Itẹn 20 - Ika

Isi Nke Ọgụn

¹ Manya e dọnmẹ ịhịan ẹwobi, manya zeni e mẹ ịhịan a lụ ọgụn; onyẹ manya dufie enwọn uche.

² Olulu eze nọ kẹ ẹwọrọ rị e dẹnni, onyẹ hụn kpasu ẹ iwe gi ẹka a seri ihiẹn e gbun'ẹ.

³ Onyẹ nu oku ẹka ye enwẹn ẹ ọghọ, kanị ikpe-ikpe kẹ onyẹ-nzuzu ọwụlẹ e kpe.

⁴ Onyẹ-nzụnzụn ara kụn ihiẹn-ugbo ogẹn furuni: o ru nwan ogẹn wẹ gi e we ihiẹn-ugbo, ọ chọma ihiẹn-ugbo kanị ọ hụnkọ.

⁵ Ihiẹn rị ịhịan obi nọ kẹ mirin mini, kanị onyẹ nwọn nghọta k'a s'ẹka dọpụha a.

⁶ Ndị bu ọda a kpọ enwẹn wẹ ndị wẹ gi e dọn ẹnya, kanị, elebe kẹ ịhịan a nọ hụn onyẹ furu wẹ gi e dọn ẹnya nke-esi?

⁷ Onyẹ ezi-omumẹ e bi obibi nwọnlẹni nkọrịanị; o k'a rịnị mmụ a lalanị mma.

⁸ Eze nọdị ukpo ẹ a han eṅẹn, ẹnya a hụ e shiẹnpụhachanrịn eje-ihiẹn rị alị-eze ẹ.

⁹ Onyẹ k'a s'ẹka sị, “E dọnmẹgụọ m obi m ọchan; m rị ọchan, njọ arị m ẹka”?

¹⁰ Kẹ eje-mkpu kẹ eje-skelu, wẹ ile wụchanrịn arụ ẹnya Osolobuẹ.

¹¹ Ọsụọn'a nị ịhịan wụ nwata, omumẹ ẹ kẹ wẹ gi a marịn a: kẹ omumẹ ẹ hụghọ ọchan, kẹ o furughọ.

¹² Ntịn a nụ ihiẹn lẹ ẹnya e legha ụzọ — Osolobuẹ mẹmẹ wẹ ẹbụbụọ.

¹³ Anịlẹ ụran a sụọ ị, amamgbe y'a dan ogbẹnnyẹ; shịapụ ẹnya ị, n'ị hụn ihiẹn-oriri rijun ẹfọ.

¹⁴ “O runi kaka! Ọ ṅanranka!” Ya kẹ onyẹ rị e ṅọnni e ku — kanị ọ pụ, ọ nyanma isi n'o ṅọnkẹ ẹ ọhụnma.

¹⁵ Goru hụ a, rubi nwẹnẹ goru e junzighọ, kanị ọnụ onyẹ nwọn amamihiẹn wụ ihiẹn rị mma w'a chọ achọ.

¹⁶ Narịngụdẹ ịhịan ẹwuru o gi rị e biyeni onyẹ ọ marịnlẹni ẹka — kwọndọn ẹ omẹni onyẹ ụnụ marịnlẹni k'o biyeni ẹka.

¹⁷ Ihiẹn-oriri wẹ gi mmẹgbu nwọnhẹn a sụọ ịhịan a sụọ, kanị ikpanzụụn o họnrin ẹ akpụrụ-iyi ọnụ.

¹⁸ Ị chọ n'i mẹ ihiẹn y'e gọngụ ntịn ndụnmọdụn; gọngụ nwan ntịn ndụnmọdụn i kebe jẹn agha.

¹⁹ Ọghẹlẹ a ma zuemẹ oku — gbanị nwan onyẹ ghalẹni e kpumẹ ọnụ ọsọ.

²⁰ Onyẹ kpari nẹdi mọbụ nnẹ ẹ, ukpẹ ẹ k'e tinyụnnahịn a imẹ ẹkpa-ishi.

²¹ Akụ-lẹ-ụba wẹ gi ẹnya-uku nwọnhẹn, arịkọnị ịhịan mma isi-njẹndemẹ.

²² Asịlẹ, “M k'e mẹgwarị ị eje-ihiẹnni!” Cheri Osolobuẹ, n'ọ gbapụha ị.

²³ Igi eje-mkpu a zụ afịa wụ arụ ẹnya Osolobuẹ, i gi skelu wụlẹni ezigbo ẹ a zụ afịa arị mma.

²⁴ Osolobuẹ e ku ebe ịhịan a hanye ụkụ. Nanị kẹ ịhịan a dọn nwan ghọtachanrịn ụzọ hụ ọ ghakọ?

²⁵ Ọnyan rọ nị ịhịan hụhụ kwe Osolobuẹ nkwa, o kebe leban ẹnya nkwa o kwe.

²⁶ Eze marịn ihiẹn e zinzinpụha ndị eje-omumẹ; o mẹ wẹ ihiẹn wẹ e mẹ ọka, ẹfịfịa a a pụha.

²⁷ Mmọn ịhịan wụ ukpẹ Osolobuẹ gi a hụn a, o nwunru imẹ obi ịhịan.

²⁸ Ihiẹn-ọsụsụọ lẹ ezioku e dọnmẹ eze; ihiẹn-ọsụsụọ e dọnmẹ ukpo ẹ.

²⁹ Ndụn rị ikoro wụ ọghọ ndị ikoro, isi-ẹwọ wụ ikpẹn ndị ẹgẹdi.

³⁰ Ili wẹ gbu ịhịan lẹ ẹhụ wẹ rụ a, e mẹ ịhịan e bihutọ ẹka; mkpịnsịn wẹ fịan ịhịan a chanchandẹ ẹ obi.