Itẹn 6 - Ika

Isi Nke Isin Ibiyefie Ẹka

¹ Nwa m, i biyeni ibe i hụn gi ụgwọ ẹka; i biyeni onyẹ ị marịnlẹni ẹka —

² oku-ọnụ ị e kwọndọngụọ ị, oku-ọnụ ị a nwụndọngụọ ị.

³ Mẹ nwan ihiẹnni nwa m — n'ị hụn ụzọ gbụrụ isi i, ebe o mẹni y'a danbangụọ ibe i ẹka: Jẹnmẹ; d'e welụa enwẹn i alị — y'a rịọ a, rịọ a, rịọ a!

⁴ Anịkwọlẹ ụran tụ ị — anịlẹ ụran buru i.

⁵ Gbụrụ, la — lekẹ ele dan ọnyan, nọkẹ nnụnụ dan ọnyan ohuẹ.

Onyẹ-nzụnzụn

⁶ Onyẹ-nzụnzụn, jẹnburu ndandan; lekpọ k'o bi — nị ị hụn ụzọ nwọnrin uche!

⁷ Ndandan enwọn onyẹ ndu-agha, o nwọn onyẹ-isi, o nwọn onyẹ-ọkịkị —

⁸ bụ o gi ọkọkị a chọtọ ihiẹn-oriri, o gi ogẹn wẹ gi e we ihiẹn-ugbo a rụntọ ihiẹn o gi e bi.

⁹ Onyẹ-nzụnzụn, elee mgbe y'e dinẹbehi ebahụn i dinẹ? Elee mgbe y'e gidẹ tẹnhin ụran?

¹⁰ Ẹkẹrẹ ụran, ẹkẹrẹ irue ụran, ịkụma ẹka zu ikẹn ẹkẹrẹ —

¹¹ y'a dan ogbẹnnyẹ idẹnmizi kẹ ohin dọn e kunrun ịhịan, ụkọ ihiẹn e kunrun i kẹ ndị gi egbe e zun ohin.

Elu Ọghẹlẹ

¹² Onyẹ-ẹti, eje-ịhịan — ịya a ghahunmẹ, e kusọnmẹ eje-ihiẹn;

¹³ o gbusọnmẹ ikpu-ẹnya, e gi ụkụ e ku oku, e gi mkpịnsịn-ẹka e ku oku;

¹⁴ o rotọsọnmẹ eje-ihiẹn yeni eje-ihiẹn rị a obi — e sesọnmẹ ikpe.

¹⁵ Ufiri ẹ kẹ eje-ihiẹn k'e gi kunrun ẹ idẹnmizi; ọ la ntikpọ idẹnmizi — amarịnkọ wẹ kẹ wẹ e mẹ ẹ.

Ihiẹn Ẹsa Hụn E Ze Osolobuẹ Ize

¹⁶ O nwọn ihiẹn isin e ze Osolobuẹ ize — o rughọdẹ ẹsa zu ezu — hụn wụ arụ ẹnya a:

¹⁷ Ẹnya onyẹ mpache, ire hụn a tụ ntụ; ẹka hụn e gbu ndị nwọnlẹni ihiẹn wẹ mẹ;

¹⁸ obi hụn e rotọ eje-ihiẹn, ụkụ hụn imẹ eje-ihiẹn a kẹrẹ;

¹⁹ ọshẹri-ntụ, hụn ntụ rị e hupụha ọnụ kẹ mirin lẹ onyẹ hụn e seni nwẹnẹ lẹ nwẹnẹ ikpe.

Gbanị Ughẹrẹ Ọsọ

²⁰ Nwa m, e mẹ ihiẹn nẹdi i sị ị mẹ; alatọkwọlẹ ihiẹn nnẹ i kuzi i.

²¹ Bu wẹ che imẹ obi i jẹnrin ejẹn; yiri wẹ olu kẹ ihiẹn-olu.

²² I jẹnkọnị ijẹn, nkuzi wẹ k'a gha e du i; ị ranhịn, o che i nche; i tẹnhin, ọ dụn ị ọdụn.

²³ Makẹni ihiẹn ọ sị ị mẹ wụ ukpẹ wẹ mụyen'i; nkuzi hụ wụ ukpẹ; njụgbọ wẹ gi a zụn ịhịan wụ ụzọ ndụn —

²⁴ wẹ k'e dọnmẹ i amamgbe y'a danban ẹka eje-okpoho, amamgbe okpoho ẹnya a rị ogbe e gi ọnụ-ọma rẹrẹrị ị.

²⁵ Anịkwọlẹ mma-ẹhụ a la ị ẹnya imẹ obi i, anịkwọl'a gi ẹnya a hụ rẹrẹrị ị,

²⁶ makẹni ịgbaraja k'e ri i ogbe brẹdi ohu, kanị nwunyẹ ịhịan k'e ri i isi.

²⁷ Nị ịhịan s'ẹka kpọn ọkụn ye ẹhụ ẹkwa a adụnnị ọkụn?

²⁸ Nị ịhịan s'ẹka jẹn ijẹn elu ikeke-ọkụn ọkụn erẹnn'ẹ ụkụ?

²⁹ Ẹrịra k'ọ rị onyẹ sọn nwunyẹ ịhịan ranhịn — onwọnni onyẹ e mẹtụ nwunyẹ ịhịan ẹka a la mmaka.

Ihiẹn Ughẹrẹ E Buhẹ

³⁰ W'a fadẹ ohin ọsụọn'a ẹgụn haịn o gi zun ihiẹn o zun;

³¹ wẹ nwụn a, ọ k'a kụrịrị ụgwọ ihiẹn o zu ụzọ ẹsa, ọsụọn'a nị ihiẹn ile rị iwe ẹ tọ a.

³² Onyẹ na nwunyẹ ịhịan enwọn uche; onyẹ ọwụlẹ mẹn'ẹ gbu enwẹn ẹ.

³³ Wẹ k'a rụrịrị a ẹhụ, fa a, asakọ wẹ ẹka finchanpụ ifẹnrẹn ẹ.

³⁴ Makẹni ẹnya-ụfụ a mẹ di e we eje-iwe, o mẹkọ omikẹn ọ gha e mẹgwarị.

³⁵ O kwerikọdẹ n'ị kụ a ihiẹn ọwụlẹ; onwọnni ihiẹn i gi rịọ a o sikọ d'e kweri narịn ị.