Itẹn 7 - Ika

Isi Nke Ẹsa Anịkwọlẹ Okpoho Hụ Rẹrẹrị Ị

¹ Nwa m, kwọnkẹnmẹ oku m gwa ị, y'e bu ihiẹn m sị ị mẹ dọnmẹ imẹ obi i.

² Mẹ ihiẹn m sị ị mẹ, nị ị hụn ụzọ rị ndụn; chedọn ihiẹn ndị m kuzi i nọkẹ nwa-ẹnya ị.

³ Kẹn wẹ ye mkpịnsịn-ẹka ị; de wẹ ye akpobi i.

⁴ Sị amamihiẹn, “Nwẹnẹ m okpoho k'ị wụ,” y'a kpọ nghọta onyẹ ebọn i;

⁵ e dọnmẹ wẹ i amamgbe y'a danye ẹka okpoho hụn a zọ ụkụ e ye ọfịa, okpoho ẹnya a rị ogbe, okpoho hụn e gi ọnụ-ọma a rẹrẹrị ikẹnnyẹ.

⁶ M rị iwe m, m nọ gha ihiẹn wẹ gi gankin windo lee ẹnya.

⁷ M nọ hụn ndị marịnlẹni ihiẹn, ẹghẹẹ, m nọ hụn ikorọbịa, ẹnya m nọ legha okorọbịa ohu nwọnlẹni uche.

⁸ Ọ ghakọ ọgbara ogbe, ẹhụ iwe okpoho ughẹrẹ hụ; o jẹnkọ ibẹka iwe okpoho ahụn —

⁹ ebe anwụn rọgụ, eki gimẹgụ, ebe ọhịhị rị a gba.

¹⁰ Ya okpoho hụ nọ pụha d'e kunrun ẹ! Okpoho nwẹn kẹn ekikẹn kẹ ịgbaraja — ya lẹ eje-ihiẹn o romẹ.

¹¹ Okpoho hụn ghalẹni as'ẹka e kulụa oku alị, hụn ghalẹni as'ẹka e humẹ isi — iwe ẹ ara ru ẹ:

¹² kikẹnni a hụn w'a ọgbara ogbe; kikẹnni a hụn w'a ebe ịhịan ile a ghafe; ebe ile kẹ ọ nọdị e che ikẹnnyẹ o k'a rẹrẹrị.

¹³ Ọ nọ kwọndọn okorọbịa nwẹn, susu ẹ ọnụ, ifẹnrẹn emẹn'ẹ kaka — ọ sị,

¹⁴ “M gbu anụ tannị — makẹni tannị kẹ m ye oyiye m kwe nkwa.

¹⁵ Ya haịn m gi bịa d'e kunrun i — ịyụ kẹ m rị a chọ; a hụngụọ m'ị nwan!

¹⁶ E gigụọ m ẹkwa linẹni ma mma gbama bẹdi m — ẹkwa pụ ichẹn wẹ nọ alị Ijiptu kpa.

¹⁷ Egigụọdẹ m sẹnti ichẹn-ichẹn feye elu bẹdi m — kẹ maa kẹ alo kẹ sinamọnụ.

¹⁸ Bịa, nị ẹnyi d'a ranhịn — ranhịn hụn wụ ụran — eki e we fọn; nị ẹnyi d'a ranhịn ye isi!

¹⁹ Di m arị ụlọ; o jẹn ụzọ ote.

²⁰ Hụnnị o kpọn egho jun nwa-ẹkpa a, ọ lụakọ d'e ru mgbe ifọn shịagụ.”

²¹ Ẹrịra kẹ okpoho mẹ gi ọnụ-ọma rẹrẹrị a, gi oku riẹngbu enwẹn ẹ rẹrẹrị a.

²² Okorọbịa hụ nọ sọnmẹ ẹ ozigbo, lekẹ okẹn-efin shikọ ebe w'a nọ gbu ẹ, nọkẹ ele dankọ ọnyan-okikọn,

²³ d'e runi a gba w'a ụta zupu ẹ imegi — ọ nọ kẹ nnụnụ zụnbankọ ọnyan, bụ ọ marịn ni isi ẹ k'a tọ a.

²⁴ Gọn ni m nwan ntịn, ụmụ m; gi ni oku m rị a gwa ụnụ dọn.

²⁵ Anịkwọlẹ ni obi ụnụ e shi ebe okpoho hụ rị; azọkwọlẹ ni ụkụ ye ụzọ a.

²⁶ Makẹni o mẹgụọ ndị bu ọda dan; o gbugụọ ndị bu ọda;

²⁷ Ụlọ a wụ ụwaya wẹ gha e shi ili, wẹ a gha a a pụ ebe ọnwụn bi.