Itẹn 31 - Ika

Isi Nke Mmanaị Kwasị Ọgụn Ọdụn Wẹ Dụn Eze

¹ Ndịnị wụ oku eze wụ Lẹmuẹlụ ku — ozi rọ; ihiẹn nnẹ ẹ kuzi ẹ rọ:

² “Euu nwa m; nwa ẹfọ m; nwa m gi nkwa m kwe nwọnhẹn,

³ anịlẹ oku okpoho mịra ndụn rị ị ẹhụ anịl'a, makẹni o wiwi ndị-nze.

⁴ Euu Lẹmuẹlụ, ndị-nze efuruni — ndị-nze efurukwọnị a ra manya, ndị-ọkịkị efuruni a ra manya a tụnị,

⁵ amamgbe w'a ragụ, a zọ wẹ ihiẹn iwu ku, napụsọnmẹ ndị igbẹnnyẹ ihiẹn runi wẹ.

⁶ We manya a tụnị ye ndị lakọ iwi, we manya ye ndị ụya rị e ri;

⁷ nị wẹ ra, zọ elu rị a fụnị wẹ, nyanhanbehi ụya rị e rini wẹ.

⁸ E kuni ndị nwọnlẹni ọnụ ọnụ wẹ, y'a zụọyeni ndị nwọnlẹni onyẹ e yeni wẹ ẹka.

⁹ Agbakwọlẹ nkịtịn; a han ezigbo eṅẹn; anịlẹ wẹ mẹgbu ndị igbẹnnyẹ lẹ ndị nwọnlẹni ịhịan.”

Ezigbo Nwunyẹ

¹⁰ Onyẹ k'a s'ẹka hụn ezigbo nwunyẹ? Ịya ka ejije a ṅanran ọhụnma-ọhụnma!

¹¹ Di ẹ gi ẹ e dọn ẹnya — ezigbo ihiẹn ara kọ di ẹ.

¹² O we nwụn, ihiẹn rị mma k'o wẹhẹni di ẹ, ẹlẹ eje-ihiẹn.

¹³ Ọ chọrị ẹṅẹnrẹn anụ lẹ oruru rị mma o gi a kpa ẹkwa; ọ sụọ a n'o gi ẹka a a lụrụ.

¹⁴ Ọ nọ kẹ ụgbọ-mirin ndị-afịa, ọ ghadẹ ebe teni e welụa ihiẹn-oriri ẹ.

¹⁵ O lihi ebe eki kelẹni fọn e mẹmẹni ezi-lẹ-ụlọ a ihiẹn-oriri, keyesọnmẹ idibo ẹ ikpoho ihiẹn wẹ jẹnkọ d'a rụn.

¹⁶ O lelegụ alị ọhụnma, o ṅọnrin ẹ; o gi egho ẹ a gbọ vaịnị.

¹⁷ O bu enwẹn ẹ e che ọrụn a; ọ rụnshi ọrụn a ikẹn.

¹⁸ Ọ marịnghọ erere o k'e gi lụa afịa; ukpẹ ẹ ara nwunbehi imẹ uhinhin.

¹⁹ Ẹka a ohu rị oruru, ẹka a hụn ẹbọ rị ihiẹn o gi a tụ oruru.

²⁰ Ọ yeni ndị igbẹnnyẹ ẹka, e yesọnmẹni ndị mkpa gi ẹka.

²¹ Ara hue uhue makẹ ezi-lẹ-ụlọ a ogẹn oyi, makẹni wẹ ile yi ezigbo ẹkwa a chụ oyi.

²² O mẹmẹrin ẹkwa wẹ gi e dinẹ, ezigbo ẹkwa linẹni lẹ ẹkwa pọpụ k'o yi.

²³ Di ẹ wụ onyẹ wẹ marịn amarịn ọgwa obodo ebe ya lẹ ndị-isi ibe ẹ rị.

²⁴ Ọ kpa ẹwuru linẹni e re, a kpazị akpụkpọ-ukun e reye ndị a zụjẹn afịa alị ọzọ.

²⁵ O jeri ikẹn lẹ ọghọ ẹhụ kẹ ẹkwa; egun ekile ara tụ a — ọ mụdẹ ekile ẹmụ makẹni ọ kwademẹgụọ.

²⁶ O gi amamihiẹn e ku oku, a kuzi ihiẹn furuni.

²⁷ O lepụ ezi-lẹ-ụlọ a ẹnya ọhụnma-ọhụnma, a ra fa ẹka ye ụkụ, e che nị ịhịan ye ẹ.

²⁸ Ụmụ a pụha, a kpọ w'a onyẹ Chuku gọzi; di ẹ nke ẹ a jazị a mma,

²⁹ a sị, “Ikpoho bu ọda e mẹ ihiẹn rị mma, kanị ịyụ mẹkarị wẹ ile.”

³⁰ Nị okpoho a la ẹnya, ẹlẹ ihiẹn w'e gi dọn ẹnya; mma-ẹhụ a la ala; kanị okpoho hụn a tụ egun Osolobuẹ furu w'a ja mma.

³¹ Kụ a ụgwọ ihiẹn-ọma ọ rụn; wẹ gi ọrụn a ja a mma ọgwa obodo.