Izikẹlụ 13 - Ika

Isi Nke Mmẹtọ Ihiẹn Chuku K'e Mẹ Ndị Amụma-ntụ

¹ Osolobuẹ gwà m oku, sị,

² “Nwa-ịhịan, bu amụma ihiẹn m jẹnkọ d'e mẹ ndị amụma hụ rị e bu amụma ndị hụ imẹ Izrẹlụ. Gwa wẹ ile rị e ku ihiẹn rị wẹ obi, a sị nị wẹ rị e bu amụma, sị wẹ: Gọn ni ntịn ihiẹn Osolobuẹ ku!

³ Osolobuẹ Nwọn Ihiẹn Ile sị: nsọngbu rị e che ụnụ ndị-amụma, ndị nzuzu rị e ku ihiẹn obi wẹ gwa wẹ bụ onwọnni ihiẹn wẹ hụn!

⁴ Izrẹlụ, ndị-amụma ụnụ hụ rịhụ kẹ anụ-ọfịa jakalụ ndị rị a wahunmẹ imẹ mkpọkọ ụlọ ndị wẹ latọ.

⁵ Ndị amụmanị ara ku ezioku, gi ẹ dọnzi mgbọn tikpọsọnmẹni mọbụ tụnhunmẹ Izrẹlụ mgbọn kẹni wẹ saẹka che agha ụhụọhịn Osolobuẹ k'a ghọsị ọnụma a.

⁶ Wẹ hụ a hụn ọhụn ntụ, a gba ẹfa ntụ, a sị, ‘Osolobuẹ sị,’ bụ Osolobuẹ ezini wẹ; kanị wẹ hụ e lee ẹnya nị oku wẹ bụn.

⁷ Ẹlẹ ọhụn ntụ kẹ ụnụ rị a hụn? Ẹlẹ ẹfa ntụ kẹ ụnụ rị a gba — hụnnị ụnụ rị a sị, ‘Osolobuẹ sị’ bụ onwọnni ihiẹn m sị ụnụ?”

⁸ “Ufiri ẹ, Osolobuẹ Nwọn Ihiẹn Ile sị: Mmẹ lẹ ụnụ rọ — ebe omẹni ụnụ rị e ku ihiẹn wụlẹni ezioku, a hụn ọhụn ntụ! Ya kẹ Osolobuẹ Nwọn Ihiẹn Ile ku.

⁹ Ẹka m k'e bitụ ndị-amụma hụ rị a hụn ọhụn ntụ, a gba-ẹfa ntụ; arịkọzị wẹ imẹ ozuzu ndị nke m; ẹfan wẹ arịkọzị ẹkụkwọ ndị Izrẹlụ; abankọzịdẹ wẹ alị Izrẹlụ. Ogẹn hụ, ụnụ a marịn nị m wụ Osolobuẹ nwọn ihiẹn ile.

¹⁰ “Makẹni e gigụọ wẹ wẹ ile duhuhu ndị nke m, a sị wẹ, ‘Nsọngbu arịa,’ bụ nsọngbu jun ejun; ịhịan hụ a tụn ẹhụ-ụlọ zelẹni, ndị amụmanị hụ e gi ihiẹn-ọchan e te ẹ n'ọ la ẹnya!

¹¹ Gwa nwan ndị ahụn rị e te ẹ ihiẹn-ọchan n'o k'a dan. Okẹn mirin k'e zue, huru! Ẹkwan-igwere k'a danzịkwọ; okẹn ẹbi jẹnkọ d'e nutu ẹhụ-ụlọ hụ.

¹² “Ụsụọ-ẹjan hụ dangụ, ẹlẹ a jụma wẹ ụnụ, ‘Ihiẹn nwẹn ụnụ te ẹ nwan — k'o mẹn'ẹ?!’

¹³ “Osolobuẹ Nwọn Ihiẹn Ile sị nwan: M k'e gi ọnụma zihẹ okẹn ẹbi, m k'e gi olulu zihẹ mirin-ozuzue; m k'e gi olulu zihẹ ẹkwan-igwere hisọnmẹ ogbe. M k'e gi wẹ tikpọ a, tikpọchanrịn a.

