Itẹn 2 - Ika

Isi Nke Ẹbụọ Erere Amamihiẹn Ban Amamihiẹn E Mẹ Ịhịan A Marịn Osolobuẹ

¹ Nwa m, omẹni y'e gi oku m dọn, bu ihiẹn m sị ị mẹ che imẹ i,

² ghahanị i gọn amamihiẹn ntịn, lẹ ibu obi i che nghọta.

³ Ẹghẹẹ, omẹni y'a hị amamihiẹn, yikẹnmẹdẹ oro nị wẹ hụn ụzọ ye i nghọta,

⁴ omẹni y'a chọkẹnmẹ amamihiẹn kẹ w'a chọ egho, omẹni y'a chọ a ntan, chọ a imọn nọkẹ ihiẹn rị mkpa zuerini,

⁵ ogẹn ahụn kẹ y'e gi marịn ịtụ egun Osolobuẹ, wụrụzịkwọ onyẹ marịn Chuku.

⁶ Makẹni Osolobuẹ e ye amamihiẹn; ọnụ a kẹ ịhịan gha a marịn ihiẹn, ọnụ a kẹ nghọta gha a bịa.

⁷ Osolobuẹ dọnmẹni onyẹ kụrụ ọtọ amamihiẹn ihiẹn gi a ghan'a, ịya wụzịkwọ akpaịn ndị e dọnmẹ ẹka wẹ ọchan gi e che ẹhụ.

⁸ Uwẹ ile k'o gi e chedọn ụzọ ndị ezioku, e che ụzọ ndị e mẹ uche ẹ nche.

Amamihiẹn E Mẹ Ịhịan A Marịn Ihiẹn Rị Mma

⁹ Ogẹn ahụn, y'a ghọta ihiẹn rị mma lẹ imẹ ihiẹn k'o furu lẹ imẹ onyẹ ọwụlẹ k'o furu — ghọta ụzọ ile hụn rị mma.

¹⁰ Makẹni, amamihiẹn k'a ban i imẹ obi, ẹfọ ka gha a sụọ ị nị y'a marịnghọ ihiẹn.

¹¹ Ezigbo uche k'e chedọn i; nghọta k'e che i nche.

Amamihiẹn E Mẹ Ịhịan A Jụ Eje-obibi

¹² Amamihiẹn k'e mẹ i wanahịn eje-obibi, obibi ndị oku-ọnụ wẹ zinlẹni —

¹³ ndị latọ ụzọ rị mma ghama ụzọ gba-ishi;

¹⁴ ndị hụn eje-ihiẹn a sụọ omumẹ — hụn a ghọghọdẹni eje-ihiẹn jọgbu enwẹn ẹ,

¹⁵ hụn a ghasọnmẹ ụzọ zinlẹni, e mẹ ghẹrẹ-ghẹrẹ-ghẹrẹ.

Amamihiẹn E Mẹ Ịhịan A Wanahịn Ughẹrẹ

¹⁶ Amamihiẹn k'a zụọpụhazị ị ẹka okpoho ọzọ, ẹka eje-okpoho ọnụ-ọma,

¹⁷ hụn latọgụ di-ụtụntụn a, latọ nkwa o kwe idẹnya Chuku.

¹⁸ Mmụlọ iwe ẹ wụ ụzọ ọnwụn, ụzọ hụ ọ ghakọ pụ alị-mmọn.

¹⁹ Onwọnni onyẹ e jẹn ebe ọ rị hụn e kinhẹnni mọbụ a saẹka e ru ụzọ ndụn.

Amamihiẹn Nwọn Mẹri

²⁰ Nwọnrin nwan amamihiẹn, kẹni i gha ụzọ ezigbo ịhịan, ghasọnmẹ ụzọ ndị ezi-omumẹ.

²¹ Makẹni ndị e dọnmẹ ẹka wẹ ọchan k'e bisọnmẹ alị; ndị nwọnlẹni nkọrịanị k'e bisọnmẹ imẹ ẹ;

²² kanị wẹ jẹnkọ d'e bepụ ndị-ejẹ alị, huepụ ndị ihunnaị rịn'a.