Izikẹlụ 2 - Ika

Isi Nke Ẹbụọ

¹ Olu hụ sị m, “Nwa-ịhịan, wuzo ọtọ, nị m gwa ị oku.”

² Hụn ahụn ọ rị e ku oku, Mmọn Osolobuẹ nọ ban imẹ m, weli m elu; m nọ nụ ihiẹn ọ rị a gwa m.

³ Ọ sị m, “Nwa-ịhịan, m zikọ ị d'e kunrun ndị Izrẹlụ, alị nnupụ-isi hụ, hụn rị e feni m isi; wẹ hụ a pa oku m d'e ru tannị kẹ ndị nẹdi wẹ dọn mẹ.

⁴ Ndị isi-ikẹn obi wẹ ze eze kẹ m zikọ ị d'e kunrun. Ị k'a sị wẹ, ‘Lee ni ihiẹn Osolobuẹ nwọn ihiẹn ile ku.’

⁵ Kẹ wẹ gọn ntịn kẹ egọnni wẹ, makẹni wẹ wụ ebọn nnupụ-isi, wẹ jẹnkọ d'a marịn nị onyẹ-amụma a nọgụọ imẹ igunrun wẹ.

⁶ “Kanị, ịyụ, nwa-ịhịan, atụkwọlẹ egun wẹ mọbụ oku-ọnụ wẹ — ọsụọn'a nị wẹ wụ ogun-lẹ-ọkịnkan fihunmẹn'i, n'i igunrun akpị kẹ i bi imẹ ẹ. Anịkwọlẹ oku-ọnụ wẹ rọn i egun mọbụ lemẹ wẹ ẹnya ihun tụma egun — emẹlẹ ẹ, nị ebọn nnupụ-isi kẹ wẹ wụ.

⁷ Ị k'a gwarịrị wẹ ihiẹn m ku, wẹ gọn ntịn egọnni wẹ, makẹni ndị nnupụ-isi kẹ wẹ wụ.

⁸ “Yụ nwẹn, nwa-ịhịan, gọn ntịn ihiẹn m rị a gwa ị. Enupụkwọlẹ isi nọkẹ ebọn nnupụ-isi ahụn. Shịapụ nwan ọnụ n'i ri ihiẹn m sikọ d'e ye i.”

⁹ Ya m nọ lee ẹnya, e lee ẹka ohu tịnpụ zinmẹ m; ibe ẹkụkwọ hụ a.

¹⁰ Ọ nọ shịapụnị m'a; wẹ deye ẹ ihiẹn ihun lẹ azụụn. Ihiẹn wẹ deye ẹ wụ ihiẹn-ẹkwan lẹ ụya lẹ nsọngbu.