Izikẹlụ 22 - Ika

Isi Nke Ẹbụọ Kwasị Ọgụn Ihiẹn Ndị Jerusalẹm Mẹ Osolobuẹ Gi Tikpọ A

¹ Osolobuẹ gwa m oku, sị m,

² “Nwa-ịhịan, y'a makọ a ikpe? Y'a makọ obodoni wẹ nọ e gbu ịhịan ikpe?! Gwapụchanrịn wẹ nwan arụ ile wẹ rị e mẹ imẹ ẹ.

³ Sị: Osolobuẹ Nwọn Ihiẹn Ile sị: Obodo hụn gi ịhịan wẹ rị e gbu imẹ ẹ e buhẹni enwẹn ẹ ntikpọ; e gi mmọn wẹ rị a kpụ imẹ ẹ e mẹrụ enwẹn ẹ,

⁴ ikpe a magụọ ị yeni ịhịan i gbu, y'a rụgụọ yeni mmọn ndị hụ ị kpụ. Y'e wezụnhangụọ ogẹn i; ogẹn i e rugụọ. E mẹgụọ m'ị wụrụ ihiẹn alị ndị ọzọ a mụ ẹmụ, ihiẹn alị ile a mụ ẹmụ.

⁵ Kẹ ndị nọkunmẹni i kẹ ndị rị ebe teni k'a mụ ị ẹmụ. Obodo eje-ẹfan! Obodo-isusu!

⁶ “Lee ndị-isi Izrẹlụ, onyẹ-onyẹ imẹ wẹ hụ e gi ọkwa a a kpa ikẹn imẹ i, e gbu ịhịan.

⁷ Nẹdi lẹ nnẹ hụ a na mkpari imẹ i; wẹ hụ e mẹgbu abịamabịa imẹ i, e mẹja ndị nwọnlẹni nẹdi lẹ ikpoho di wẹ nwụn.

⁸ Y'e mẹrụchanrịngụọ ihiẹn ndị rị m nsọ, mẹrụchanrịn Ogẹn Ezumikẹn ichẹn-ichẹn m kayeni ụnụ.

⁹ Wẹ hụ imẹ i e buokin ịhịan ọnụ ebe wẹ n'ọ a chọ isi w'e gbu; ndị rị imẹ i hụ e ri ihiẹn-oriri ụlọ-mmọn ndị hụ rị elu ugu; wẹ hụ e mẹ arụ ichẹn-ichẹn imẹ i.

¹⁰ Ịhịan lẹ nwunyẹ nẹdi ẹ hụ a ranhịn imẹ i; ịhịan hụ imẹ i e mẹ mgba okpoho rị a sọ ezi.

¹¹ Imẹ i, onyẹ ohu hụ e sọn nwunyẹ ibe ẹ e mẹ arụ, hụn ẹbọ hụ e sọn nwunyẹ-nwa a e mẹ arụ — o tuni ihiẹn anaị; onyẹ ọzọ hụ e sọn nwẹnẹ ẹ okpoho a ranhịn, nwa nẹdi ẹ.

¹² “Ịhịan hụ imẹ i a narịn ọgị-azụụn lẹ egho-azụụn e gbu ibe ẹ; a na okẹn-ọmụnịnwa a chọ okẹn erere, e ri ibe ụnụ erere, e mẹgbu wẹ, ụnụ a zọ mmẹ nwẹn. Ịya kẹ Osolobuẹ Nwọn Ihiẹn Ile ku.

¹³ “Eje-ẹnya kẹ m rị e lee i makẹ eje-erere ị rị e ri lẹ ẹdeke ndị wẹ gbu imẹ i!!

¹⁴ I ro n'i k'a hụn ndụn wuzo? I ro nị ẹka ị k'a s'ẹka zụọ ị ụhụọhịn ahụn? Mmẹ wụ Osolobuẹ e kuọl'a; m k'e mẹ ẹ.

¹⁵ M k'e fe ụnụ ye imẹ igunrun ndị alị ọzọ rị ichẹn-ichẹn, fe ụnụ ye alị ichẹn-ichẹn; m k'e wepụchanrịn ụrụ ị.

¹⁶ I mẹrụgụ enwẹn i ẹnya alị ndị ọzọ kẹ y'a nọ marịn nị mmẹ wụ Osolobuẹ.”

