Itẹn 3 - Ika

Isi Nke Ẹtọ A Nị Osolobuẹ E Du I, Ẹlẹ Uche I

¹ Nwa m, azọkwọlẹ ihiẹn m kuzi i, ka bu ihiẹn m sị ị mẹ che obi i,

² makẹni wẹ k'e mẹ i tọ, wẹhẹn'i aghamihun.

³ Enwọnbehikwọlẹ ihiẹn-ọsụsụọ mọbụ wụbehi onyẹ wẹ gi e dọn ẹnya; yiri wẹ olu lekẹ ihiẹn-olu; de wẹ ye akpobi i.

⁴ Y'e gi ẹ nwọnrin aghamihun, wụrụ onyẹ nwọn uche — kẹ ebe Chuku rị kẹ ebe ịhịan rị.

⁵ Gichanrịn obi i ile danbemẹ Osolobuẹ, egikwọlẹ nghọta ị dọn ẹnya;

⁶ Imẹ ihiẹn ile y'e mẹ, jụgụ a ọnụ, o k'a kwan'ị ụzọ.

⁷ Erolẹ nị y'a marịnghọ ihiẹn — ka gi egun Osolobuẹ la eje-ihiẹn tọ.

⁸ Ọhụn k'e wẹhẹn'i ẹhụ ikẹn, wụrụzịkwọ ọgụn ọkpụkpụ ị gi e ze.

⁹ E gi ihiẹn i nwọn e ye Osolobuẹ ọghọ, ya lẹ mkpụrụ-ibuzọ ile gha ugbo i pụha;

¹⁰ kẹni ihiẹn-oriri jun ọban ị, junpụha, ihiẹn w'a ra e jun ebe y'e butọ a pụ ọnụ.

¹¹ Nwa m, elegberikwọlẹ ẹka-ntịn Osolobuẹ a dọ ị, ọ jụgbọ ị, ewekwọlẹ iwe.

¹² Onyẹ ihiẹn ẹ sụọ Osolobuẹ k'ọ dọ ẹka-ntịn kẹ nẹdi e mẹ nwa a ihiẹn ẹ a sụọ a.

¹³ Onyẹ nwọnhẹn amamihiẹn e nwọngụọ ngọzi, ya lẹ onyẹ nwọnhẹn nghọta;

¹⁴ makẹni amamihiẹn ka siliva erere a ban, ịya kazị goru erere a ban.

¹⁵ Ịya ka ejije ile mkpa a rị — onwọnni ihiẹn w'a chọ achọ w'e gi jen'ẹ.

¹⁶ Ụtọmị rị a ẹka-nni; akụ-lẹ-ụba lẹ ọghọ rị a ẹka-ekpẹn.

¹⁷ Ụzọ ile o dushi ịhịan a sụọchanrịn ụsụọ, ụzọ ile o dushi ịhịan wụ udọn-udọn.

¹⁸ Amamihiẹn wụ osisi e ye ndị nwọnhẹnn'ẹ ndụn; o k'a rịnị ndị hụn kwọnkẹnmẹn'ẹ mma.

Amamihiẹn Kẹ Osolobuẹ Gi Ke Ụwa

¹⁹ Amamihiẹn kẹ Osolobuẹ gi gbe iyetọ ụwa, nghọta k'o gi dọnmẹ igwere ebe o dọnmẹ ẹ;

²⁰ ihiẹn ọ marịn k'o gi mẹ mirin gha imẹ-imẹ alị tikpọpụha isi mbidọn; ịya k'o gizi e mẹ orukpu e ziẹntu igirigi.

²¹ Nwa m, anịkwọlẹ ihiẹn ndịnị nahịn ị; kwọnkẹnmẹ amamihiẹn lẹ igi ezigbo uche e mẹ ihiẹn.

²² Kẹni wẹ hụn ụzọ wụrụnị ị ndụn, wụrụnị ị ihiẹn-olu wẹ gi chọ ị mma.

²³ Y'a hụn ụzọ e jẹn ebe i jẹnkọ, ihiẹn emẹkọ ị, ụkụ ị a kpọkọ ihiẹn;

²⁴ i dinẹ, egun atụkọ ị; i dinẹ n'ị ranhịn, ụran a sụọn e buru i.

²⁵ Atụlẹ egun nsọngbu idẹnmuzi mọbụ egun ntikpọ hụn e kunrun ndị e mẹ eje-ihiẹn.

²⁶ Makẹni Osolobuẹ k'a rị ị azụụn, o k'e chemẹ ụkụ ị makẹ ọ gha a dan ọnyan.

Ịhịan Lẹ Ibe Ẹ

²⁷ Egikwọlẹ ihiẹn ru ịhịan jọ a ẹfọ, omẹni ẹka ị k'ọ rị.

²⁸ Asịlẹ ibe i, “Jẹn n'i bịa — ekile kẹ m'e ye y'ẹ” — bụ i gihụ a kikẹnni.

²⁹ A chọlẹ ibe i njọ, onyẹ hụn bikunman'ị, nwọnlẹni ihiẹn ọ rị e ro.

³⁰ Ekpelẹ ịhịan mmakalaka — bụ onwọnni eje-ihiẹn o mẹ i.

³¹ Anịlẹ elu eje-ịhịan la ị ẹnya, elerilẹ ẹ bi kaka;

³² makẹni ize kẹ onyẹ ghẹrẹ-ghẹrẹ-ghẹrẹ e zedẹ Osolobuẹ, kanị nke onyẹ e dọnmẹ ẹka a ọchan, Osolobuẹ a gwad'a uche ẹ.

³³ Ọnụ kẹ Osolobuẹ a bụ ikpụlọ eje-ịhịan, kanị ngọzi k'ọ gọzi ikpụlọ onyẹ ezi-omumẹ.

³⁴ Olelịa kẹ Osolobuẹ e lelịa ndị-nlelịa, kanị o mẹyeni ndị e welụa enwẹn wẹ alị.

³⁵ Onyẹ nwọn uche jẹnkọ d'e nwọnrin mgbaye, kanị ịfa kẹ onyẹ nzuzu sikọ d'e nwọnhẹn.