Itẹn 19 - Ika

Isi Nke Mmitenẹi

¹ Ogbẹnnyẹ e dọnmẹ ẹka a ọchan ka mma karị onyẹ-nzuzu gi ọnụ a e ku eje-ihiẹn.

² Ọrịnị mma nị ịhịan nwọn adụdụ bụ amamihiẹn arịa, mọbụ nị ịhịan hụhụ, fie ụzọ.

³ Nzuzu ịhịan hụ e wiwi ẹ ihiẹn, kanị obi ẹ hụ a kpọnị Osolobuẹ ọnụma.

⁴ Akụ-lẹ-ụba e wẹhẹ ọwụ bu ọda, kanị ịhịan dan ogbẹnnyẹ, ndị ọwụ a a gba a tọ.

⁵ Ọshẹri ntụ k'a tarịrị afụnfụn, onyẹ a tụ ntụ-ntụ alakọ mmaka.

⁶ Ndị bu ọda a channị okẹn-ịhịan ẹnya; ịhịan ile wụ ọwụ onyẹ e ye ịhịan ihiẹn.

⁷ Ize ogbẹnnyẹ e ze umunẹ ẹ ile — kị k'e mẹ ndị ọwụ a agbalẹn'a ọsọ? Ọ hụ a chụ wẹ, a rịọ wẹ, kanị w'a ra nọkunmẹ ẹ.

⁸ Onyẹ hụn nwọnhẹn amamihiẹn e mẹgụọnị enwẹn ẹ ihiẹn rị mma; onyẹ kwọnkẹnmẹ nghọta k'a gha ihun.

⁹ Ọshẹri ntụ k'a tarịrị afụnfụn; onyẹ a tụ ntụ k'a la iwi.

¹⁰ Onyẹ-ẹwobi efuruni e ri ụwa — ọrịwụzị nị igbọn kị ụmụ-eze!

¹¹ Amamihiẹn ịhịan e ye ẹ ndidin; ọghọ a rọ n'o nu ihiẹn wẹ mẹ ẹ ẹka.

¹² Olulu eze nọ kẹ ebe ẹwọrọ rị e dẹn, kanị ọhụnma a nọ kẹ igirigi ziẹnye elu irurue.

¹³ Okẹnnyẹ e zuzuni e wiwi nẹdi ẹ ihiẹn; nwunyẹ e kpe ikpe-ikpe lẹ mirin a tan ọtịntan-ọtịntan wụ ohu.

¹⁴ Nẹdi ịhịan e ye ẹ ụlọ lẹ ihiẹn ndị ọzọ, kanị ẹka Osolobuẹ kẹ ezigbo nwunyẹ gha a bịa.

¹⁵ Nzụnzụn e buhẹ okẹn-ụran, onyẹ ẹka-nkụtọpụ a ranhịn ẹgụn.

¹⁶ Onyẹ e mẹ ihiẹn Iwu-Osolobuẹ ku rị e che ndụn a nche, kanị onyẹ hụn gi ẹ e gu egu k'a nwụnhụn.

¹⁷ Onyẹ rị e mẹni ogbẹnnyẹ ọhụnma rị e zinye Osolobuẹ ihiẹn; o k'a kụ a ụgwọ ihiẹn o mẹ.

¹⁸ Fịan nwa ị mkpịnsịn, n'o gighọ a rị mma; e yelẹni ọnwụn ẹka gbu ẹ.

¹⁹ Onyẹ obi-ọkụn k'e girịrị isi ẹ buru ihiẹn rịn'a; ị zụọpụhagụ a, ị k'a zụọpụhazị a ọzọ.

²⁰ A nụ ndụnmọdụn, a nị wẹ a zụn ị, o mẹgụ tan ị k'a marịn ihiẹn.

²¹ Ịhịan e rotọ ihiẹn bu ọda, kanị uche Osolobuẹ wụ ihiẹn hụn k'e mẹni.

²² Ịhịan chọ onyẹ wẹ gi e dọn ẹnya; ọ ka mma n'ị wụ ogbẹnnyẹ karị n'ị wụ onyẹ-ntụ.

²³ Ịtụ-egun Osolobuẹ e dọnmẹ ịhịan ndụn, o mẹ ẹfọ e jun hụnyẹ, ọ ranhịn eje-ihiẹn ara ru ẹ ẹhụ.

²⁴ Ẹka onyẹ-nzụnzụn a tọdẹ imẹ afẹrẹ — ara s'ẹka wekin ẹ che ọnụ.

²⁵ Ị fịan onyẹ-nlelịa mkpịnsịn, onyẹ ọzọ te marịnlẹni ihiẹn e gi ẹ nwọnrin uche; ị jụgbọhụ onyẹ nwọn uche, o gi ẹ marịn ihiẹn.

²⁶ Onyẹ kpari nẹdi ẹ, chụpụ nnẹ ẹ wụ nwa ịfa lẹ ụya.

²⁷ Nwa m, i gọnbehi ntịn nkuzi, y'a ghabehi ụzọ amamihiẹn.

²⁸ Ọshẹri-ntụ a mụdẹ ezioku ẹmụ; ọnụ onyẹ eje-omumẹ e luepụ eje-ihiẹn kẹ nni.

²⁹ Ndị-ẹwobi kẹ wẹ dọnmẹtọnị afụnfụn; ụgba-azụụn ndị-nzuzu kẹ wẹ dọmẹtọnị mkpịnsịn.