Itẹn 29 - Ika

Isi Nke Itenẹi Kwasị Ọgụn

¹ Onyẹ w'a jụgbọ ọjụgbọ-ọjụgbọ, ọ tọ a gba isi-akwanran, jẹnkọ d'e tikpọ idẹnmizi — hụn wẹ ghalẹni e dọnzi.

² Ndị ezi-omumẹ waye, ịhịan ile a ghọghọ; kanị onyẹ eje-omumẹ kịma, ịhịan ile a sụnma udẹn.

³ Onyẹ a chọ n'ọ marịn ihiẹn e wẹhẹni nẹdi ẹ ịghọghọ, kanị onyẹ ya lẹ ịgbaraja wị a kpa e ritịta ihiẹn ẹ.

⁴ Ezioku kẹ eze gi e mẹ alị e turu ọhụnma, kanị hụn a nasọnmẹ ụtụ e wiwi alị a.

⁵ Onyẹ ọwụlẹ a ja ibe ẹ ọjịja ọnụnụ-ire rị a kpọtọnị enwẹn ẹ ọnyan.

⁶ Njọ eje-ịhịan a nwụn a kẹ ọnyan, kanị onyẹ ezi-omumẹ a s'ẹka a bụ ẹbụ, a ghọghọ.

⁷ Oku iye ndị igbẹnnyẹ ihiẹn runi wẹ rị onyẹ ezi-omumẹ mkpa, kanị onyẹ eje-omumẹ ara ghọta ụdị amamihiẹn hụ.

⁸ Ndị-nlelịa a mụ ọkụn e ye ndị obodo obi, kanị ndị nwọn amamihiẹn e mẹ olulu a rọ.

⁹ Onyẹ marịn ihiẹn lẹ onyẹ-nzuzu dọma oku, olulu-olulu kẹ onyẹ-nzuzu e bu, a mụ ịhịan ẹmụ — ara nị wẹ ku oku ahụn.

¹⁰ Iwe ndị e dọnmẹ ẹka wẹ ọchan e we ndị egbu-lẹ-egbu; w'a chọsọnmẹ isi ndị ezi-omumẹ.

¹¹ Onyẹ-nzuzu a ghọsịchanrịn k'ọ rị a, kanị onyẹ nwọn uche e kwọndọn enwẹn ẹ ekwọndọn.

¹² Omẹni eze e gi ntụ e dọn, ịhaịmẹ ẹ ile k'a wụ eje-ịhịan.

¹³ Ihiẹn ohuni rịnị kẹ ogbẹnnyẹ kẹ onyẹ rị a bịangbun'ẹ: Osolobuẹ e mẹ wẹ ẹbụbụọ e legha ụzọ.

¹⁴ Eze hannị ndị igbẹnnyẹ eṅẹn k'o furu, ukpo ẹ k'e turusọnmẹ.

¹⁵ Mkpịnsịn lẹ ọjụgbọ e mẹ ịhịan e nwọnrin uche, kanị nwa wẹ latọ n'o mẹmẹ k'ọ sụọ k'a fa nnẹ ẹ.

¹⁶ Ndị eje-omumẹ waye, njọ a bawaye, kanị ndị ezi-omumẹ k'a hụn ọdịdan ndị eje-omumẹ.

¹⁷ Zụnkwọ nwa ị, kẹni o ru eki, o mẹ obi ru i alị, umẹ-ndụn ị e nwọnrin anwịnrịn.

¹⁸ Omẹni oku Osolobuẹ arịa, ịhịan e bimẹ k'ọ sụọ wẹ; kanị ngọzi wụ nke ndị e dọnmẹ Iwu-Osolobuẹ.

¹⁹ W'a ra gi oku-ọnụ sụọ e sọn odibo — makẹni ọsụọn'a n'ọ ghọta ihiẹn i ku, o gikọ a rụn ọrụn.

²⁰ Y'a hụnghọ onyẹ ghalẹni e rogụ d'e ku? O k'a rịnị onyẹ-nzuzu mma karị a.

²¹ Ịhịan gha ebe odibo ẹ rị nwata pụpọmama a, nsọngbu kẹ odibo hụ k'e buhẹn'ẹ ikpanzụụn.

²² Onyẹ e bu olulu e sehẹsọnmẹ ikpe; onyẹ a kpọ ọnụma e mẹ njọ bu ọda.

²³ Mpache ịhịan e budan a, kanị onyẹ e welụa enwẹn ẹ alị k'e nwọnrin ọghọ.

²⁴ Onyẹ hụn a kwadọn onyẹ ohin wụ eṅẹnrẹn enwẹn ẹ; wẹ e ye ẹ iyi e kun bụ egun anịk'a ku ezioku.

²⁵ Ịtụ egun ịhịan wụ ọnyan, kanị onyẹ gi Osolobuẹ dọn ẹnya, onwọnni ihiẹn e mẹn'ẹ.

²⁶ Ndị bu ọda a channị onyẹ rị a kịnị ẹnya, kanị ẹka Osolobuẹ kẹ ịhịan nọ e nwọnhẹn ihiẹn run'ẹ.

²⁷ Ndị eje-omumẹ wụ ihiẹn rụnị ẹnya ndị ezi-omumẹ; ndị ezi-omumẹ wụzịkwọ ihiẹn rụnị ẹnya ndị eje-omumẹ.