Itẹn 22 - Ika

Isi Nke Ẹbụọ Kwasị Ọgụn

¹ Ezigbo ẹfan ka mma karị okẹn akụ-lẹ-ụba; nị we e ku oku ịhịan ọhụnma ka mma karị siliva lẹ goru.

² Ihiẹnni kẹ ọdanfịn lẹ ogbẹnnyẹ gi wụ ohu: Osolobuẹ ke wẹ ile.

³ Onyẹ nwọn uche a hụn eje-ihiẹn, a warị, kanị onyẹ nwọnlẹni ihiẹn ọ marịn a tọ e jẹn, eje-ihiẹn ahụn e kunrun ẹ.

⁴ Iwelụa-enwẹn ịhịan alị lẹ ịtụ-egun Osolobuẹ e wẹhẹ akụ-lẹ-ụba, ọghọ lẹ ndụn.

⁵ Ogun lẹ ọnyan rịsọnmẹ ụzọ onyẹ eje-omumẹ, kanị onyẹ kpọ ndụn a ihiẹn a gbanị wẹ ọsọ.

⁶ Kuzi nwa-ndu k'o furu n'o bi, o higụdẹ, ọ ghakọ a pụ.

⁷ Ọdanfịn a kị ogbẹnnyẹ, onyẹ zinnarịnnị wụ odibo onyẹ zinyen'ẹ.

⁸ Onyẹ hụn a kụn eje-omumẹ k'a ghọrị nsọngbu, ọkpọ hụn o gi a kpa ikẹn ahụn k'a kpagi.

⁹ Onyẹ a ha ẹka k'e nwọn ngọzi, makẹni o yebeye ndị igbẹnnyẹ ihiẹn-oriri ẹ.

¹⁰ Chụpụ onyẹ-nlelịa, ikpe a pụ, ndọndọ lẹ mkpari a kụsị.

¹¹ Onyẹ ezioku a sụọ k'a wụrụ ọwụ eze yeni oku rị mma a gha a ọnụ a pụha.

¹² Osolobuẹ e che onyẹ marịn ihiẹn nche, kanị ọ kpayịya oku-ọnụ ndị ntụ.

¹³ Onyẹ-nzụnzụn sị, “Ẹwọrọ rị ezi! Wẹ k'e gbukwọ m tọ ogbe!”

¹⁴ Ọnụ okpoho ẹnya a rị ogbe nọ kẹ mgbugbu mini; okẹnnyẹ ọnụma Osolobuẹ sọnkọ k'a danban a.

¹⁵ Nzuzu-nzuzu rị nwata isi, kanị mkpịnsịn wẹ gi a zụn a a chụpụ a ya.

¹⁶ Kẹ onyẹ hụn e mẹgbu ndị igbẹnnyẹ e gi ẹ e hiwaye ọdanfịn kẹ onyẹ hụn e ye ọdanfịn ihiẹn, ogbẹnnyẹ kẹ wẹ ẹbụbụọ a dan.

Oku Ndị Marịn Ihiẹn Ku

¹⁷ Gọn ntịn, nụ ihiẹn ndị marịn ihiẹn ku; bu obi che ihiẹn m rị a kuzi,

¹⁸ makẹni ọ rịka mma n'i bu oku ndịnị che obi i, bu wẹ ile dọnmẹ ọnụ ị.

¹⁹ Kẹni i hụn ụzọ gi Osolobuẹ dọn ẹnya haịn m gi rị a kuzi i tannị — ịyụ lẹ enwẹn i.

²⁰ E detugụọnịnị m'ị ihiẹn iri kwasị ọgụn wẹ gi a dụn ọdụn, a marịn ihiẹn?

²¹ I k'e gi ẹ marịn ezioku lẹ oku wẹ gi e dọn ẹnya, kẹni i s'ẹka we azịza rị mma jẹnni ndị hụn zin'i.

²² Emẹgbukwọlẹ ịhịan makẹni ọ wụ ogbẹnnyẹ, abịangbukwọlẹ ịhịan ọgwa makẹni onwọn ịhịan —

²³ Osolobuẹ k'e kinni wẹ ọnụ wẹ, narịngwarị ndị narịn wẹ ihiẹn.

²⁴ Ahanlẹ onyẹ e bu olulu ọwụ, esọnlẹ onyẹ e bukẹnrin olulu kpa —

²⁵ amamgbe y'a mụnarịn a omumẹ ẹ, bu enwẹn i che ọnyan.

²⁶ Emẹkwọlẹ onyẹ e biyesọnmẹni ịhịan ẹka, onyẹ e gi ihiẹn ẹ a gbamasọnmẹ ibe;

²⁷ o ru tan nị y'e nwọn ihiẹn y'e gi kụ ụgwọ, wẹ k'e bunarịn ị ihiẹn i gi a ranhịn ebe i dinẹdẹ elu ẹ.

²⁸ Etuzụkakwọlẹ ihiẹn okẹn hụn ndị nẹdi ụnụ tumẹ ẹdẹi.

²⁹ Ya hụnghọ onyẹ marịn ọrụn? Ndị-nze k'o k'a rụnnị ọrụn, ẹlẹ ndị mmaka k'o k'a rụnnị.