Izikẹlụ 10 - Ika

Isi Nke Iri Kẹ Osolobuẹ Dọn Gha Ụlọ-nsọ Pụ

¹ E lezi m ẹnya, m nọ hụn ihiẹn rị e nwun bru-bru kẹ ọmụma safaya elu okpukpu hụ nọ kẹ igwere hụn ndị chẹrobu hụ rị okpuru ẹ; ọ nọ kẹ ukpo-eze.

² Osolobuẹ nọ sị okẹnnyẹ hụ yi ẹkwa-linẹni, “Shi ẹgbata wili ndị hụ rị a gba ozigbo-ozigbo okpuru ndị chẹrobu hụ d'e kpọnrin ikeke-ọkụn jun ọb'ẹka, y'a ghịgha wẹ ye alịnị wụ Jerusalẹm.” Idẹnya m, okẹnnyẹ hụ nọ jẹnmẹ.

³ Ndị chẹrobu hụ wuzo ẹbamịn ndịdan Ụlọ-nsọ kẹ okẹnnyẹ hụ banye, orukpu nọ jun ezi-ọgwa ahụn rị imẹ-imẹ.

⁴ Ya kẹ ọghọ Osolobuẹ nọ gha elu ndị chẹrobu hụ buli d'a nọdị ọnụmụzọ wẹ gha a pụ Ụlọ-nsọ. Orukpu e jun imẹ Ụlọ-nsọ, ọghọ Osolobuẹ gi pụha nọ nwungbarị ezi-ọgwa ụlọ-nsọ lekẹ ukpẹ.

⁵ Nku ndị chẹrobu hụ a han ọda-ọda, hụn w'a nụdẹ ezi-ọgwa ibuzọ — ọ nọ kẹ olu hụn Chuku nwọn ikẹn ile gi e ku oku.

⁶ Ogẹn hụ Osolobuẹ gi sị okẹnnyẹ hụ yi ẹkwa-linẹni, “D'e weri ikeke-ọkụn rị ẹgbata wili ndị hụ rị ebe ndị chẹrobu hụ rị,” okẹnnyẹ hụ nọ banye ebe wẹ rị, ọ nọ wuzo ẹhụ wili ohu.

⁷ Chẹrobu ohu nọ tịnpụ ẹka, weri ọkụn imẹ ọkụn ahụn rị ẹgbata wẹ, buche okẹnnyẹ hụ yi ẹkwa-linẹni ọb'ẹka. Okẹnnyẹ nwẹn nọ weri ọkụn hụ, pụ.

⁸ Chẹrobu ndị ahụn nwọnsọnmẹ ihiẹn nọ kẹ ẹka ịhịan okpuru ẹka-nku wẹ.

⁹ E lee m ẹnya, m nọ hụn wili ẹnọ, ohu-ohu rịsọnmẹ ụsụọ chẹrobu ndị hụ; wili ndị ahụn hụ e nwun goru-goru, e gbuke, nọkẹ ọmụma-kraịsolaịtị.

¹⁰ Wẹ ẹnịnọ wụchanrịn ụdị ohu — wẹ nọ kẹ ụkụ ụgbọ-alị fiẹnrin imẹ ụkụ ụgbọ-alị.

¹¹ Wẹ ghakọnị, wẹ e shi azụụn ọwụlẹ bụ ehutọnị wẹ, ẹlẹ wẹ e hutọ ehutọ, ebe-lẹ-ebe hụn rị azụụn hụ shi kẹ wẹ ile e shi — w'a ara hutọ.

¹² Ẹnya jun chẹrobu ndịnị ẹhụ ile — kẹ azụụn kẹ ẹka kẹ ẹka-nku kẹ wili ẹnọ hụ.

¹³ Nke wili ndị ahụn, a nụghọ m kẹ wẹ kpọ wẹ “Wili Rị A Gbahunmẹkẹnrinni.”

¹⁴ Ihun ẹnọ-ẹnọ kẹ chẹrobu ndị ahụn nwọnsọnmẹ: ohu wụ ihun chẹrobu, ohu wụ ihun ịhịan, ohu wụ ihun ẹwọrọ, nke ẹnọ wụ ihun ugọn.

¹⁵ Ya kẹ chẹrobu ndị hụ nọ buli elu. Uwẹ wụ ihiẹn ndị ahụn rị ndụn m hụn mkpẹnrẹn Iyi-Kẹba rị Babilọnụ.

¹⁶ Kẹ chẹrobu ndị hụ buli, wili ndị ahụn rị wẹ ụsụọ e buli elu; kẹ chẹrobu ndị hụ shịapụ ẹka-nku nị wẹ gha akpakalị shi elu, wili ndị hụ aghakwọnị wẹ ụsụọ pụ;

¹⁷ wẹ kụsị imẹ elu, wili ndị hụ a kụsị; wẹ bulizi, wili ndị hụ e sọn wẹ buli — makẹni mmọn ihiẹn ẹnịnọ hụ rị imẹ wili ndị hụ.

¹⁸ Ọghọ Osolobuẹ nọ gha ọnụmụzọ Ụlọ-nsọ pụ d'a nọdị elu chẹrobu ndị hụ.

¹⁹ Chẹrobu ndị hụ nọ shịapụ ẹka-nku, gha akpak'alị buli shi imẹ elu idẹnya m ebahụn — wẹ lẹ wili ndị hụ rị wẹ ụsụọ. Ya wẹ nọ kụsị ọnụ-mgbọn Ụlọ-nsọ Osolobuẹ hụn bu ihun zinmẹ ọwụwa-ẹnyanwụn; ọghọ Chuku Izrẹlụ hụ ibe elu wẹ.

²⁰ Uwẹ wụ ihiẹn ẹnọ ndị hụ rị ndụn m hụn okpuru Chuku Izrẹlụ kẹ m rị mkpẹnrẹn Iyi-Kẹba; a marịnghọ m nị chẹrobu kẹ wẹ wụ.

²¹ Wẹ ẹnịnọ nwọnsọnmẹ ihun ẹnọ-ẹnọ lẹ ẹka-nku ẹnọ-ẹnọ; ihiẹn nọkẹ ẹka ịhịan rịchanrịn wẹ ile okpuru ẹka-nku.

²² Ihun wẹ lẹ ihun ndị hụ m hụn mkpẹnrẹn Iyi-Kẹba wụ ohu. Ihun-ihun kẹ wẹ ile e jẹn.