Izikẹlụ 16 - Ika

Isi Nke Mmisin Jerusalẹm, Okpoho Ẹnya Rịlẹni Ụzọ Ohu

¹ Osolobuẹ nọ sịzị m,

² “Nwa-ịhịan, gwapụ Jerusalẹm obibi ile rụnị ọ rị e bi.

³ Sị wẹ, ‘Osolobuẹ Nwọn Ihiẹn Ile rị a sị Jerusalẹm: Onyẹ alị Kenaanị k'ị wụ; Kenaanị kẹ wẹ nọzị mụ ị! Nẹdi ị wụ onyẹ alị Amọ; nnẹ ị wụ onyẹ alị Hẹti.

⁴ “ ‘O mẹ nke ọmụmụ ị — ụhụọhịn wẹ mụ ị, ebeni wẹ i otumẹ, egini wẹ mirin wụ ị, eteni wẹ i nnu kẹ w'e te nwa-ọhụn, afụmanị wẹ i ẹkwa.

⁵ Onwọnni onyẹ lee i ẹnya ihun mọbụ mẹdẹ omikẹn i mẹni i hụn ọwụlẹ imẹ ihiẹn ndịnị. A ma wẹ i ye ogbe, makẹni wẹ jụ ị ajụ ụhụọhịn wẹ mụ ị.

⁶ “ ‘Ebe m ghafekọ, m nọ hụn ị ebe ị rị imẹ ẹdeke e se ụkụ lẹ ẹka; ebẹhụ i dinẹ imẹ ẹdeke, m nọ sị ị, “Ị k'a rị ndụn!”

⁷ M nọ mẹ i du, lekẹ ihiẹn rị imẹ ugbo. Ị nọ himẹ, sue, wụrụ ihiẹn-mma pụ ichẹn hụn mma a zu oke. Ị nọ kpụ ẹran; ntutu i nọ suepụ. Kanị, ị gbahụkwọ ọtọ, onwọnni ihiẹn i yi ẹhụ.

⁸ “ ‘Kẹ m ghafekọzị ebe ị rị, m nọ hụn nị y'e rugụọ nwagbọọ. M nọ setịnpụ ẹwuru m yi, kpumẹ i, kpumẹ ọtọ ị; m nọ kwe i nkwa, gi ẹ kwọngbama mmẹ lẹ yụ. Ịya kẹ mmẹ wụ Osolobuẹ Nwọn Ihiẹn Ile ku. Ẹrịra k'ị dọnmẹ họnrin nke m.

⁹ “ ‘Ya m nọ gi mirin wụ ị, chanchanpụ ị ẹdeke, te i udẹn.

¹⁰ M nọ yimẹ i ezigbo ẹkwa wẹ kpayesọnmẹ ihiẹn ma mma, yimẹ i ezigbo akpụkụ, gi ezigbo ẹkwa linẹni fụma i isi, gi ẹkwa ṅanrannị kpumẹ i ihun.

¹¹ A chọ m'ị mma: yimẹ i ihiẹn-ẹka, yimẹ i ihiẹn-olu,

¹² yimẹ i ọla-imi lẹ ihiẹn-ntịn; e kpumẹ m'i okpu lekẹ eze.

¹³ Ị nọ gi goru lẹ siliva chọ enwẹn i mma, e yi ezigbo ẹkwa linẹ lẹ siki lẹ ẹkwa wẹ kpaye ihiẹn ichẹn-ichẹn ma mma. Ị hụ e ri ezigbo ọka wẹ gweriẹn lẹ mirin-ẹnwụn lẹ ofigbọn-olivu. Ị nọ ma mma ọda-ọda, pali, nọchanrịn kẹ alasị.

¹⁴ Ẹfan ị nọ kpọgbarị alị ile rị ichẹn-ichẹn, makẹni y'a mmaka mma-ẹhụ yeni ọghọ m ye i. Ya kẹ mmẹ wụ Osolobuẹ Nwọn Ihiẹn Ile ku.

¹⁵ “ ‘Kanị ị nọ gi mma-ẹhụ ị dọn ẹnya, gi ufiri ẹfan ị rị a kpọnị gụnma agụngụn ịgbaraja. E we ẹhụ ị e ye onyẹ ọwụlẹ ghafekọnị n'o mẹ mgba ị.

¹⁶ Y'a nọ ẹkwa ị weri hụn i gi mẹmẹrinsọnmẹ ụlọ-mmọn ma mma, nọ imẹ wẹ gbasọnmẹ ịgbaraja hụ ị rị a gba. Ihiẹn nọ ẹrịra efuruni hụn e mẹni; efuruni wẹ hụn e mẹni kaka!