¹⁷ Ya Osolobuẹ nọ sị m,

¹⁸ “Nwa-ịhịan, ebọn Izrẹlụ e họnringụọ nsịn-igwe ẹnya m; wẹ ile nọ nwan kẹ nsịn-igwe onyẹ a kpụ siliva a latọ imẹ ọkụn — hụn kọpa lẹ igwe-ogbogoro lẹ igwe-mmaka lẹ igwe-lẹdi rịsọnmẹ. Onwọnzini ihiẹn wẹ wụ karị nsịn-siliva.

¹⁹ Ufiri ẹ, Osolobuẹ Nwọn Ihiẹn Ile sị nwan: ‘Ebe o mẹni ụnụ ile a wụrụgụọ nsịn-igwe w'a dụnpụ ọkụn, m k'e kpọngbama ụnụ ye imẹ Jerusalẹm

²⁰ kẹ w'e kpọngbama siliva lẹ igwe-kọpa lẹ igwe-mmaka lẹ igwe-lẹdi lẹ igwe-ogbogoro e kpọnye okẹn ọkụn, a fụnwun wẹ ọkụn, gi ẹ rịnranpụ wẹ. Ẹrịra kẹ m k'a dọn gi iwe lẹ ọnụma m kị ụnụ che imẹ Jerusalẹm, rịnranpụ ụnụ.

²¹ M k'a kịgbama ụnụ, fụkpu ụnụ ọnụma ọkụn m, ụnụ a rịnranpụ imẹ ẹ.

²² Ụnụ jẹnkọ d'a rịnranpụ kẹ siliva a rịranpụ imẹ okẹn ọkụn, ogẹn hụ kẹ ụnụ k'a marịn nị mmẹ, Osolobuẹ, gi ọnụma m mẹ ụnụ ihiẹn.’ ”

²³ Osolobuẹ gwa m oku, sị m,

²⁴ “Nwa-ịhịan, sị alị hụ, ‘Alị rụnị wẹ dọnzilẹni k'ị wụ, alị mirin rịlẹni e zueye, makẹni ọnụma m e kunrungụọ a.’

²⁵ “Ndị-amụma rịn'a a kịgbamagụọ, e mẹ kẹ ẹwọrọ rị e dẹnni, a dọrinrin anụ o gbu; wẹ hụ e gbu ịhịan; wẹ hụ e buru ihiẹn rị mma lẹ ihiẹn rị mkpa; wẹ hụ e gbunarịn ikpoho bu ọda rịn'a di wẹ.

²⁶ “Ndị nchụn-ẹjan a e wiwichanrịngụọ Iwu m rị wẹ ẹka, mẹrụ ihiẹn m ile rị nsọ; onwọnzini ihiẹn rị nsọ lẹ ihiẹn-mmaka ẹnya wẹ; w'a ra kụzizi n'o nwọnghọ ihiẹn rụnị lẹ ihiẹn rụlẹni; achọzịnị wẹ nị wẹ marịn nị m tumẹsọnmẹ Ogẹn Ezumikẹn ichẹn-ichẹn, wẹ hụ e gi wẹ ile e budan m imẹ igunrun wẹ.

²⁷ “Ndị-isi rịn'a rịsọnmẹ kẹ eje-anụ wofu ndị rị a dọwa anụ wẹ gbu: wẹ hụ e gbu ịhịan a la iwi kẹni wẹ ri ihiẹn rulẹni wẹ.

²⁸ Ndị-amụma nkẹ hụ e gi ịhụn-ọhụn ntụ lẹ ịgba-ẹfa ntụ a kwadọn wẹ, e tekin ẹ n'ọ la ẹnya; a sị wẹ, ‘Osolobuẹ Nwọn Ihiẹn Ile sị,’ bụ Osolobuẹ asịnị wẹ.

²⁹ “Ndị alị hụ a bịangbu ịhịan ọbịangbu-ọbịangbu, a narịn ịhịan ihiẹn ẹ; wẹ hụ e mẹgbu ndị igbẹnnyẹ lẹ ndị elu rị a fụ, a bịangbu abịamabịa, a narịn wẹ ihiẹn runi wẹ.

³⁰ “A chọgbamagụọ m imẹ wẹ nị m hụn akpụ onyẹ ohu, hụn nkẹ a tụnkin mgbọnni, hụn nkẹ e wuzoni alị ihun m dọnzi ihiẹn makẹ m gha e tikpọ a, onwọnni onyẹ m hụn.

³¹ Ya kẹ m nọ nwan hu olulu m kpu wẹ kẹ mirin, gi ọnụma m hụn a dụn kẹ ọkụn tikpọ wẹ la iwi; e mẹgụọ m wẹ gi isi wẹ buru ihiẹn ile wẹ mẹ. Ya kẹ Osolobuẹ Nwọn Ikẹn Ile ku.”