Itẹn 10 - Ika

Isi Nke Iri Itẹn Solomọnụ

¹ Ndịnị wụ itẹn Solomọnụ: Nwa marịn ihiẹn e wẹhẹni nẹdi ẹ ịghọghọ — kanị nwa nzuzu e wẹhẹni nnẹ ẹ ẹkwan.

² Eje akụ-lẹ-ụba ara ban erere, kanị ezi-omumẹ a gbapụha ịhịan ẹka ọnwụn.

³ Osolobuẹ ara nị onyẹ ezi-omumẹ e bu ẹgụn — kanị ara buchedẹ ẹnya ihiẹn rị a gụn eje-ịhịan.

⁴ Ẹka-nkụtọpụ e mẹ ịhịan a dan ogbẹnnyẹ, kanị ẹka shi ikẹn e wẹhẹ akụ-lẹ-ụba.

⁵ Onyẹ hụn gi ogẹn anwụn a ghọkikomẹ ihiẹn-ugbo wụ nwa nwọn uche, kanị hụn a ranhịn ogẹn wẹ gi e we ihiẹn-ugbo wụ nwa ụya.

⁶ Ngọzi ngọzi rị isi onyẹ ezi-omumẹ, kanị ntikpọ ntikpọ warị ọnụ eje-ịhịan.

⁷ Ịnyanhan onyẹ ezi-omumẹ wụ ngọzi, kanị ẹfan eje-ịhịan k'e rehi.

⁸ Onyẹ hụn e rokpọ ihiẹn e gọn ntịn ihiẹn wẹ sị a mẹ, kanị onyẹ ghalẹni e rokpọ d'e ku k'a la iwi.

⁹ Onyẹ e dọnmẹ ẹka a ọchan jẹnkọnị, obi e rusọnmẹ ẹ alị, kanị wẹ k'a nwụn onyẹ ghẹrẹ-ghẹrẹ-ghẹrẹ.

¹⁰ Onyẹ hụn e mi ẹnya e buhẹ nsọngbu; onyẹ e ku fom-fom k'a la iwi.

¹¹ Ọnụ onyẹ ezi-omumẹ wụ isi-mirin e ye ndụn, kanị oku a rụ ẹhụ jun eje-ịhịan ọnụ.

¹² Iwe iwe-ịhịan e se ikpe, kanị ihiẹn-ọsụsụọ e kpumẹdẹ ihiẹn wẹ mẹ ịhịan.

¹³ Amamihiẹn kẹ w'a nụ ọnụ onyẹ nwọn nghọta, kanị mkpịnsịn kẹ w'a fịan onyẹ nwọnlẹni uche azụụn.

¹⁴ Onyẹ marịn ihiẹn e dọnmẹtọ amamihiẹn nọkẹ akụ-lẹ-ụba, kanị owiwi kẹ ọnụ onyẹ-nzuzu e wezụhan.

¹⁵ Akụ-lẹ-ụba ọdanfịn kẹ o gi e che ẹhụ, ihiẹn ogbẹnnyẹ nwọnlẹni e wiwi ẹ ihiẹn.

¹⁶ Erere ndị ezi-omumẹ wụ ndụn, kanị erere ndị eje-omumẹ wụ afụnfụn njọ.

¹⁷ Onyẹ hụn e gọn ntịn wẹ gha a zụn a rị ụzọ ndụn, kanị onyẹ ghalẹni a nị wẹ a gwa a oku a kpahugụọ.

¹⁸ Onyẹ zuemẹ iwe rị a ẹfọ, oku-ọnụ a wụ ntụ-ntụ; onyẹ a ghahunmẹ e kuja oku ịhịan wụ onyẹ-nzuzu.

¹⁹ Njọ ara kọ ebe ọtụtụ oku rị, kanị onyẹ hụn nwọn uche e kwọndọn ire ẹ.

²⁰ Oku-ọnụ onyẹ ezi-omumẹ wụ ezigbo-siliva, kanị uche onyẹ eje-omumẹ enwọn ihiẹn ọ wụ.

²¹ Oku-ọnụ ndị ezi-omumẹ e ye ndị bu ọda ihiẹn-oriri, kanị ndị nzuzu a nwụnhụndẹ makẹni uche arịa.

²² Ngọzi Osolobuẹ e mẹ ịhịan a wụrụ ọdanfịn ara we nsọngbu e chen'ẹ.

²³ Eje-ihiẹn a sụọ onyẹ-nzuzu ụsụọ omumẹ, ẹrịra kẹ amamihiẹn a sụọzị onyẹ nwọn nghọta.

²⁴ Ihiẹn a tụ onyẹ eje-omumẹ egun jẹnkọ d'e kunrun ẹ; ihiẹn rị a gụn onyẹ ezi-omumẹ jẹnkọ d'e ru ẹ ẹka.

²⁵ Okẹn ẹbi kpọghafegụ, w'a ra hụnzị ndị eje-omumẹ, kanị ndị ezi-omumẹ e turusọnmẹ.

²⁶ Kẹ ẹlumẹ-ntịtị e gigihi eze lẹ kẹ ẹnwụnrụn a rị ẹnya, ẹrịra kẹ onyẹ-nzụnzụn a rị ẹka ndị zi ẹ ozi.

²⁷ Egun Osolobuẹ e mẹ ịhịan a tọcheni, kanị onyẹ eje-omumẹ a nwụnchudẹ.

²⁸ Onyẹ ezi-omumẹ k'a hụn ihiẹn ọ rị e lee ẹnya a, ghọghọ, kanị onyẹ eje-omumẹ ahụnkọ ihiẹn ọ rị e lee ẹnya a.

²⁹ Ụzọ Osolobuẹ e chedọn ndị e dọnmẹ ẹka wẹ ọchan, e tikpọzịkwọ ndị e mẹ eje-ihiẹn.

³⁰ Onwọnni ogẹn w'e gi huepụ ndị ezi-omumẹ, kanị ndị eje-omumẹ ahọdụkọ anị.

³¹ Amamihiẹn kẹ ọnụ onyẹ ezi-omumẹ e wepụha, kanị obepụ kẹ wẹ k'e bepụ ire hụn e ku eje-ihiẹn.

³² Ọnụ ndị ezi-omumẹ amarịnghọ ihiẹn furu w'e ku, kanị ihiẹn furulẹni sụọ kẹ ire ndị eje-omumẹ ma ku.