¹⁷ Y'a nọzịghọ ihiẹn-mma ị hụn m gi goru m lẹ siliva m mẹmẹ ye i, weri, gi wẹ kpụrụsọnmẹ mmọn nọsọnmẹ kẹ ikẹnnyẹ, gi wẹ gbasọnmẹ ịgbaraja hụ ị rị a gba.

¹⁸ Y'e weri ẹwuru i ndị hụ wẹ kpayesọnmẹ ihiẹn ma mma yimẹ mmọn ndị hụ ị kpụ, e gi udẹn-olivu m lẹ nsẹnsi m a rụa wẹ.

¹⁹ Y'e werizi ihiẹn-oriri m ye i, ezigbo ọka wẹ gweriẹn lẹ ofugbọn-olivu lẹ mirin-ẹnwụn hụn m ye i e ri, kwayesọnmẹni wẹ ese n'o kuntụ wẹ. Mmẹ Osolobuẹ Nwọn Ihiẹn ile rị e ku.

²⁰ “ ‘Y'e weridẹ ụmụ ị ikẹnnyẹ lẹ ikpoho hụn ị mụnị m, gi wẹ chụnyeni mmọn ndị hụ ị rị e fe ẹjan nị wẹ ri. Ịgbaraja ị gba ehini i?

²¹ Ị nọ gbu ụmụ m gi chụnyeni mmọn ẹjan.

²² Hụn ahụn ile ị rị e bi obibi rụnị, a gba ịgbaraja, y'a nyanhandẹni ogẹn hụ i gi rị nwata; ogẹn hụ i gi gba ọtọ, gba ẹhụ oghe, dinẹ imẹ ẹdeke i, e se ụkụ lẹ ẹka.

²³ “ ‘Osolobuẹ Nwọn Ihiẹn Ile sị, “O k'a jọ ị njọ! O k'a jọ ị njọ!!” Ị hụ e bi eje-obibi hụ ile i rị e bi,

²⁴ ị nọ rụnrụn ụlọ-mmọn, tụnsọnmẹ ebe wẹ nọ a rụa mmọn ebe ile alị n'e zu.

²⁵ Y'a rụn ụlọ-mmọn ị ye isi-ụzọ ile, e mẹrụ mma-ẹhụ ị, a shịapụ ụkụ a tọnị onyẹ ọwụlẹ ghafekọnị, ịgbaraja ị hụ a waye.

²⁶ Y'e bu ẹhụ ị ye ndị Ijiptu lekẹ ịgbaraja, ndị ahụn bikunmẹni i ihiẹn a lagbu ẹnya; ị hụ e gi ịgbaraja ị a kpasu m iwe.

²⁷ Ya haịn m gi nwan setịnpụ ẹka mẹ i ihiẹn, tikpọ alị ị, belụa ihiẹn i, we i che ẹka ndị iwe i e we, ndị alị Filistia hụn eje-obibi ịgbaraja ị e mẹdẹ ifẹnrẹn.

²⁸ Y'e buzikwọ ẹhụ ị ye ndị alị Asiria makẹni ẹfọ a ra jun i; y'e mẹgụ ọhụn, ẹfọ ejunzikwọn'ị.

²⁹ Ya ị nọzị gba ịgbaraja ị buru ndị alị afịa, ndị alị Kal'di wụ Babilọnụ, kanị ọhụn ejunzikwọn'ị ẹfọ.

³⁰ “ ‘Osolobuẹ nwọn ihiẹn Ile sị ị lee nwan nị ihiẹn ndịnị i mẹ, agụngụn ịgbaraja ifẹnrẹn rịlẹni ẹnya ị rị a gụn, a mụmarịngụọ ị, nke wụnị y'ara sazị ẹka kwọndọn enwẹn i,

³¹ ị hụ a rụn ụlọ-mmọn ị e ye isi-ụzọ ile, e tumẹsọnmẹ ebe wẹ nọ a rụa mmọn e ye ebe ile alị n'e zu. Ịgbaraja nke i jọgbudẹ enwẹn ẹ nị y'a nadẹni egho lekẹ ịgbaraja!

³² “ ‘Heuu, okpoho ẹnya rịlẹni ụzọ ohu hụn gi ndị ọzọ a nọkin ẹnya di ẹ!

³³ Ịgbaraja ile a na egho, kanị yụ nwẹn e yedẹ ndị e mẹ mgba ị ihiẹn, e gi ihiẹn i a rịọ wẹ, wẹ hụ a gha azụụn ile a chọha ị.

