Itẹn 14 - Ika

Isi Nke Mmẹnọ

¹ Okpoho nwọn uche e mẹ ikpụlọ a e shi elu, kanị hụn e zuzuni e gidẹ ẹka a a dọtu nke ẹ.

² Onyẹ gi ezioku e bi a tụ egun Osolobuẹ, kanị onyẹ hụn gi ntụ e bi e legberi Osolobuẹ.

³ Oku-ọnụ onyẹ-nzuzu e mẹ wẹ a fịan a mkpịnsịn, kanị oku-ọnụ onyẹ nwọn uche e gbọndọnn'ẹ nsọngbu.

⁴ Omẹni okẹn-efin a rụn ugbo arịa, unyin a rịkọ ebe y'e butọ n'a ihiẹn oriri, kanị ndụn okẹn-efin gi a rụn ọrụn kẹ ihiẹn-ugbo gi e jun.

⁵ Ezigbo ọshẹri ara tụ ntụ, kanị ọshẹri-ntụ e hupụha ntụ e hupụha.

⁶ K'ọ rị onyẹ-nlelịa, ọ marịnghọ ihiẹn — bụ ara ru ẹ ẹka kaka, kanị ndị nwọn uche ara chọ amamihiẹn achọ.

⁷ Gbalanị onyẹ-nzuzu, makẹni onwọnni ihiẹn o nwọn o k'a kuzi i.

⁸ Amamihiẹn onyẹ nwọn uche k'o gi e lekpọ obibi ẹ, kanị nzuzu ndị-nzuzu e dufie wẹ.

⁹ Ndị-nlelịa e gidẹ ịrịọ mgbagharị a mụ ẹmụ, kanị Osolobuẹ e kweri arịrịọ ndị ezi-omumẹ.

¹⁰ Obi sụọ marịn k'o dọn rị a fụ a; ọ sụọma a, ịya sụọ marịnzịkwọ — onwọnni onyẹ ọzọ.

¹¹ Wẹ k'e tikpọ ikpụlọ onyẹ eje-omumẹ, kanị ikpụlọ onyẹ ezi-omumẹ k'a gha ihun.

¹² O nwọn ụzọ rị ịhịan mma ẹnya, kanị ọnwụn k'o shikọ.

¹³ Ọnụ nwọn ikẹn rị a mụ ẹmụ bụ obi hụ a kwan; ẹkwan nwọnzikwọ ikẹn bini ịhịan ịghọghọ.

¹⁴ Onyẹ hụn obi ẹ latọgụ Osolobuẹ k'a narịnrịrị ụgwọ-ọrụn a; onyẹ-ọma k'a narịnzịkwọ ụgwọ nke ẹ.

¹⁵ Onyẹ nwọnlẹni hụn ọ marịn e kweri ihiẹn ile; kanị onyẹ nwọn uche e lebangụ ebe o jẹnkọ ẹnya.

¹⁶ Onyẹ nwọn uche e gi egun Osolobuẹ a gbanị eje-ihiẹn ọsọ; kanị nzuzu e mẹ isi-mgbaka, ara tu ihiẹn ọwụlẹ.

¹⁷ Onyẹ e bukẹnrin olulu e mẹ ihiẹn-ẹwobi; ịhịan e ze ize onyẹ marịn ẹnya eje-ihiẹn.

¹⁸ Onyẹ mẹbe ogbori o họnrin nzuzu, kanị onyẹ gi uche e bi, amamihiẹn wụ ugọn o tu.

¹⁹ Ndị-ejẹ jẹnkọ d'e gbuni ndị ezi-omumẹ osekpu; ndị njọ jẹnkọ d'e gbu osekpu ọnụ-ụgba ndị ezi-omumẹ.

²⁰ Ndị bikunmẹ ndị igbẹnnyẹ a gbaladẹni wẹ agbalanị, kanị ndị ịdanfịn nwọn ndị ọwụ bu ọda.

²¹ Onyẹ hụn e legberi ibe ẹ rị e mẹ njọ, kanị onyẹ e mẹni ndị elu rị a fụ ọhụnma wụ onyẹ Osolobuẹ gọzi.

²² Ẹlẹ ọkpahu kẹ ndị e romẹ eje-ihiẹn a kpahu? Kanị ihiẹn-ọsụsụọ lẹ ezioku e kunrun ndị e ro mma.

²³ Ọrụn ọwụlẹ wẹ rụnshi ikẹn e wẹhẹ erere, kanị ikuhụ oku sụọ e mẹ ịhịan a wụ ogbẹnnyẹ.

²⁴ Amamihiẹn ndị marịn ihiẹn wụ ugọn isi wẹ, kanị nzuzu ndị-nzuzu kẹ wẹ gi a marịn ndị-nzuzu.

²⁵ Ọshẹri hụn e ku ezioku a zụọpụha ịhịan, kanị ọshẹri-ntụ e dufie ịhịan.

²⁶ Onyẹ hụn a tụ egun Osolobuẹ e nwọngụọ nwan ebe ọ gbaban, ebẹhụ kẹ ụmụ a k'a gbabanzịkwọ.

²⁷ Ịtụ egun Osolobuẹ kẹ ndụn gha a pụha nọkẹ kẹ mirin dọn a gbapụha isi-mirin; o mẹ ịhịan adanlẹ ọnyan-ọnwụn.

²⁸ Ndị bu ọda eze rị a kị wụ ọghọ a, kanị omẹni ndị w'a kị arịa, nke onyẹ ọkịkị a gụ.

²⁹ Onyẹ ndidin e nwọn nghọta ọda-ọda, kanị onyẹ e bukẹnrin onunu a ghọsị nzuzu.

³⁰ Obi ru alị e ye ẹhụ ikẹn, kanị iwe-ẹnya e mẹdẹ ọkpụkpụ ịhịan e rehi.

³¹ Onyẹ hụn e mẹgbu ndị igbẹnnyẹ rị e legberi Onyẹ keni wẹ, kanị onyẹ ọwụlẹ e mẹni ndị elu rị a fụ ọhụnma rị a gbaye Chuku.

³² Eje-ihiẹn eje-ịhịan mẹ e gbu ẹ; kanị ndị ezi-omumẹ nwọn ebe w'a gbaban wẹ nwụnhụndẹ.

³³ Amamihiẹn bi obi onyẹ nwọn uche, ọsụọn'a imẹ igunrun ndị nzuzu k'ọ rị, ọ ghọsị enwẹn ẹ aghọsị.

³⁴ Ezi-omumẹ e weshi anị elu, kanị njọ e buhẹni alị ifẹnrẹn.

³⁵ Odibo nwọn uche a sụọ eze asụọ, kanị olulu k'o gi e sọn hụn e mẹ ihiẹn ifẹnrẹn.