzịkwọ gbasọnmẹ ndị Asiria: kẹ ndị-isi wẹ kẹ ndị ndu-agha wẹ kẹ ndị-odogun agha wẹ, wẹ lẹ ekikẹn wẹ rigbu enwẹn ẹ mma, ndị e nyinni alị Asiria ẹshin, ikorọbịa Asiria pu mma.

¹³ M nọ hụn a nị ya nwẹn e mẹrụzịkwọ enwẹn ẹ, nị wẹ ẹbụbụọ wụ ohu.

¹⁴ “Oholiba nọdẹ gbacheni ịgbaraja: Ọ hụn ikẹnnyẹ wẹ seye ụsụọ-ẹjan, ndị Kal'di wẹ gi ufie se,

¹⁵ wẹ lẹ akpụkpọ-ukun rịsọnmẹ wẹ ukun lẹ okpu wẹ rị a yọtuni; wẹ ile nọsọnmẹ kẹ ndị isi-agha, wẹ nọchanrịn kẹ ndị-agha Babilọnụ alị Kal'di gi ẹshin a lụ agha.

¹⁶ Hụn o gihụ hụn wẹ, wẹ nọ chanban a ẹnya ọda-ọda, ọ nọ zi ozi jẹnni wẹ imẹ alị ndị Kal'di.

¹⁷ Ya ndị Babilọnụ nọ gha alị wẹ wụ Kal'di bịa d'e kunrun ẹ elu-bẹdi, sọn ẹ ranhịn, gi ịgbaraja nke wẹ mẹrụ a. O mẹgụ, ize wẹ nọ zemẹ, ọ nọ jụ wẹ.

¹⁸ Ọ gba ịgbaraja hụ ọda-ọda, ghọsị ọtọ a, m nọ gi iwe jụ a kẹ m dọn jụ nwẹnẹ ẹ.

¹⁹ Ọ gbasọnmẹ ịgbaraja hụ d'e rudẹ ebe ọ nọ nyanhanzị n'ọ gbaghọ ịgbaraja imẹ Ijiptu k'ọ rị okoro, ọ ghan'a.

²⁰ Ọ nọ gụnma a ọda-ọda nị ndị Ijiptu gba a, ndị hụ ẹhụ-okẹnnyẹ wẹ nọ kẹ nke jaki, ndị a nyụn ohe nọkẹ nke ẹshin.

²¹ Eje-obibi i bi kẹ ị rị okoro nọ dama ị, ẹka hụ ndị Ijiptu a pịn ị ọnụnụ ẹran ị rị a kpụ ogẹn hụ.

²² “Oholiba, lee nwan ihiẹn Osolobuẹ Nwọn Ihiẹn Ile ku: M sikọ nwan d'a kpọli ndị yụ lẹ wẹ te gba a sụọ, ndị hụ ị jụgụ, e mẹ m wẹ maye i azụụn ile;

²³ m wela ndị Babilọnụ lẹ ndị alị Kal'di ibe wẹ ndịnị: ndị Pẹkọdụ lẹ ndị Shụa lẹ ndị Kụa. Ndị Asiria ile k'e sọnhẹn wẹ, ikorọbịa pu mma hụn wụsọnmẹ ndị-isi, ndị-ndu agha lẹ ndị ọzọ nwọn ọkwa — wẹ ile e nyinchanrịn ẹshin.

²⁴ Wẹ k'e gi ihiẹn-ọgụn lẹ ụgbọ-ẹshin agha lẹ trọkụ-anyịnyan lẹ igunrun ndị agha ghasọnmẹ alị ichẹn-ichẹn bịa buruhẹ i; wẹ k'e gi akpaịn-uku lẹ akpaịn-nta lẹ okpu-agha igwe gha azụụn ile maye i. M k'e we i ye wẹ kin ikpe, e ye wẹ i afụnfụn kẹ wẹ e ye.

²⁵ M k'e bu ẹnya rị a fụnị m zinmẹ i, mẹ wẹ gi ọnụma sọn i, e bepụ wẹ i imi lẹ ntịn, gi ọpịa-agha gbupụ hụn họdụnị. Wẹ k'a kpụnrụn ụmụ ị ikẹnnyẹ lẹ ikpoho, gi ọkụn dụnpụ ndị nke i k'a họdụnị.

²⁶ Wẹ k'a gbụnarịnzị ị ẹkwa, weri ihiẹn-mma ị ile.

²⁷ Ẹrịra kẹ m'e dọn kụsị ị eje-obibi i lẹ ịgbaraja ahụn ị gbama k'ị rị alị Ijiptu. Ndịnị rị a chanban ị ẹnya achanbankọzị ị ẹnya; y'a nyanhankọzị alị Ijiptu kaka.

²⁸ “Osolobuẹ Nwọn Ihiẹn Ile sị: ‘M'e d'e bu i che ẹka ndị ize wẹ e ze i, ẹka ndị hụ ị jụ.

²⁹ Wẹ k'e gi iwe i rị e weni wẹ mẹshi i ikẹn, kpọnrinchanrịn ihiẹn i ile. Wẹ k'a gbama ị ọtọ, gbama ị ẹka, eje-obibi i lẹ ịgbaraja ị a wa.

