Itẹn 28 - Ika

Isi Nke Ẹsatọ Kwasị Ọgụn

¹ Onyẹ eje-omumẹ a gba ọsọ bụ onwọnni onyẹ chụkọn'a, kanị onyẹ ezi-omumẹ e mẹ kẹ ẹwọrọ hụn egun ghalẹni a tụ.

² Alị nupụ isi okpuru Osolobuẹ, ndị ọkịkị e bu ọda, kanị onyẹ nwọn nghọta lẹ amamihiẹn e mẹ alị e nwọn udọn lẹ usọnrọn.

³ Ogbẹnnyẹ hụn a kịgbu ndị igbẹnnyẹ rịhụ kẹ okẹn-mirin e wiwi ihiẹn-ugbo.

⁴ Ndị gbakịtọgụ Iwu-Osolobuẹ azụụn a ja ndị eje-omumẹ mma, kanị ndị e sọn Iwu-Osolobuẹ a ra yeni wẹ efe.

⁵ Ndị-ejẹ ara ghọta ihiẹn wụ igi ẹka ohu e sọn ịhịan ile, kanị ndị a chọ uche Osolobuẹ a ghọtachanrịn a ọhụnma.

⁶ Ogbẹnnyẹ e dọnmẹ ẹka a ọchan ka mma karị ọdanfịn ghalẹni e dọnmẹ ẹka a ọchan.

⁷ Onyẹ e dọnmẹ Iwu-Osolobuẹ wụ nwa nwọn uche, kanị hụn e sọn ndị okẹn ihiẹn-oriri e gbe ifẹnrẹn e ye nẹdi ẹ ihun.

⁸ Onyẹ hụn e gi okẹn ọmụnịnwa e hiwaye ọdanfịn rị a kpatọnị onyẹ e mẹni ndị igbẹnnyẹ ọhụnma.

⁹ Onyẹ sị o gọnkọ ntịn Iwu-Osolobuẹ, ekpere ẹ wụdẹ arụ ebe Osolobuẹ rị.

¹⁰ Onyẹ du onyẹ ezi-omumẹ ye ụzọ rịlẹni mma k'a danban ọnyan ya lẹ enwẹn ẹ shitọ, kanị ndị e mẹ mma jẹnkọ d'e nwọnhẹn ihiẹn rị mma.

¹¹ Ọdanfịn nwọn ikẹn ro n'ọ marịnka, kanị ogbẹnnyẹ hụn nwọn nghọta a hụnchanrịn a k'ọ nọ.

¹² Ndị ezi-omumẹ mẹri, okẹn ịghọghọ a rị, kanị ndị eje-omumẹ kịma, ịhịan a warịma.

¹³ Ara masịnị onyẹ hụn e kpumẹ njọ a, kanị onyẹ hụn e kupụha njọ a, e bihutọ ẹka, kẹ wẹ e mẹni omikẹn.

¹⁴ Onyẹ hụn a kpachanpụ ẹnya e bi ogẹn ile e nwọnkẹ ngọzi, kanị hụn a gba isi-akwanran a danban eje-ihiẹn.

¹⁵ Onyẹ eje-omumẹ hụn rị a kị ndị nwọnlẹni eyemẹka rịhụ kẹ ẹwọrọ rị e dẹnni mọbụ eje-anụ biẹ rị a zụnburu ihiẹn o k'e gbu.

¹⁶ Ọnapụ-ọnapụ kẹ onyẹ-ọkịkị nwọnlẹni nghọta a napụ, kanị onyẹ-ọkịkị eje-erere e ze ize k'a tọ.

¹⁷ Onyẹ gbu ọchụn obi rị e gbu mgbu k'a tọ a gba ọsọ ihiẹn hụ o mẹ o we nwụn — onyẹ ọwụlẹ ebuchekwọlẹn'a ọnụ.

¹⁸ Onwọnni ihiẹn e mẹ onyẹ e dọnmẹ ẹka a ọchan, kanị onyẹ ụzọ a mẹ ghẹrẹ-ghẹrẹ-ghẹrẹ k'a dan idẹnmizi.

¹⁹ Onyẹ rụn ugbo ẹ ọ hụn ihiẹn-oriri rijun ẹfọ, kanị onyẹ tọ iroro-ọdanfịn a tụ ọ wụrụ ogbẹnnyẹ mgbeleke.

²⁰ Onyẹ hụn tọ e mẹ ihiẹn furuni e nwọnhẹn ngọzi ọhụnma-ọhụnma, kanị onyẹ a hụhụ n'o hi ọdanfịn a lakọ mmaka.

²¹ Igbeyeni ịhịan ajọka njọ: bụ ịhịan e mẹdẹ eje-ihiẹn makẹni a ghagụọ wẹ azụụn ye wẹ ẹkẹrẹ brẹdi.

²² Onyẹ-atịntịn a chọkẹnmẹ n'o hi ọdanfịn, bụ ọ marịn n'o jẹnkọ d'a dan ogbẹnnyẹ.

²³ Onyẹ hụn jụgbọ ịhịan kẹ wẹ e ku oku ẹ ọhụnma ikpanzụụn karị onyẹ hụn a ja a ọjịja ọnụnụ-ire.

²⁴ Onyẹ hụn e zun nẹdi ẹ mọbụ nnẹ ẹ ohin, sị, “Ẹlẹ njọ” — lẹ onyẹ e tikpọ ịhịan wụ ohu.

²⁵ Onyẹ ẹnya-uku e buhẹ ikpe, kanị o k'a masịnị onyẹ hụn gi Osolobuẹ e dọn ẹnya.

²⁶ Onyẹ gi enwẹn ẹ e dọn ẹnya wụ nzuzu, kanị onyẹ gi amamihiẹn e bi k'a wanahịn.

²⁷ Onwọnni ihiẹn k'a kọ onyẹ e ye ndị igbẹnnyẹ ihiẹn, kanị ọnụ-ẹsọn bu ọda e sọn onyẹ a hụn ndị igbẹnnyẹ a nyụnma ẹnya.

²⁸ Ndị eje-omumẹ kịma, ịhịan a warịma, kanị ndị eje-omumẹ dan, ndị ezi-omumẹ a waye.