Itẹn 11 - Ika

Isi Nke Mmanaị

¹ Igi mkpu rịlẹni mma zụ afịa wụ arụ ẹnya Osolobuẹ kanị ezigbo mkpu a sụọ a ụsụọ.

² Nhọnrọn bịa, ịfa a bịa, kanị onyẹ welụa enwẹn ẹ alị, o nwọnrin uche.

³ Ezi-omumẹ ndị ezi-omumẹ e du wẹ, kanị ẹro ndị ghẹrẹ-ghẹrẹ-ghẹrẹ k'e tikpọ wẹ.

⁴ Akụ-lẹ-ụba ara zụọpụha ịhịan ẹka Osolobuẹ, kanị ezi-omumẹ a napụdẹ ịhịan ọnwụn.

⁵ Ezi-omumẹ ndị nwọnlẹni nkọrịanị e beyeni wẹ ụzọ zinrinni, kanị eje-ihiẹn ndị eje-omumẹ e mẹ wẹ a dan.

⁶ Ezi-omumẹ ndị ezioku a zụọpụha wẹ, kanị ihiẹn hụn a la onyẹ ihunnaị ẹnya a nwụndọn ẹ kẹ ọnyan.

⁷ Eje-ịhịan nwụnhụn, ihiẹn ọ rị a tụ ẹnya a a la; ihiẹn ile o te ro ni ẹka a k'e mẹn'ẹ a la.

⁸ Ọzụọpụha kẹ w'a zụọpụha onyẹ ezi-omumẹ imẹ nsọngbu, kanị ọdanye kẹ eje-ịhịan a danye ẹ.

⁹ Onyẹ ghalẹni a tụ egun Osolobuẹ gi ọnụ e wiwi ibe ẹ, kanị amamihiẹn kẹ onyẹ ezi-omumẹ gi a wanahịn.

¹⁰ Ezigbo ịhịan gha ihun, obodo a ghọghọ, kanị eje-ịhịan nwụnhụn, obodo e yi oro ịghọghọ.

¹¹ Ngọzi onyẹ ezi-omumẹ kẹ obodo gi a gha ihun, kanị ọnụ ndị eje-omumẹ kẹ obodo gi a dan.

¹² Onyẹ e lelịa ibe ẹ enwọn uche, kanị onyẹ nwọn nghọta e kwọndọn ire ẹ.

¹³ Ọghẹlẹ ara zuemẹ oku, kanị onyẹ furu wẹ gi e dọn ẹnya e zuemẹ oku.

¹⁴ Omẹni ndụnmọdụn arịa, alị a dan, kanị ndị ndụnmọdụn bu ọda, mmẹri a bịa.

¹⁵ Onyẹ hụn biyeni onyẹ ọ marịnlẹni ẹka k'a tarịrị afụnfụn, kanị onyẹ ghalẹni e biyeni ịhịan ẹka enwọnkọ nsọngbu.

¹⁶ Okpoho ẹfọma e nwọnhẹn mgbaye, kanị ọdanfịn sụọ kẹ ikẹnnyẹ ẹka-ikẹn e hi.

¹⁷ Onyẹ e mẹ ọhụnma rịzị e mẹni enwẹn ẹ, kanị onyẹ ẹfọ-njọ rịzị e buhẹni enwẹn ẹ nsọngbu.

¹⁸ Ụgwọ-ọrụn a la iwi kẹ eje-ịhịan e nwọnhẹn, kanị ezigbo ụgwọ-ọrụn kẹ onyẹ a kụnye ezi-omumẹ a ghọrị.

¹⁹ Ezigbo onyẹ ezi-omumẹ e nwọnhẹn ndụn, kanị onyẹ hụn a chụsọn eje-ihiẹn a la mmọn.

²⁰ Onyẹ e ro eje-ihiẹn rụ arụ ẹnya Osolobuẹ, kanị ndị obibi wẹ nwọnlẹni nkọrịanị a sụọ a ụsụọ.

²¹ Kweri ọnwan, kweshi ẹ ikẹn: Ndị eje-omumẹ alakọ mmaka, kanị nzụọpụha lalanịnị ndị ezi-omumẹ.

²² Ezin yi ọla goru imi lẹ okpoho ma mma ghalẹni e gi uche e bi wụ ohu.

²³ Ihiẹn hụn rị a gụn onyẹ ezi-omumẹ e wẹhẹ ihiẹn rị mma sụọ, kanị ihiẹn onyẹ eje-omumẹ rị a tụ ẹnya e wẹhẹ ọnụma Osolobuẹ.

²⁴ O nwọn onyẹ a ha ẹka bụ ọ hụ e nwọncheni; hụn-ẹbọ hụ e mẹ atịtịn a dan ogbẹnnyẹ.

²⁵ Onyẹ a ha ẹka k'a gha ihun; onyẹ hụn e ye ndị ọzọ mirin a ra k'a hụnzị onyẹ e ye ẹ mirin a ra.

²⁶ Ọnụ kẹ w'a bụ onyẹ e butọ ihiẹn-oriri kẹni ọ kọma n'o re ẹ ụṅanranmị, kanị w'a gọzisọnmẹ onyẹ hụn e kweri e re.

²⁷ Onyẹ e shi ọnwụn nị ihiẹn rị mma, ọhụnma kẹ wẹ e mẹn'ẹ, kanị onyẹ hụn kpachanpụ ẹnya a chọ njọ, ịya k'ọ hụn.

²⁸ Onyẹ ọwụlẹ gi ihiẹn o nwọn dọn ẹnya k'a dan, kanị onyẹ ezi-omumẹ k'a nọ kẹ ẹhụhụọ-oyiyi.

²⁹ Onyẹ hụn e buhẹni ikpụlọ a nsọngbu ufere k'a wụ ukuu ẹ; onyẹ-nzuzu k'a wụrụ odibo onyẹ nwọn uche.

³⁰ Elu onyẹ ezi-omumẹ wụ osisi e ye ndụn; onyẹ ma nwọnhẹn obi ịhịan a marịnghọ ihiẹn.

³¹ Ndị ezi-omumẹ hụ e nwọnhẹn ụgwọ-ọrụn ezi-omumẹ wẹ elu-ụwanị, ọrịwụzị ndị-ejẹ lẹ ndị-njọ!