³⁰ Ịyụ buhẹni enwẹn i ihiẹnni ile makẹni i gbasọn alị ichẹn-ichẹn nọkẹ ịgbaraja, gi mmọn wẹ mẹrụ enwẹn i.

³¹ Y'a gụnọlẹ agụngụn Ohola nwẹnẹ i; m sikọ nwan d'e bu mkpu afụnfụn m ye ẹ ra che yụ nwẹn ẹka ra.’

³² “Osolobuẹ nwọn ihiẹn ile sị: Ị k'a ra mkpu manya nwẹnẹ i ra, mkpu ahụn shịanị, mi; o k'e buhẹni i nsọngbu lẹ ịfa, makẹni ihiẹn rị a ọhụnma-ọhụnma.

³³ Ị k'a ra tụ, kwan ẹkwan kwanjun ẹfọ; mkpu ntikpọ lẹ ụya rọ, mkpu hụn Sameria nwẹnẹ i ra.

³⁴ Ị k'a ra a, rakọrị; i k'a kụkpọpụ a, dọkapụdẹ ẹran ị. E kuọlẹ m'a. Ịya kẹ Osolobuẹ Nwọn Ihiẹn ile ku.

³⁵ “Osolobuẹ Nwọn Ihiẹn ile sị nwan: Ebe o mẹni y'a zọgụọ m, nu m ye nkọ, ị k'a tarịrị afụnfụn eje-ughẹrẹ i lẹ ịgbaraja ị.”

³⁶ Osolobuẹ sị m, “Nwa-ịhịan, y'a makọ Ohola lẹ Oholiba ikpe, gwapụ wẹ arụ wẹ mẹ?

³⁷ A zọgụọ wẹ ụkụ ye ọfịa; ẹdeke rịzịkwọ wẹ ẹka: ụkụ wẹ zọye ọfịa wụ ife-mmọn; ẹdeke rị wẹ ẹka wụ ẹdeke ụmụ wẹ wẹ gbuni mmọn.

³⁸ Ọzọ wẹ mẹ m wụ ọnwan: wẹ mẹrụ Ụlọ-nsọ m ụhụọhịn hụ, mẹrụ Ogẹn Ezumikẹn m tumẹsọnmẹni wẹ.

³⁹ Kẹ wẹ gbugụnị mmọn wẹ ụmụ wẹ ụhụọhịn hụ, e shi wẹ imẹ Ụlọ-nsọ m, mẹrụ a. Ihiẹnni kẹ wẹ mẹdẹ imẹ Ụlọ m!

⁴⁰ “Ọzọ, e zighọdẹ wẹ ozi jẹn alị teni d'a kpọhanị wẹ ikẹnnyẹ ndị alị hụ, a bịa wẹ, wẹ nọ wụnị wẹ ẹhụ, gi ihiẹn gba ẹnya, yiri ihiẹn-mma ichẹn-ichẹn,

⁴¹ danchanpụ elu oche magbu enwẹn ẹ mma, ẹhụ teburu i dọnmẹgụ ọhụnma-ọhụnma, gi nsẹnsi m lẹ udẹn m m'ẹ e kun feịn.

⁴² “Igunrun ẹfọ rị a sụọ ụsụọ e jun imẹ ẹ, a zụn ụzụn, igunrun ikẹnnyẹ lẹ ndị manya wẹ gha atụ kpọnhẹn; ikẹnnyẹ ndịnị nọ yimẹ wẹ ihiẹn-ẹka, e kpumẹ wẹ wẹ okpu ma mma.

⁴³ M nọ sị ‘Wẹ sikọ nwan d'e sọnzi hụnnị ughẹrẹ gbugụ ranhịn.’

⁴⁴ Wẹ nọ sọn wẹ ranhịn kẹ ikẹnnyẹ e mẹ ịgbaraja, ẹrịra kẹ wẹ sọn Ohola lẹ Oholiba, ikpoho ndịnị e bi k'ọ sụọ wẹ, ranhịn.

⁴⁵ Kanị, ndị ezi-omumẹ k'a ma wẹ ikpe w'a ma ikpoho zọ ụkụ ye ọfịa lẹ ndị gbu ịhịan, makẹni wẹ wụ ikpoho zọ ụkụ ye ọfịa lẹ ndị ẹdeke rị ẹka.

⁴⁶ “Lee ihiẹn Osolobuẹ Nwọn Ihiẹn Ile ku: kịha nị nị wẹ igunrun ịhịan nị wẹ mẹ wẹ ihiẹn; bu wẹ che ọnọdị a tụ egun, mẹ wẹ kwanarịn wẹ ihiẹn wẹ.

⁴⁷ Igunrun hụ k'a ma wẹ ọmụma, gi ọpịa-agha begbu wẹ; wẹ k'e gbu ụmụ wẹ ikẹnnyẹ lẹ ikpoho, dụnpụ ụlọ wẹ ọkụn.

⁴⁸ “Ya kẹ m'e gi kụsị eje-obibi rị alị Izrẹlụ, ikpoho ile e gi ẹ kpachanpụ ẹnya, ebikọ wẹ eje-obibi ụnụ.

⁴⁹ Ụnụ k'a narịn afụnfụn eje-obibi ụnụ lẹ mmọn ndị hụ ụnụ fe. Ogẹn ahụn, ụnụ a marịn nị mmẹ wụ Osolobuẹ Hụn Nwọn Ihiẹn Ile.”