³⁴ Ịgbaraja ị rị a gba anọnị kẹ nke ndị ọzọ makẹni ẹlẹ w'a gbasọn i agbasọn. Y'a rịkẹmẹkẹ ichẹn, makẹni ịyụ nwẹn a kụ ụgwọ, onwọnni hụn w'a kụ ị.

³⁵ “ ‘Yụ wụ ịgbaraja, gọn nwan ntịn ihiẹn Osolobuẹ rị e ku!

³⁶ Osolobuẹ Nwọn Ihiẹn Ile sị: Makẹni y'e kwọndọnzini enwẹn i lẹ ufiri ọtọ ị ndị yụ lẹ wẹ rị a sụọ hụn ebe ị rị a ghẹrẹ lẹ ufiri mmọn ị ndị hụ e ze m ize lẹ ẹdeke mmụ ị i gbuni wẹ,

³⁷ m k'e wegbama nwan ndị hụ ile yụ lẹ wẹ wị a sụọ, ndị ahụn ihiẹn i te a sụọ, kẹ ndị ihiẹn w'a sụọ ị kẹ ndị e ze i ize. M k'a gha azụụn ile wegbama wẹ d'a maye i, a nọ m idẹnya wẹ gba ị ọtọ, a hụn wẹ ọtọ ị.

³⁸ M k'a hangbu i eṅẹn lekẹ okpoho zọ ụkụ ye ọfịa lẹ onyẹ gbu ịhịan; m k'e gi olulu lẹ ẹnya hụ rị a fụnị m gbugwarị ị.

³⁹ E we m'i ye ndị yụ lẹ wẹ gba a sụọ, e tikpọ wẹ ụlọ-mmọn ị lẹ ebe ile ị nọ a rụa mmọn; a gbụnarịn wẹ i ẹkwa ị, kpọnrin ihiẹn-mma ị ndị ahụn ma mma, hatu yụ lẹ ọtọ.

⁴⁰ Wẹ k'a kịha igunrun d'a kpụ ị gbu, wẹ k'a ma ị ọmụma, gi ọpịa-agha jakịka ị.

⁴¹ Wẹ k'a dụn ụlọ ndị rị imẹ ị ọkụn, nọ idẹnya ikpoho bu ọda ye i afụnfụn. M k'e mẹ i gbabehi ịgbaraja, mẹ i kụbehi ndị hụ yụ lẹ wẹ gba a sụọ ụgwọ.

⁴² Ogẹn ahụn olulu m rị e gi e sọn i a rọ, ẹnya rị a fụnị m a fụbehi m. E mẹ m jụụ, ize e zebehi m.

⁴³ “ ‘Makẹni y'a nyanhannị ihiẹn m mẹni i kẹ i rị nwata, kama, ị nọ gi eje-ihiẹn ndịnị wẹ kpasu m iwe, mmẹ nwẹn k'e mẹ i gi isi buru wẹ ile. Y'a gbagụọnị eje-ịgbaraja cheni arụ ile i mẹ? Ya kẹ mmẹ wụ Osolobuẹ Nwọn Ihiẹn Ile ku.

⁴⁴ “ ‘Ndị a tụ ilu jẹnkọ d'a tụn'ị iluni, “Ẹhụhụọ ewu kpari kẹ nwa a a kpari.”

⁴⁵ Makẹni, yụ lẹ nnẹ i wụ ohu, nnẹ i hụn jụ di ẹ lẹ ụmụ a. Ị nọzịkwọ kẹ umunẹ i ikpoho hụn jụ di wẹ lẹ ụmụ wẹ. Nnẹ i wụ onyẹ Hẹti, nẹdi wụ onyẹ Amọ.

⁴⁶ Nwẹnẹ i okpoho-kanị wụ Sameria hụn ya lẹ mmụ a bi i ẹbamịn-ugu; nwẹnẹ i okpoho hụn-nta wụ Sodọm hụn ya lẹ mmụ a bi i ẹbamịn ndịdan.

⁴⁷ Ẹlẹdẹ n'i sọn nzọmụkụ wẹ bi eje-obibi sụọ, o bieni ebie y'e mẹkarịgụọ wẹ eje-ihiẹn.

⁴⁸ Ma isi m, mmẹ wụ Osolobuẹ Nwọn Ihiẹn Ile sị ị nị nwẹnẹ i okpoho wụ Sodọm lẹ mmụ a ikpoho emẹruni ihiẹn yụ lẹ mmụ ị ikpoho mẹ.

