Itẹn 27 - Ika

Isi Nke Ẹsa Kwasị Ọgụn

¹ Egilẹ eki nyan isi, nị y'a marịn ihiẹn eki jẹnkọ d'a mụ.

² Onyẹ ọzọ ya ja ị mma, ẹlẹ ọnụ ị; onyẹ i marịnlẹni, ẹlẹ ụgb'ọnụ ị.

³ Ọmụma a nyịnghọ, ẹjan a nyịnzịghọkwọ, kanị iwe onyẹ-ẹwobi a kpasu ịhịan nyịnnahịn wẹ ẹbụbụọ.

⁴ Olulu jọ njọ, ọnụma e tikpọ ihiẹn, kanị isi onyẹ k'a s'ẹka che ẹnya-ụfụ?

⁵ Ịjụgbọ ịhịan idẹnya ịhịan ile ka mma karị inwọn ihiẹn-ọsụsụọ ị ghalẹni a ghọsị.

⁶ Ọwụ ịhịan rụd'a ẹhụ, kẹ obi ka e ru ẹ alị karị nị eṅẹnrẹn susu ẹ ọnụ.

⁷ Onyẹ ẹfọ jun kẹ mirin-ẹnwụn ghalẹni a sụọ ọnụ; kanị onyẹ ẹgụn rị a gụn, ihiẹn e lu ilu a sụọd'a ụsụọ ọnụ.

⁸ Kẹ nnụnụ gha imẹ ẹkụ a pụ nọ, ẹrịra kẹ onyẹ gha iwe ẹ wahuhu nọ.

⁹ Kẹ udẹn e kun fuẹin lẹ nsẹnsi dọn e mẹ obi a sụọ ịhịan ụsụọ, ẹrịra kẹ ọwụ ịhịan a rị a, makẹni o gi akpak'alị obi ẹ a dụn a ọdụn.

¹⁰ Agbakịtọkwọlẹ ọwụ ị mọbụ ọwụ nẹdi i azụụn; nsọngbu kunrun i, ẹlẹ hụn y'e gi jẹnmẹ iwe nwẹnẹ i; onyẹ ọzọ rị ị nsue ka mma karị nwẹnẹ i rị ụzọ ote.

¹¹ Nwọnrin uche, nwa m, n'ị mẹ m ghọghọ, kẹni m s'ẹka shịarị onyẹ ọwụlẹ k'a mụ m ẹmụ.

¹² Onyẹ nwọn uche a hụn eje-ihiẹn, a warị, kanị onyẹ nwọnlẹni ihiẹn ọ marịn a tọ e jẹn, eje-ihiẹn ahụn e kunrun ẹ.

¹³ Onyẹ biyeni onyẹ ọ marịnlẹni ẹka y'e bugụdẹ ụzọ narịn a ẹwuru ẹ kwọndọn; ẹghẹẹ, narịngụ ịhịan ihiẹn kwọndọn, omẹni okpoho ẹnya a rị ogbe k'o biyeni ẹka.

¹⁴ Ịhịan weshikẹ olu elu kele ibe ẹ ụzọ-ọtụntụn, wẹ sị n'ọ rị a kpọ a iyi.

¹⁵ Nwunyẹ e kpe ikpe nọ kẹ mirin rị a tantuni ụhụọhịn mirin rị e zue;

¹⁶ ikpumẹn'ẹ rịkẹ ikwọndọn ufere mọbụ igi ẹka kwọndọn ofugbọn.

¹⁷ Igwe e sụọn igwe; ịhịan e mẹ ihun e fọn ibe ẹ.

¹⁸ Onyẹ e lepụ osisi figi ẹnya k'e ri figi hụ, onyẹ e lepụ di-nwọnn'ẹ ẹnya k'e nwọnrin ọghọ.

¹⁹ Kẹ ịhịan dọn e legha ihun ẹ elu mirin ẹrịra kẹ obi ịhịan a ghọsị a k'ọ nọ.

²⁰ Ẹfọ ara jun Ọnwụn lẹ Ntikpọ; ẹfọ ara junzikwọ ẹnya.

²¹ Ọkụn kẹ wẹ gi e lele siliva, okẹn ọkụn kẹ wẹ gi e lele goru — kanị ịja ịhịan mma kẹ wẹ gi e lele ẹ.

²² Ọsụọn'a ị sụ onyẹ-nzuzu imẹ odo, sụgbamadẹ ya lẹ ọka, y'a sakọ ẹka napụ a nzuzu ẹ.

²³ Hụnkwọ a n'ị marịn k'ọ rị igunrun anụ ị, lepụkwọ igunrun anụ i ẹnya ọhụnma —

²⁴ makẹni akụ-lẹ-ụba ara rị jẹnrin ejẹn, okpu-eze ara rị jẹnrin ejẹn.

²⁵ Wẹ kpọnpụ ẹfịfịa-ọkpọnkụn wẹ betọ, nị nke ọhụn e rukingụọ a, nị e kpọnbanhan wẹ irurue rị elu òke —

²⁶ atụnrụn e ri, ẹṅẹnrẹn ẹ e ye i ẹkwa, ewu e ye i egho wẹ gi e ṅọn alị;

²⁷ y'a hụn mirin-ẹran ewu ọda hụn yụ lẹ ikpụlọ ị e gi rijun ẹfọ, y'e gizikwọ a ye idibo i ikpoho ihiẹn wẹ gi e bi.