Izikẹlụ 11 - Ika

Isi Nke Mmanaị Ihiẹn Osolobuẹ Mẹ Eje Ndị-isi

¹ Mmọn-nsọ nọ bushi m elu, buhẹ m ọnụ-mgbọn rị ẹbamịn ọwụwa-ẹnyanwụn Ụlọ-Osolobuẹ. Ikẹnnyẹ isẹn-kwasị-ọgụn hụ ebẹhụ wẹ gha a banye ọnụ-mgbọn hụ. M nọ hụn Ja-azanịa nwa Azuru lẹ Pẹlatịa nwa Bẹnaya imẹ wẹ. Madụ ẹbụbụọnị rị ndị-isi alị.

² Osolobuẹ nọ sị m, “Nwa ịhịan, ndịnị wụ ndị rị a mama eje-ihiẹn, e ye eje-ndụnmọdụn imẹ obodoni.

³ Wẹ rị a sị, ‘Nị ẹnyi tụnsọnmẹ ni ụlọ. Obodoni wụ ite rị ọkụn, ẹnyi nwẹn wụ anụ rị imẹ ite hụn nwọnlẹni ihiẹn k'e mẹn'ẹ.’

⁴ M sị ị nwan, ‘Bu amụma, gwa wẹ ihiẹn m jẹnkọ d'e mẹ wẹ. Nwa ịhịan, m s'ị bu amụma!’ ”

⁵ Ya kẹ Mmọn Osolobuẹ nọ kwọndọn m, Osolobuẹ nọ sị m, “Sị wẹ, ‘Lee ni ihiẹn Osolobuẹ ku: Ihiẹnni kẹ ụnụ ndị Izrẹlụ rị e ku; a marịnzịghọ m ihiẹn ụnụ rị e ro imẹ obi ụnụ.

⁶ Ụnụ e gbuọlẹ ndị bu ọda imẹ obodoni; ozun ndị ụnụ gbu e jungụọ ọgbara-ogbe ẹ ile.

⁷ Ufiri ẹ, Osolobuẹ nwọn ihiẹn ile rị nwan a gwa ụnụ nị: Ndị ụnụ gbutọ imẹ obodoni, uwẹ wụ anụ, obodoni wụ ite. Nke ụnụ nwẹn, m k'a dọkpụnpụha ụnụ imẹ ite hụ.

⁸ Egun agha kẹ ụnụ rị a tụ: agha hụ kẹ m welanị ụnụ. Ya kẹ Osolobuẹ nwọn ihiẹn ile ku.

⁹ M sikọ d'a dọkpụnpụ ụnụ imẹ ẹ, bu ụnụ che ẹka ndị alị ọzọ, gi wẹ yesọnmẹ ụnụ afụnfụn njọ ụnụ.

¹⁰ Ọpịa-agha k'e gbu ụnụ; m k'a nọ ebe alị Izrẹlụ ru — idẹnya ndị alị ọzọ — mẹshi ụnụ ikẹn. Ogẹn hụ, ụnụ a marịn nị m wụ Osolobuẹ.

¹¹ Alịnị awụkọnị ụnụ ite; ụnụ awụkọ anụ rịn'a nwọnlẹni ihiẹn e mẹn'ẹ; m k'a nọ ebe alị Izrẹlụ ru — idẹnya ndị alị ọzọ, ye ụnụ afụnfụn,

¹² ụnụ e gi ẹ marịn nị m wụ Osolobuẹ — makẹni ụnụ egini iwu m bi, ụnụ edọnmẹni iwu ndị m ye ụnụ, kama, iwu alị ndị ọzọ nọkunmẹni ụnụ kẹ ụnụ gi e bi.’ ”

¹³ Ebe m rị nwan e bu amụmanị, Pẹlatịa nwa Bẹnaya nọ nwụnhụn. Ya m nọ bu ẹfọ mama alị, yi, “Euu, Osolobuẹ nwọn ihiẹn ile, n'i gbuchanrịn ndị Izrẹlụ ile họdụnị?!”

Osolobuẹ Sị Omẹgụ O Wekinhẹn Ndị Izrẹlụ

¹⁴ Ya kẹ Osolobuẹ nọ sị m,

¹⁵ “Nwa-ịhịan, ndị bi imẹ Jerusalẹm kikẹnni rị e ku oku ịyụ lẹ umunẹ i ndị Izrẹlụ ile wẹ kpụnjẹn yụ lẹ wẹ Babilọnụ. Wẹ rị a sị, ‘Arịzị wẹ ebe Osolobuẹ rị; ẹnyi kẹ Osolobuẹ ye nwan alịnị weri.’

¹⁶ “Sị nwan, ‘Lee ni ihiẹn Osolobuẹ nwọn ihiẹn ile ku: Ọsụọn'a nị e te kpọnghọ m wẹ shi alị ndị ọzọ rị ebe teni, fe wẹ yesọnmẹ alị ichẹn-ichẹn, m hụ a nọyeni wẹ ẹkẹrẹ imẹ alị ndị wẹ shi.’

¹⁷ “Sị wẹ nwan, nị Osolobuẹ nwọn ihiẹn ile sị wẹ, ‘M jẹnkọ d'a gha imẹ ndị alị ndị ọzọ lẹ alị ichẹn-ichẹn m fe ụnụ ye kịlụa ụnụ; e weyezi m ụnụ alị Izrẹlụ.’

¹⁸ “Sị wẹ, nị ‘Wẹ k'a lụaha alị Izrẹlụ, wepụchanrịn nwan mmọn ndị hụ ile rụnị lẹ ihiẹn ile w'a sọ rịn'a.

¹⁹ M k'e mẹ wẹ nwọnbehi obi-ẹbụọ, e bu m agụngụn ọhụn che imẹ wẹ; m k'e wepụ wẹ akpobi ọmụma wẹ, ye wẹ hụn rị alụlụa,

²⁰ kẹni wẹ hụn ụzọ e gi iwu m e bi, e dọnmẹ iwu ndị m ye wẹ. Wẹ k'a wụ ndị nke m, a wụrụ m Chuku wẹ.

²¹ Nke ndị hụ obi wẹ rịchanrịn mmọn ndị hụ wẹ kọma lẹ arụ ndị hụ wẹ rị e mẹ, m k'e bu ihiẹn wẹ mẹ kwasị wẹ isi. Ya kẹ Osolobuẹ nwọn ihiẹn ile ku.’ ”

²² Ya kẹ chẹrobu ndị hụ nọ shịapụ ẹka-nku wẹ, buli elu, wẹ lẹ wili ndị hụ rị wẹ ụsụọ, ọghọ Chuku Izrẹlụ hụ elu wẹ.

²³ Ọghọ Osolobuẹ nọ nwan gha imẹ Jerusalẹm ebẹhụ buli, jẹn d'a nọdị elu-ugu rị nkọ ọwụwa-ẹnyanwụn Jerusalẹm.

²⁴ Ya kẹ Mmọn Chuku nọ buru m shi imẹ elu, imẹ ọhụn hụ Chuku mẹ m hụn, wekinhẹn m ebẹhụ ndị Izrẹlụ wẹ kpụnhan Babilọnụ rị. Ọ nọ fọn m ẹnya.

²⁵ M nọ gwa ndị Izrẹlụ hụ wẹ kpụnhan Babilọnụ ihiẹn ile Osolobuẹ ghọsị m.