⁴⁹ “ ‘Lee njọ nwẹnẹ i okpoho wụ Sodọm mẹ: Ya lẹ mmụ a ikpoho a pache apache, e rikarị enwẹn wẹ, e bi kẹ sị nsọngbu arịa — kanị eyenini wẹ ndị igbẹnnyẹ lẹ ndị elu rị a fụ ẹka.

⁵⁰ Wẹ e mẹkarị enwẹn wẹ, e mẹ ihiẹn rụnị ẹnya m. A hụn m ihiẹn wẹ rị e mẹ, m nọ chụpụ wẹ.

⁵¹ Sameria emẹruni ahanmahan njọ ị: y'e mẹkarịgụọ wẹ arụ mẹcheni. Y'e gigụọ ihiẹn ị rị e mẹ kpọ umunẹ-i-ikpoho ndịnị ndị ezi-omumẹ.

⁵² Yụ nwẹn nkẹ, buru nwan ifẹnrẹn i, ebe o mẹni y'e gigụọ njọ ị ile hụn ka nke wẹ njọ kuyeni mmunẹ i. Uwẹ ka ị nwan mma. Ifẹnrẹn ya mẹ i nwan; buru ịfa ị, makẹni y'e mẹgụọ mmunẹ i nọ nwan kẹ ndị ezi-omumẹ.

⁵³ “ ‘K'osilẹrị, m k'e mẹ n'ọ rịzịnị Sodọm lẹ ụmụ a mma, mẹ n'ọ rịzịnị Sameria lẹ ụmụ a mma, mẹzikwọ n'ọ rịzịnị yụ nwẹn rị etintin wẹ mma,

⁵⁴ kẹni ị hụn ụzọ fa, ifẹnrẹn e mẹgbu i; a hụn wẹ ihiẹn m mẹ i, obi e ru wẹ alị.

⁵⁵ Sodọm lẹ ụmụ a lẹ Sameria lẹ ụmụ a k'a rịzị kẹ wẹ rị mbụ, yụ nwẹn lẹ ụmụ ị a rịzịkwọ kẹ ụnụ rị mbụ.

⁵⁶ Ẹlẹ ihiẹn ifẹnrẹn kẹ y'a kpọ nwẹnẹ i wụ Sodọm ogẹn i gi rị a pache,

⁵⁷ mgbe eje-omumẹ i kelẹni wa? Alị Aram lẹ ụmụ-alị a rị nwan a mụ ị ẹmụ, wẹ lẹ ụmụ-alị Filistia e we iwe i, wẹ ile hụn nọhunmẹn'i rị nwan a mụ ị ẹmụ.

⁵⁸ I k'e gi isi buru eje-ịgbaraja ị gba lẹ ihiẹn ile m'a sọ i mẹ.’ Ya kẹ Osolobuẹ ku.

⁵⁹ “ ‘Osolobuẹ Nwọn Ihiẹn Ile sị: M k'e ye i afụnfụn han kẹ ihiẹn i mẹ, ịyụ hụn lelịa Ẹfan m i kun, tikpọ nkwa hụn i gi Ẹfan m kwe.

⁶⁰ Kanị mmẹ nwẹn k'a nyanhan nkwerigbama m tumẹ ẹgbata mmẹ lẹ yụ ogẹn i gi rị okoro; m k'e tumẹ nkwerigbama hụn k'a rị jẹnrin ejẹn ẹgbata mmẹ lẹ yụ.

⁶¹ Ị k'a nyanhan obibi i, ifẹnrẹn e mẹ i ogẹn i sikọ d'e nwọnhẹnzi mmunẹ i, kẹ ndị dịann'ị kẹ ndị ị dịan. M k'e we wẹ ye i, a wụrụ wẹ mmụ ị, kanị ẹlẹ ufiri nkwerigbama mmẹ lẹ yụ.

⁶² Ẹrịra kẹ m'a dọn tumẹ nkwerigbama ẹgbata mmẹ lẹ yụ, ogẹn hụ, y'a marịn nị mmẹ wụ Osolobuẹ.

⁶³ M k'e mẹ ẹ, kẹni m gbarịgụ isi i imẹ eje-ihiẹn ile i mẹ, y'a nyanhan ihiẹn i mẹ, ifẹnrẹn e mẹ i, y'a shịapụkọzị ọnụ yeni ifẹnrẹn. Ya kẹ Osolobuẹ Nwọn Ihiẹn Ile ku.’ ”