Itẹn 26 - Ika

Isi Nke Isin Kwasị Ọgụn

¹ Oyi ara tụ ogẹn uwowo; mirin ara zue ogẹn ọkọkị; mgbaye ara furu onyẹ-nzuzu.

² Ọnụ wẹ bụ onyẹ mẹlẹni ihiẹn w'a bụnị ọnụ ara ru ẹ ẹhụ — ọ nọhụ kẹ nnụnụ rịhụ e fe nku kpakpakpa bụ ara beri mọbụ hụn fekọhụ ozigbo-ozigbo.

³ Mkpịnsịn kẹ w'a fịan ẹshin, okẹnmẹ kẹ wẹ e kẹnmẹ ọnụ jaki, mkpịnsịn kẹ w'a fịan onyẹ nzuzu ụgba-azụụn.

⁴ Ashịarịlẹ onyẹ nzuzu oku k'o dọn ku ẹ, amamgbe ịyụ nwẹn a nọ kẹ ịya.

⁵ Shịarị onyẹ nzuzu ihiẹn nzuzu ọ rị e ku, amamgbe o weri ẹ n'o nwọnkẹ uche.

⁶ Ibu ozi che onyẹ-ẹwobi ẹka nọ kẹ ibepụ enwẹn i ụkụ mọbụ ibu ihiẹn k'e gbun'i che ọnụ.

⁷ Ọnụ onyẹ-nzuzu, itẹn nọhụ kẹ ụkụ dan ngụrọ.

⁸ Iye onyẹ ẹwobi ọghọ nọ kẹ ikẹnmẹ akpụrụ-iyi ye araba.

⁹ Ọnụ onyẹ-nzuzu, itẹn nọ kẹ onyẹ-manya bu ogun.

¹⁰ Onyẹ hụn e we onyẹ-nzuzu ọrụn mọbụ e we onyẹ ọwụlẹ ghafekọnị rịhụ kẹ ọgba-ụta hụn a rụ ịhịan ẹhụ mpụ.

¹¹ Kẹ nkitẹ dọn e rizi ẹgbọ ọ gbọ, ẹrịra kẹ onyẹ-nzuzu dọn e zuzudọnzi nzuzu o zuzu.

¹² Y'a hụnghọ onyẹ a sị enwẹn ẹ n'ọ marịnka ihiẹn? O k'a rịnị onyẹ-nzuzu mma karị hụnyẹ.

¹³ Onyẹ-nzụnzụn a sị, “Ẹwọrọ rị ụzọ; ẹwọrọ rị ogbe e jẹnhunmẹ!”

¹⁴ Kẹ ẹhue dọnhụ e shi azụụnnị lẹ azụụnnị, ẹrịra kẹ onyẹ-nzụnzụn e kpereshi azụụnnị lẹ azụụnnị elu-ukpo.

¹⁵ Onyẹ-nzụnzụn e bu ẹka a tọ imẹ afẹrẹ; nzụnzụn ara nị a wepụha a buche ọnụ.

¹⁶ Onyẹ-nzụnzụn weri ẹ nị ịya ka ihiẹn a marịn karị madụ ẹsa gi uche e ku.

¹⁷ Onyẹ ghafekọnị bu enwẹn ẹ che oku wụlẹni nke ẹ nọhụ kẹ onyẹ dọdọn nkitẹ ntịn.

¹⁸ Onyẹ-ẹra hụn rị a gba ụta lẹ ọkụn mpụ

¹⁹ lẹ onyẹ hụn e dufiegụ ibe ẹ, a sị, “Egu kẹ m rịhụ e gu” wụ ohu.

²⁰ Nkụn rịlẹn'a, ọkụn e tinyụn; ọghẹlẹ rịlẹn'a, ikpe e bi.

²¹ Ikeke unyin lẹ ikeke-ọkụn wị; nkụn lẹ ọkụn wị; onyẹ ikpe lẹ ikpe wị.

²² Oku-ọnụ onyẹ asịsị-ire nọ kẹ ihiẹn-oriri mẹ kịrị-kịrị a sụọ ụsụọ, o rudẹ ịhịan alị-ẹfọ.

²³ Ọnụ-ọma ya lẹ eje-obi wị nọhụ kẹ ihiẹn-ụrụa wẹ gi siliva nyankwama.

²⁴ Ịhịan e bu iwe ịhịan obi, e gi ọnụ-ọma e kpumẹ enwẹn ẹ, kanị ẹro k'ọ rị e mẹ.

²⁵ Ọsụọn'a nị oku-ọnụ a a sụọka ụsụọ, egilẹ ẹ dọn, makẹni arụ ile zu ọnụ imẹ obi ẹ.

²⁶ Ikẹnkwọ n'o gighọ ẹro kpumẹ iwe rị a ẹfọ, kanị eje-omumẹ ẹ k'a wa ebe ịhịan ile rị.

²⁷ Ịhịan gutọnị ibe ẹ mgbugbu, ya nwọn danban a; ịhịan kpere ọmụma kwasị ibe ẹ, o k'e kperekin d'e kunrun ẹ.

²⁸ Ọnụ e buokin ịhịan ọnụ bu iwe ẹ obi, oku ọnụnụ-ire e wiwi ihiẹn ọda-ọda.