Itẹn 4 - Ika

Isi Nke Ẹnọ Gọn Nẹdi I Ntịn

¹ Ụmụ m, gi ni ọzụnzụn nẹdi ụnụ dọn; bu ni obi che ẹ nwọnrin uche.

² Makẹni ihiẹn rị mma kẹ m rị a kuzi ụnụ, a latọkwọlẹ ni nwan ihiẹn m kuzi ụnụ.

³ Kẹ m rị nwa-ndu iwe nẹdi m, akpụ nwa ohu nnẹ m mụ hụn kelẹni kara,

⁴ nẹdi m hụ a kuzi m, a sị, “Gi obi i ile kwọndọn oku m rị a gwa ị; e mẹ ihiẹn m sị ị mẹ, kẹn'i rị ndụn.

⁵ Nwọnrin amamihiẹn; nwọnrin nghọta; azọkwọlẹ ihiẹn m ku mọbụ gha imẹ ẹ pụ.

⁶ Agbakịtọkwọlẹ amamihiẹn azụụn — o k'e dọnmẹ i; a nị ihiẹn ẹ a sụọ ị, o k'e che i nche.

⁷ Amamihiẹn wụ ibuzọ: nwọnrin nwan amamihiẹn. Y'e ke nwọn ihiẹn ọwụlẹ, omẹni y'e ke nwọnrin nghọta.

⁸ Ye ẹ ọghọ ọda-ọda, o k'e bushi i enu; dide ẹ, o k'e ye i ọghọ.

⁹ Amamihiẹn k'e tu i ugọn a la ẹnya, kpumẹ i okpu-eze ma mma.”

Amamihiẹn E Dọnmẹ Ịhịan Ọchan

¹⁰ Gọn ntịn, nwa m, gi oku m dọn, n'ị hụn ụzọ tọ.

¹¹ M'a ghọsị ị ụzọ amamihiẹn, m'e we i a gha ụzọ rị mma.

¹² I jẹnkọnị, ụkụ ị ekporikọ; ị gba ọsọ, y'a kpọgburukọ.

¹³ Kwọnkẹnmẹ ihiẹn wẹ sị ị mẹ, anịl'a nahịn ị; chemẹ ẹ ọhụnma, makẹni ịya wụ ndụn ị.

¹⁴ Azọlẹ ụkụ ye ụzọ ndị-ejẹ a gha mọbụ gha ụzọ ndị e mẹ eje-ihiẹn a gha.

¹⁵ Jụ obibi wẹ; aghalẹ ụzọ hụ; la a tọ, jẹnmẹ ebe i jẹnkọ.

¹⁶ Makẹni wẹ ara s'ẹka ranhịn mmanị wẹ mẹgụ eje-ihiẹn; ụran ara tụ wẹ mmanị wẹ mẹgụ ịhịan dan.

¹⁷ Njọ kẹ wẹ gi a hụn e ri, ẹka-ikẹn kẹ wẹ gi a hụn a ra.

¹⁸ Kanị ụzọ onyẹ ezi-omumẹ nọ kẹ eki rị e fọnni, hụn e fọnwaye ofọnwaye-ofọnwaye d'e runi o fọnchanrịn.

¹⁹ Ụzọ ndị njọ nọ kẹ ẹkpa-ishi; w'a ra marịn ihiẹn ụkụ wẹ kpọgburu.

Amamihiẹn E Bu Ịhịan Ẹnya E Zinmẹ Ụzọ Ohu

²⁰ Nwa m, bu obi i che ihiẹn m rị e ku; gọn ntịn oku m ọhụnma-ọhụnma.

²¹ Anịkwọlẹ ẹnya ị pụ a, ka bu ẹ che imẹ obi i;

²² makẹni w'e ye ndị nwọnhẹnni wẹ ndụn, e mẹ ẹhụ a rịchanrịn wẹ ikẹn.

²³ Lịlịmakwọ n'ị dọnmẹ obi i ọhụnma, makẹni ịya e ropụha elu y'e bi.

²⁴ Wepụ eje-oku ọnụ ị; wepụ oku rụnị ụgb'ọnụ ị.

²⁵ Buchanrịn ẹnya zinmẹ ibe ihun; bu ẹnya che ebe i jẹnkọ.

²⁶ Beni ụkụ ị ụzọ riẹnni gha, kẹni ụzọ ị ile rịchanrịn mma.

²⁷ Akụyelẹ ẹka-nni mọbụ ẹka-ekpẹn; Gha imẹ eje-ihiẹn pụ.