Izikẹlụ 1 - Ika

Isi Nke Ohu Ọhụn Izikẹlụ Hụn

¹ Nke akpọhịn isẹn imẹ ifọn nke ẹnọ imẹ ahụa nke iri-kwasị-ọgụn, m rị mkpẹnrẹn Iyi Kẹba alị Babilọnụ, ebe wẹ kpụnjẹn mmẹ lẹ ndị Juda ibe m. Ya m nọ hụn ọhụn. Imẹ ọhụn ahụn, igwere nọ kpupụ, Chuku nọ ghọsị m ihiẹn.

² Ahụa hụ mẹ ẹ isẹn kete ndị Babilọnụ kpụnrụn eze Juda wụ Jehoyakini.

³ Ụhụọhịn hụ kẹ Osolobuẹ gwa mmẹ wụ Izikẹlụ onyẹ nchụn-ẹjan nwa Buzi oku mkpẹnrẹn Iyi Kẹba ebẹhụ, imẹ alị ndị Kal'di wụ Babilọnụ. Ebẹhụ kẹ Osolobuẹ nọ mẹtụ m ẹka.

⁴ E lee m ẹnya, m nọ hụn okẹn ufere gha ẹbamịn-ugu kpọla lẹ okẹn orukpu. Ọkụn hụ a gha imẹ orukpu hụ e nwunpụha, ukpẹ hụ e nwunhunmẹ ẹ. Ihiẹn nọ kẹ igwe rị e be nwanran-nwanran hụ etintinnaị ọkụn hụ.

⁵ Ihiẹn ẹnọ rị ndụn hụ etintin ọkụn hụ. Ihiẹn ẹnọ hụ nọ kẹ ịhịan,

⁶ kanị wẹ ẹnịnọ nwọnsọnmẹ ihun ẹnọ-ẹnọ lẹ ẹka-nku ẹnọ-ẹnọ.

⁷ Ụkụ wẹ zinrin e zinrin; ọbụkụ wẹ nọkẹ nke nwa-efin, e gbuke kẹ igwe-bronzu wẹ fichan ọhụnma-ọhụnma.

⁸ Wẹ nwọnsọnmẹ ẹka ịhịan okpuru ẹka-nku wẹ azụụn ẹnịnọ. Ẹnịna kẹ ihun wẹ lẹ ẹka-nku wẹ nọsọnmẹ:

⁹ Ẹka-nku onyẹ-onyẹ hụ e mẹtụ nke ibe ẹ. W'a ra hutọ, makẹni ihun rị onyẹ-onyẹ azụụn ọwụlẹ wẹ jẹnkọ.

¹⁰ Kẹ ihun wẹ nọ, wẹ ẹnịnọ nwọnsọnmẹ ihun ịhịan, nwọnzikwọ ihun ẹwọrọ nkọ ẹka-nni, ihun okẹn-efin nkọ ẹka-ekpẹn, ihun ugọn ibe azụụn.

¹¹ Ẹrịra kẹ ihun wẹ nọsọnmẹ. Ẹka-nku wẹ ile shi elu. Onyẹ-onyẹ nwọn ẹka-nku ẹbụọ-ẹbụọ rị e mẹtụ nke ibe ẹ lẹ ẹbụọ-ẹbụọ kpumẹ ẹ ẹhụ.

¹² Makẹni ihun rị onyẹ-onyẹ azụụn ile, wẹ hụ a saẹka e shi azụụn ọwụlẹ mmọn wẹ rị a kịnị wẹ jẹn bụ ehutọnị wẹ.

¹³ Ihiẹn ẹnọ ndị hụ rị ndụn hụ e gbuke kẹ ikeke-ọkụn, lẹzi kẹ ọwaa. Ọkụn hụ etintinnaị wẹ e jẹnjẹn e jẹnlụa, e gbukepụ, amụma hụ a gha imẹ ẹ e bepụha.

¹⁴ Ihiẹn ẹnọ ahụn hụ a gha fịam-fịam nọkẹ amụma rị e beni — a ghajẹn a ghalụa.

