Itẹn 30 - Ika

Isi Nke Iri Kwasị Ọgụn Oku Agọ Ku

¹ Ndịnị wụ oku Aguru nwa Jakẹ ku — Osolobuẹ sị a ku ẹ: okẹnnyẹni gwa Itiẹlụ oku — Itiẹlụ lẹ Ụkalụ k'ọ gwa a, ọ sị,

² “Mmẹ kachanrịn ịhịan ile e zuzu; enwọndẹ m nghọta kẹ ịhịan.

³ M'e ke mụrụn amamihiẹn, amarịnzịkwọ m Onyẹ-ahụn Rị Nsọ.

⁴ Onyẹ jẹntu elu-igwee hidan? Onyẹ gitu ẹka kpọnrin ufere? Onyẹ gitu mgburu ẹ fụma mirin rị igwere? Onyẹ mẹ ụwa ru ebe ile o ru? Kị wụ ẹfan a lẹ ẹfan nwa a? Gwa m — omẹni y'a marịnghọ!

⁵ Oku ile Chuku ku furu wẹ gi e dọn ẹnya; Chuku e che ndị ile gbaburun'ẹ nche.

⁶ Ekukarịkwọlẹ hụn o ku, makẹ ọ gha a jụgbọ ị, ghọsị n'ị wụ onyẹ-ntụ.

⁷ Ihiẹn ẹbụọ kẹ m rị a rịọ ị, Osolobuẹ; dodo yekwọ m'a m gini d'a nwụn:

⁸ Wezụkachanrịn ẹro lẹ ntụ ebe m rị; anịlẹ m dan ogbẹnnyẹ mọbụ hi ọdanfịn, ka e ye m hụ ihiẹn e zu m e ri ụhụọhịn-ụhụọhịn.

⁹ Amamgbe m'e rijunmẹ ẹfọ, gbakitọ ị azụụn, sị, ‘Onyẹ wụ Osolobuẹ?’ Mọbụ a dan m ogbẹnnyẹ, zun ohin, gi ẹ budan ẹfan Chuku m.

¹⁰ “Ekinkwọlẹ odibo nwọnlẹni ihiẹn o mẹ ye di-nwọnn'ẹ, amamgbe ọ bụ ị ọnụ, ikpe a ma ị.

¹¹ O nwọnghọ ndị a kpọ nẹdi wẹ iyi, agbọ ghalẹni a gwa nnẹ wẹ oku rị mma.

¹² O nwọnghọ ndị hụn e ro ni wẹ rị ọchan bụ wẹ e ke sụpụ wẹ nsịn hụn ru wẹ unyin.

¹³ O nwọnghọ ndị a pachesọnmẹni, e legberi ndị ọzọ.

¹⁴ O nwọnghọ ndị eze rị wẹ ọnụ nọ kẹ ọpịa-agha, ndị agban wẹ nọ kẹ ẹbeke — wẹ chọ nị wẹ ripụ ndị igbẹnnyẹ elu-ụwa, ripụ ndị nwọnlẹni ịhịan — wepụ wẹ imẹ ndị rị ndụn.

¹⁵ Ẹkọrọn mụ ikpoho ẹbụọ: ‘Ye m! Ye m!’ Ịya kẹ w'a kwansọnmẹ. O nwọnghọ ihiẹn ẹtọ ẹfọ ghalẹni e jun — ihiẹn ẹnọ-dẹ hụn ghalẹni a sị, ‘O highọ’:

¹⁶ ili lẹ ẹfọ agan, lẹ alị hụn ẹfọ mirin ghalẹni e jun lẹzi ọkụn hụn ghalẹni a sị, ‘O highọ!’

¹⁷ “Ẹnya hụn a mụ nẹdi ẹ ẹmụ, e legberi oku nnẹ ẹ, nnụnụ rị ọdanmgbugbu k'a gụpụha a, ụmụ udele e ri ẹ.

¹⁸ Wẹ rị ihiẹn ẹtọ a tụ m ẹnya ọda-ọda — ihiẹn ẹnọ-dẹ — hụn m ghọtalẹni:

¹⁹ kẹ ugọn dọn e fe imẹ elu, kẹ agwọ dọn a gha elu ọmụma, kẹ ụgbọ-mirin dọn a gha ahanmahan okẹn ohimin lẹzi oku okẹnnyẹ lẹ nwagbọọ.

²⁰ “Lee kẹ okpoho hụn a zọ ụkụ e ye ọfịa e mẹ: o ri, o finchanpụ ọnụ, ọ sị, ‘Onwọnni eje-ihiẹn m mẹ!’

²¹ O nwọnghọ ihiẹn ẹtọ hụn e mẹ ụwa e mẹhunmẹ: ihiẹn ẹnọ-dẹ hụn ụwa ghalẹni as'ẹka e din:

²² odibo hụn họnrin eze, onyẹ-nzuzu rị e rijun ẹfọ,

²³ okpoho ihiẹn ẹ sụọlẹni di ẹ lẹzi odibo narịn okpoho ọ rị iwe ẹ di ẹ.

²⁴ O nwọn ihiẹn ẹnọ mẹ ẹkẹrẹ, kanị wẹ nwọn uche ọda-ọda:

²⁵ Ndandan enwọnkẹni ndụn, kanị w'e gi ogẹn anwụn e butọ ihiẹn-oriri;

²⁶ Ẹlẹtu-ọmụma enwọnkẹni ndụn, kanị imẹ ọmụma kẹ wẹ e bi.

²⁷ Igurube enwọn eze, kanị w'e gi usọnrọn e jẹn.

²⁸ Wẹ e gi ẹka mmaka a nwụndọn ngwẹnrẹn, kanị ọ banyedẹ obi-eze.

²⁹ O nwọnghọ ihiẹn ẹtọ e jẹn ‘Mmẹ-nwọn-alị, mmẹ-nwọn-alị’ — ihiẹn ẹnọ-dẹ hụn e jẹn nọ kẹ sị uwẹ nwọn ụwa:

³⁰ ẹwọrọ hụn ka anụ ndị ọzọ ndụn enwọn, hụn nwọnlẹni ihiẹn ọ gbanị ọsọ;

³¹ ọkpa rị e jẹnhunmẹ imẹ igunrun nneku lẹ mkpịn lẹzi eze hụn ndị-agha a nọhunmẹ.

³² “Omẹni y'e zuzugụọ bushi enwẹn i elu mọbụ mama eje-ihiẹn, gikwọ nwan ẹka kpumẹ ọnụ!

³³ Makẹni, wẹ gbe mirin-ẹran, ọ rọ, wẹ fị imi, ọ gba ẹdeke; ẹrịrazịkwọ, wẹ kpasu ịhịan iwe, oku e se.”