¹⁴ M k'a kụtu ụsụọ-ẹjan ahụn ụnụ te ihiẹn ma mma, kụtu ẹ ru alị, a hụndẹ wẹ iyetọ a; ọ dan, dangbu ụnụ, ụnụ a marịn nị mmẹ wụ Osolobuẹ.

¹⁵ Ẹnịna kẹ m'e dọn gi ọnụma m ile mẹ ẹhụ-ụlọ hụ ihiẹn, ya lẹ ndị te ẹ ihiẹn ma mma; m mẹgụ a, a sị m ụnụ, ‘Ẹhụ-ẹjan a la, ndị te ẹ ihiẹn a la —

¹⁶ ndị amụma Izrẹlụ nẹi buni Jerusalẹm amụma, a hụnn'a ọhụn nị nsọngbu arịa bụ nsọngbu jun ejun. Ya kẹ Osolobuẹ Nwọn Ihiẹn Ile ku.’ ”

Afụnfụn Hụn Rịnị Ikpoho Rị E Bu Amụma-ntụ

¹⁷ “Nwa-ịhịan, bu nwan ihun zinmẹ ikpoho ụnụ ndị rị e gi ihiẹn obi wẹ gwa wẹ e bu amụma; gwa wẹ ihiẹn m k'e mẹ wẹ.

¹⁸ Sị wẹ: Osolobuẹ nwọn ihiẹn ile sị: Nsọngbu rị e che ikpoho rị e ye onyẹ uku lẹ onyẹ nta ọgụn e yi ẹka, a kwaye wẹ ẹkwa ichẹn-ichẹn wẹ gi e kpumẹ isi lẹ ihun kẹni wẹ nwụn ịhịan. Ụnụ ro ni ụnụ werigụ obi ịhịan nke ụnụ a họdụnị ụnụ?

¹⁹ Ụnụ rị e gi ufiri ọka-bali junhụ ọb'ẹka w'e kpọnye ụnụ lẹ mpekele brẹdi e budan m ẹnya ndị nke m. Ụnụ hụ e gi ntụ ụnụ rị a tụ ndị nke m hụn gi ntụ e dọn e gbu ndị furu ni wẹ rị ndụn, a latọ ndị furu ni wẹ nwụn.

²⁰ “Osolobuẹ Nwọn Ihiẹn Ile sị nwan, ‘Eje-ẹnya kẹ m gi e lee ọgụn ndị hụ ụnụ rị e kẹnmẹye ndị nke m ẹka, e gi wẹ a nwụn ndụn wẹ lekẹ nnụnụ. M jẹnkọ d'e tibepụ ọgụn ndị hụ ụnụ yi ẹka, a tọpụ m ndụn ndị ụnụ gi wẹ kwọndọn nọkẹ nnụnụ.

²¹ M k'a dọkapụzị ẹkwa ndị hụ sueni ụnụ gi kpumẹ isi, a zụọpụha m ndị nke m ụnụ gi, anọkọzị wẹ kẹ anụ ụnụ nwụn. Ogẹn hụ, ụnụ a marịn nị mmẹ wụ Osolobuẹ.

²² “ ‘Ụnụ hụ e gi ntụ ụnụ e mẹ ndụn a gụ ndị ezi-omumẹ bụ ẹlẹ mmẹ ku ihiẹn ndị hụ ndụn gi a gụ wẹ, a gba ndị eje-omumẹ umẹ, e mẹ wẹ ahapụlẹ eje-obibi wẹ, hụn te furu w'a hapụ kẹni wẹ rị ndụn.

²³ Ufiri ẹ, ụnụ ahụnkọzị ọhụn ntụ; ẹfa, ụnụ agbakọzị. M k'a zụọpụha ndị nke m ẹka ụnụ. Ogẹn hụ, ụnụ k'a marịn nị mmẹ wụ Osolobuẹ.’ ”