¹⁵ E lee m ihiẹn ẹnọ ahụn rị ndụn, m nọ legha wili ohu-ohu rị e mẹtụ alị, wili ndị hụ rịsọnmẹ ụsụọ wẹ ẹnịnọ.

¹⁶ Wili ndị hụ rị e nwun goru-goru lekẹ ihiẹn-mma krisolaịtị, e gbukepụ; wẹ ẹnịnọ yi e yi; wẹ rịsọnmẹ kẹ ụkụ ụgbọ-alị fiẹnrin imẹ ibe wẹ.

¹⁷ Azụụn ọwụlẹ ihiẹn ẹnịnọ hụ shi kẹ wili ndị hụ e shi; w'a ra hutọ.

¹⁸ Wili ndị hụ jẹn elu ọda-ọda hụn a tụ egun; ẹnya rịsọnmẹ wili ndị hụ ẹhụ ile.

¹⁹ Ihiẹn ẹnịnọ hụ rị ndụn jẹnkọnị, wẹ lẹ wili ndị hụ rị wẹ ụsụọ wị e jẹn; wẹ gha alị buli elu, wẹ lẹ wili ndị hụ wị e buli elu.

²⁰ Ebe ọwụlẹ mmọn rị a kịnị wẹ chọ n'o shi kẹ ihiẹn ẹnịnọ hụ rị ndụn e shi, uwẹ lẹ wili ndị hụ — makẹni mmọn ihiẹn ẹnịnọ hụ rị ndụn rị imẹ wili ndị ahụn.

²¹ Ihiẹn ẹnọ ahụn rị ndụn jẹnmẹ, wili ndị ahụn e jẹnmẹ; wẹ kụsị, wili ndị hụ a kụsị. Wẹ gha alị buli elu, wili wẹ a gha alị buli elu — makẹni mmọn ihiẹn ẹnọ hụ rị ndụn rị imẹ wili ndị ahụn.

²² O nwọn okpukpu nọ kẹ igwere shịapụnị ibe elu ihiẹn ẹnọ ndị hụ; ọ hụ e gbuke nọkẹ ughegbe — ogbuke hụn a tụ egun.

²³ Nku wẹ ile shịapụsọnmẹ okpuru ẹ ebẹhụ, ohu hụ e kunrun nke hụn rị azụụnnị, ohu hụ e kunrun nke hụn rị azụụnnị; onyẹ-onyẹ gi ẹka-nku ẹbụbụọ họdụnị kpumẹ ẹhụ a.

²⁴ Wẹ ghakọnị, m hụ a nụ kẹ ẹka-nku wẹ rị a zụn ụzụn lekẹ okẹn mirin rị e huni, nọkẹ olu Onyẹ Ahụn Nwọn ikẹn ile, rịkẹ ụzụn ndị-agha zụnghafekọnị. Ihiẹn ndị hụ rị ndụn kụsị, e shikpumẹ wẹ ẹka-nku wẹ.

²⁵ Ebẹhụ wẹ kụsị, shikpumẹ ẹka-nku wẹ, m nọ nụ olu elu okpukpu hụ nọ kẹ igwere hụn wẹ rị okpuru ẹ.

²⁶ Ihiẹn nọ kẹ ukpo-eze hụ elu okpukpu hụ nọkẹ igwere; o nwun bru-bru nọkẹ ọmụma safaya. Ihiẹn nọ kẹ ịhịan nọdị alị elu ukpo-eze hụ.

²⁷ A hụn m nị gha ebe nọ kẹ ukun ẹ shi elu rị kẹ igwe rị e gbukeni, nọkẹsị ọkụn jun ẹ; gha ebahụn lụa alị rịzị kẹ ọkụn; ukpẹ fihunmẹ ẹ.

²⁸ Ukpẹ ahụn fihunmẹ onyẹ hụ nọ kẹ ekọn-lẹ-ogugu hụn a pụha igwere mirin zue. Ẹrịra kẹ ọghọ hụn Osolobuẹ gi pụha nọ. Kẹ m hụn a, m nọ bu ẹfọ mama alị. Ya kẹ m nọ nụ olu rị e ku oku.