Itẹn 16 - Ika

Isi Nke Mmisin

¹ Ịhịan nwọn ikẹn rotọ ihiẹn ọ chọ n'o ku, kanị ihiẹn Osolobuẹ chọ kẹ ọnụ ịhịan k'e ku.

² Ihiẹn onyẹ e mẹ rị a mma ẹnya, kanị obi kẹ Osolobuẹ e lele.

³ Bu ihiẹn ile che ẹka Osolobuẹ, ihiẹn i bu obi a gha.

⁴ Osolobuẹ nwọn ihiẹn o bu obi e mẹ ihiẹn ile o mẹ — o dọnmẹzidẹ ndị eje-omumẹ ndụn kẹni nsọngbu kunrun wẹ.

⁵ Ndị ile a pacheni e ze Osolobuẹ ize. Ya wekwọ ị ẹnya nị alakọ wẹ mmaka.

⁶ Ihiẹn-ọsụsụọ lẹ ezioku kẹ ịhịan gi e mẹ wẹ a gbagharị a njọ; egun Osolobuẹ kẹ ịhịan gi a gbanị eje-ihiẹn ọsọ.

⁷ Omẹni obibi ịhịan a sụọ Osolobuẹ ụsụọ, o mẹdẹ ndị-iṅẹnrẹn ẹ e gi ẹnya rị mma e lee ẹ.

⁸ Ẹkẹrẹ wẹ gi ezi-omumẹ nwọnhẹn ka mma karị ọda wẹ gi mmẹgbu nwọnhẹn.

⁹ Ịhịan nwọn ikẹn rotọ ihiẹn ọ chọ n'o mẹ, kanị ụkụ ịhịan e jẹn ebe Osolobuẹ chọ.

¹⁰ Ọnụ eze kẹ wẹ nọ a nụ uche Osolobuẹ, y'e gikwọlẹ ọnụ a han eje-eṅẹn.

¹¹ Osolobuẹ sị ezigbo mkpu k'ọ chọ, wẹ ile rị imẹ ẹkpa ya wụchanrịn nke ẹ.

¹² Ndị-nze ara gi eje-omumẹ mẹ ẹhụ, makẹni ezi-omumẹ kẹ ukpo-eze gi e turu.

¹³ Ndị e ku ezioku a sụọ ndị-nze ụsụọ, onyẹ e ku ihiẹn k'ọ nọ kẹ wẹ gi e mẹ ẹhụ.

¹⁴ Ọnụma eze nwọn ikẹn buhẹni ịhịan ọnwụn, kanị onyẹ hụn nwọn uche a marịnghọ k'o dọn rọ a.

¹⁵ Ihun sụọ eze ẹmụ, ịhịan a rị ndụn; ọhụnma eze nọzịkwọ kẹ orukpu udu-mirin.

¹⁶ Inwọnrin amamihiẹn ka mma karị inwọnrin goru; ịhanrịn nghọta ka mma karị ịhanrịn siliva!

¹⁷ Ụzọ ọma hụn eje-ihiẹn rịlẹni kẹ ndị ezioku a gha; onyẹ hụn a kpachanpụ ẹnya e bi rị e che ndụn a nche.

¹⁸ Mpache bịaọlẹ, ihiẹn e sọnn'ẹ wụ ntikpọ; enwẹn ịhịan junmẹ ẹ ẹfọ, o d'a dan.

¹⁹ Ọ ka mma nị ịhịan welụa enwẹn ẹ alị, wụrụ onyẹ wẹ rị e mẹgbu, karị n'ọ rị e sọn ndị mpache e keri ihiẹn wẹ napụ ịhịan.

²⁰ Onyẹ gi ezigbo ihiẹn wẹ kuzi ẹ dọn, ihiẹn a ghan'a, onyẹ gi Osolobuẹ dọn ẹnya, ngọzi a wụrụ nke ẹ.

²¹ Onyẹ uche rị ẹfọ kẹ w'a sị n'o nwọnghọ nghọta, oku rị mma a kwadọn nkuzi.

²² Nghọta e yesọnmẹ ndị nwọnn'ẹ ndụn kẹ isi-mirin dọn a gbapụhasọnmẹ mirin, kanị nzuzu e sehẹni ịhịan afụnfụn.

²³ Obi onyẹ nwọn uche a gwa ọnụ a ihiẹn o ku hụn ọnụ a gi a saẹka a kuzi ọhụnma.

²⁴ Oku rị mma wụ ọgba-ẹnwụn — ọ sụọ umẹ-ndụn ịhịan ụsụọ, e mẹ ọkpụkpụ a a rị ikẹn.

²⁵ O nwọnghọ ụzọ rị ịhịan mma ẹnya, kanị ọnwụn k'o shikọ.

²⁶ Ẹfọ hụn fọn onyẹ-ọrụn e yen'ẹ ẹka; ẹgụn rị a gụnn'a hụ e nu ẹ a rụnwaye.

²⁷ Eje-ịhịan a chọ ịhịan njọ, ọnụ oku ẹ e rẹn kẹ ọkụn.

²⁸ Onyẹ e bi k'ọ sụọ a e sesọnmẹ oku; ọghẹlẹ e kebe ọwụ lẹ ọwụ.

²⁹ Eje-ịhịan e dufie ibe ẹ, e mẹ ẹ a ghama ụzọ rịlẹni mma.

³⁰ Onyẹ hụn e gbu ikpu-ẹnya rị a chọ n'o mẹ ihiẹn rịlẹni mma; onyẹ hụn tụtụma ọnụ a kwademẹgụọ n'o mẹ eje-ihiẹn.

³¹ Isi-ẹwọ wụ ugọn wẹ tu ịhịan gi ye ẹ ọghọ; obibi-ọma kẹ wẹ gi e nwọn ẹ.

³² Onyẹ nwọn ndidin ka odogun-agha mma; onyẹ ma kwọndọn enwẹn ẹ ka onyẹ ma mẹri obodo mma.

³³ Ịhịan a tụ mkpọ, kanị ihiẹn Osolobuẹ chọ kẹ mkpọ e ku.