Itẹn 17 - Ika

Isi Nke Mmẹsa

¹ Ẹkẹrẹ brẹdi ọkpọ-nkụn ya lẹ udọn lẹ obi-erumalị wị ka mma karị ụlọ hụn oriri jun kanị ya lẹ ikpe wị.

² Odibo nwọn uche k'a kị nwa e mẹ ihiẹn-ifẹnrẹn, o k'e sọn ndị ikpụlọ hụ keri ukuu nọkẹ nwẹnẹ.

³ Ọkụn kẹ wẹ gi e lele siliva; okẹn ọkụn kẹ wẹ gi e lele goru; kanị Osolobuẹ ya nwọn e lele obi.

⁴ Onyẹ eje-omumẹ e gọn ndị e ku eje-ihiẹn ntịn, onyẹ-ntụ e gi oku onyẹ e kuja oku ịhịan e dọn.

⁵ Onyẹ hụn a mụ ndị igbẹnnyẹ ẹmụ rị a kpari Onyẹ keni wẹ; onyẹ hụn a ghọghọ makẹni nsọngbu bịanị ịhịan k'a narịnrịrị afụnfụn.

⁶ Ụmụ-ụmụ wụ ugọn ndị ẹgẹdi tu, nẹdi lẹ nnẹ wụ ọghọ mmụ wẹ.

⁷ Oku rị mma efuruni ọnụ onyẹ ẹwobi — nanị ntụ e dọn nwan furu ọnụ onyẹ ọkịkị?

⁸ Ọgị-azụụn nọ kẹ ọgụn onyẹ e yen'ẹ gwọ: ebe ọwụlẹ o dọn ihun, ọ ghan'a.

⁹ Onyẹ hụn e kpumẹ njọ wẹ mẹ ẹ rị a chọ ihiẹn-ọsụsụọ, kanị onyẹ hụn a tọ e ku ẹ rị a chụdẹ ezigbo ọwụ a.

¹⁰ Ọjụgbọ mmaka a bannị onyẹ nwọn uche erere karịdẹ ube mkpịnsịn ọgụn-isẹn wẹ fịan onyẹ-nzuzu.

¹¹ Nnupụ-isi sụọ kẹ eje-ịhịan a chọ n'o nupụ; onyẹ ghalẹni e mẹ omikẹn kẹ wẹ k'e zijẹn'ẹ.

¹² Ọ ka mma nị ịhịan kunrun eje-anụ biẹ wẹ narịn ụmụ a, karị n'o kunrun onyẹ-ẹwobi ebe ọ rị e zuzu.

¹³ Onyẹ gi njọ kụ mma, eje-ihiẹn agụkọ iwe ẹ.

¹⁴ Ibidọn ikpe nọ kẹ itikpọ ụgba wẹ gi gbọndọn okẹn mirin; la nwan oku hụ tọ o gini e se ikpe.

¹⁵ Ịsị nị ikpe amanị onyẹ mẹ njọ lẹ ịma onyẹ mẹlẹni njọ ikpe — wẹ ẹbụbụọ wụ arụ ẹnya Osolobuẹ.

¹⁶ Kịnị kẹ onyẹ-ẹwobi rị e yeni wẹ egho w'e gi kuzi ẹ amamihiẹn, ebe o mẹni uche arịa a ẹfọ?

¹⁷ Ogẹn ile kẹ ọwụ e nwọn ihiẹn-ọsụsụọ; ihiẹn-ụya kẹ wẹ mụnị nwẹnẹ.

¹⁸ Onyẹ nwọnlẹni uche sụọ e biye ẹka, e gi ihiẹn ẹ a gbamanị onyẹ ọzọ ibe.

¹⁹ Onyẹ ikpe a sụọ, njọ rị a sụọ a; onyẹ hụn rụn ọnụ-ụgba jẹn elu rị a chọ enwẹn ẹ oku.

²⁰ Ara masịnị onyẹ eje-obi; onyẹ ọnụ a e ku eje-ihiẹn a danban imẹ nsọngbu.

²¹ Onyẹ mụ nwa nzuzu, ẹkwan k'o buhẹ; nẹdi onyẹ-ẹwobi enwọnkọ ịghọghọ.

²² Obi ụsụọ wụ ezigbo ọgụn, kanị omẹni ndụn a rị obi, ọkpụkpụ asaẹka wuzo ọtọ.

²³ Onyẹ eje-omumẹ a narịn ihiẹn nzuzue, kẹn'o bu ezioku isi kpọma alị.

²⁴ Ẹnya onyẹ nwọn uche ara pụ amamihiẹn ọ gha e mẹ ihiẹn, kanị ẹnya onyẹ-nzuzu a wahunmẹ e rudẹ njẹndemẹ ụwa.

²⁵ Nwa nzuzu e wẹhẹni nẹdi ẹ ụfụ, e mẹ nnẹ mụn'a a kwan ụya.

²⁶ Ọrịnị mma nị wẹ ye onyẹ mẹlẹni eje-ihiẹn afụnfụn mọbụ fịan onyẹ gi ọkwa mkpịnsịn makẹni o ku ezioku.

²⁷ Onyẹ ma kwọndọn ire ẹ a marịnghọ ihiẹn, onyẹ ghalẹni e bukẹnrin olulu e nwọnghọ nghọta.

²⁸ W'e rodẹ ni onyẹ-nzuzu e nwọnghọ uche omẹni ọ gba-nkịtịn; o kwọndọn ire ẹ, w'e ro n'o nwọnghọ nghọta.