Izikẹlụ 15 - Ika

Isi Nke Mmisẹn Osisi Banlẹni Erere

¹ Osolobuẹ gwa m oku, sị m,

² “Nwa-ịhịan! Nanị kẹ osisi vaịnị gidẹ ka osisi ndị ọzọ ile rị ọfịa mma?

³ Nị wẹ saẹka gi osisi vaịnị rụn ihiẹn ọwụlẹ? Nị wẹ saẹka gi ẹ mẹmẹ mkpụkpọ w'e kọnmẹ ihiẹn?

⁴ Ihiẹn ọkụn gihụ a ghọrị rọ: ọkụn dụnpụọlẹ ẹ isi ẹbụbụọ, etintin ẹ a nụ ngi, elee erere k'ọ banzị?

⁵ Omẹni ọ bannị erere k'o zu oke, kị wẹ k'e gizi ẹ nwan mẹ omẹni ọkụn dụngụ a, ọ nụ ngi?

⁶ “Mmẹ, Osolobuẹ Nwọn Ihiẹn Ile, rị nwan a sị: Kẹ m dọn we osisi vaịnị imẹ osisi ndị ọzọ ile rị ọfịa ye nị ọkụn gi ẹ a ghọ, ẹrịra kẹ m dọn we ndị bi imẹ Jerusalẹm ye kẹni wẹ mẹ wẹ ihiẹn ọkụn e mẹ osisi vaịnị.

⁷ “M k'e bunụmanị wẹ; ọsụọn'a nị a wanahịngụọ wẹ ọkụn, ọkụn jẹnkọ d'e bu wẹ ri — ogẹn hụ, ụnụ a marịn nị mmẹ wụ Osolobuẹ.

⁸ M k'e mẹ alị Izrẹlụ gba okpokoro makẹni ẹnya wẹ arị ụzọ ohu kaka. Ya kẹ Osolobuẹ Nwọn Ihiẹn Ile ku.”