Itẹn 12 - Ika

Isi Nke Mmẹbụọ

¹ Onyẹ ọwụlẹ ọzụnzụn a sụọ, ịmarịn-ihiẹn a sụọzịkwọ a asụọ; kanị onyẹ ghalẹni a nị wẹ a gwa a oku wụ onyẹ-nzuzu.

² Ọhụnma kẹ Osolobuẹ e mẹni ezigbo ịhịan, kanị ikpe kẹ Osolobuẹ a ma onyẹ ẹro.

³ Onwọnni onyẹ e gi eje-obibi e turu; onwọnni onyẹ a saẹka e huepụ onyẹ ezi-omumẹ.

⁴ Ezigbo nwunyẹ wụ okpu-eze isi di ẹ, kanị nwunyẹ hụn e mẹ ihiẹn-ifẹnrẹn rị kẹ eje-emu rị di ẹ ọkpụkpụ.

⁵ Iroro rị mma kẹ onyẹ ezi-omumẹ a tụ, kanị ndụnmọdụn onyẹ eje-omumẹ e dufie edufie.

⁶ Oku-ọnụ ndị eje-omumẹ rị e che wẹ nọkẹ onyẹ warịnị e che n'o gbu ịhịan; kanị ọzụọpụha kẹ oku-ọnụ ndị ezi-omumẹ a zụọpụha wẹ.

⁷ W'e tikpọ ndị eje-omumẹ, a gụ wẹ, kanị ikpụnọ ndị ezi-omumẹ e turusọnmẹ.

⁸ Kẹ ịhịan marịnhan ihiẹn kẹ w'a jahan a mma, kanị w'e legberi ndị e ro ahan-ahan e legberi.

⁹ Ọ ka mma n'i mẹ nọkẹsị onwọnni onyẹ ị wụ bụ y'e nwọnghọdẹ odibo hụn e fen'i, karị imẹ nọkẹsị ịwụ okẹn ịhịan bụ nni-ọnụ arịa.

¹⁰ Onyẹ ezi-omumẹ e lepụdẹ anụ a ẹnya, kanị ọhụnma onyẹ eje-omumẹ a nọdẹ kẹ ẹfọ-njọ.

¹¹ Onyẹ hụn a rụn ugbo ẹ k'a hụn ihiẹn-oriri ọhụnma-ọhụnma, kanị onyẹ hụn a chụsọnmẹ ihiẹn rịlẹni mkpa enwọn uche.

¹² Ẹnya ndị eje-omumẹ a rịsọnmẹ ihiẹn w'a kwanarịn ịhịan, kanị ndị ezi-omumẹ a gbasọnmẹ mkpọgụn wẹ ọhụnma-ọhụnma.

¹³ Eje-ihiẹn gha eje-ịhịan ọnụ a pụha a nwụndọn ẹ nọkẹ ọnyan, kanị ọwanahịn kẹ onyẹ ezi-omumẹ a wanahịn nsọngbu.

¹⁴ Oku-ọnụ ịhịan e mẹ ihiẹn rị mma e jun ẹ ẹka, nọkẹ kẹ ọrụn-ẹka ịhịan dọnzi e ye ẹ ihiẹn.

¹⁵ Onyẹ-nzuzu ro n'ọ marịnka, kanị onyẹ marịn ihiẹn a nụ ndụnmọdụn a nụ.

¹⁶ Onyẹ nzuzu a ghọsị iwe rị e wen'ẹ ozigbo-ozigbo, kanị onyẹ nwọn uche e wepụzị ẹnya wẹ kpari ẹ.

¹⁷ Ezigbo ọshẹri e ku ihiẹn mẹni, kanị ọshẹri-ntụ e ku ihiẹn mẹlẹni.

¹⁸ Oku-ọnụ onyẹ e kugụ d'e ro e wu kẹ ọpịa-agha, kanị oku-ọnụ ndị marịn ihiẹn e mẹ ịhịan a dịnhịn.

¹⁹ Ọnụ e ku ezioku a tọ jẹnrin-ejẹn, kanị ire a tụ ntụ a tọhụ ẹkẹrẹ sụọ.

²⁰ Ẹro, ịya rị obi ndị e romẹ eje-ihiẹn, kanị ịghọghọ wụ nke ndị a chọ ọrịrịmma ịhịan.

²¹ Eje-ihiẹn ara kunrun ndị ezi-omumẹ, kanị ndị eje-omumẹ a hụn nsọngbu a hụnjun ẹnya.

²² Ire a tụ ntụ wụ arụ ebe Osolobuẹ rị, kanị ndị e ku ezioku a sụọ a ụsụọ.

²³ Onyẹ nwọn uche ma e kuhọdụ, kanị onyẹ nzuzu e hupụha ihiẹn ọ marịn nọkẹ nzuzu.

²⁴ Ndị ẹka shi ikẹn k'a kị, kanị onyẹ kụtọpụ ẹka k'e họnrin igbọn.

²⁵ Uhue a nyịntu ịhịan nọkẹ ibu, kanị oku rị mma a gba a umẹ.

²⁶ Onyẹ ezi-omumẹ a chọsọnmẹ ọwụ a, kanị onyẹ eje-omumẹ e duhuhu ọwụ a.

²⁷ Onyẹ ẹka-nkụtọpụ ara sadẹ ẹka shimẹ anụ o gbu, kanị onyẹ ẹka shi ikẹn ara gi ihiẹn ọ rụn gu egu.

²⁸ Ụzọ ezi-omumẹ kẹ ndụn rị; ọnwụn arị ụzọ ahụn.