Ihiẹn Mẹni Nke Ẹbụọ 8 - Ika

Isi Nke Ẹsatọ Ihiẹn Ndị Ọzọ Solomọnụ Mẹ

¹ Ahụa ọgụn kẹ Solomọnụ gi rụn ụlọ-nsọ Osolobuẹ lẹ obi-eze nke ẹ. O mẹgụ,

² Solomọnụ nọ rụndọnzi ụmụ obodo ndị hụ Hiram eze Taya ye ẹ. O dọnzigụ wẹ, ọ nọ bu ndị Izrẹlụ che imẹ wẹ biri.

³ Solomọnụ nọ jẹn obodo Hamatị-Zoba, gi ikẹn weri ẹ.

⁴ Ọ nọzị tụn Tad'mọ rị imẹ alị ọkpọ-nkụn ọhụnma, ịya lẹ obodo ndị o butọ ihiẹn, hụn ọ tụnzị imẹ alị Hamatị.

⁵ Ọ tụndọnzi obodo Bẹt-Họrọnụ rị Ugu lẹ Bẹt-Họrọnụ rị Mkpọtu oke, tụnhunmẹ wẹ mgbọn, buche wẹ ọnụ-mgbọn wẹ gi igwe e fidọn;

⁶ ẹrịra k'o mẹzikwọ obodo Baalatị lẹ obodo ndị hụ o butọ ihiẹn lẹ obodo ndị hụ o butọ ụgbọ-ẹshin ẹ lẹ ndị o butọ ẹshin ẹ. Ọ tụn ihiẹn ọwụlẹ ọ chọ n'ọ tụn imẹ Jerusalẹm, imẹ Lẹbanọnụ lẹ ẹgbẹrẹ ile ọ kị.

⁷ Ndị ile wụlẹni ndị Izrẹlụ, ndị ahụn họdụ imẹ ndị Hẹti, ndị Amọ, ndị Pẹrẹzi, ndị Hivu lẹ ndị Jebusu,

⁸ ya wụ, mmụ wẹ ndị họdụ imẹ alị ndị Izrẹlụ, hụn ndị Izrẹlụ gbulẹni — uwẹ kẹ Solomọnụ gi họnrin igbọn a rụnn'a ọrụn. Ịya kẹ wẹ wụkwọ nwan d'e ru tannị.

⁹ Kanị, Solomọnụ egini ndị Izrẹlụ họnrin igbọn ọrụn a; uwẹ wụ ndị-agha a, ndị ọkị-agha a, ndị a kịn'a ụgbọ-ẹshin agha lẹ ndị a nyann'a ụgbọ-ẹshin.

¹⁰ Uwẹ wụzị ndị-isi ọrụn hụn a kịnị Solomọnụ ndị alị. Wẹ rị mmadụ iri kwasị ọgụn-mmẹbụọ (250).

¹¹ Solomọnụ a ghazịghọ Obodo hụ Defidi tụn, ebe Ẹkpẹti Osolobuẹ te rị, wepụha nwunyẹ ẹ wụ nwa Fẹro eze alị Ijiptu d'e biri imẹ obi-eze ọ tụnn'a, makẹni Solomọnụ sị, “Nwunyẹ m ebikọ imẹ obi-eze Defidi eze Izrẹlụ, makẹni ebe ile Ẹkpẹti Osolobuẹ banyeọlẹ rị nsọ.”

¹² Solomọnụ a chụnyesọnmẹni Osolobuẹ ẹjan w'a dụn ọkụn elu ukpo nchụn-ẹjan Osolobuẹ hụn ọ rụnye ihun ẹtu-ụlọ rị ihun Ụlọ-nsọ,

¹³ nọkẹ kẹ Mozizi dọn gwa wẹ imẹ Iwu nị w'a chụn ẹjan ụhụọhịn ichẹn-ichẹn, kẹ Ụhụọhịn Ezumikẹn kẹ Ifọn-Ọhụn kẹ Mmẹmmẹ ẹtọ hụ w'e mẹ ahụa-ahụa: Mmẹmmẹ Brẹdi Nwọnlẹni yisti o gi a fụ, Mmẹmmẹ Izuka-nke-ẹsa (Ịghọkwama Ihiẹn-ugbo) lẹ Mmẹmmẹ Ibi-imẹ-ọdụ.

¹⁴ Kẹni Solomọnụ mẹ ihiẹn nẹdi ẹ wụ Defidi sị wẹ mẹ, ọ nọ dọnmẹsọnmẹ ndị nchụn-ẹjan itu-itu wẹ k'a nọ rụn ọrụn wẹ, dọnmẹsọnmẹzi ndị Livaị itu-itu w'a nọ e du ẹbụ ịja-mma, e yezikwọnị ndị nchụn-ẹjan ẹka ọrụn ụhụọhịn ọwụlẹ ọ chọ. O dọnmẹsọnmẹzikwọ ndị e che nche ọnụ-mgbọn itu-itu w'a nọ che ọnụ-mgbọn ichẹn-ichẹn, makẹni ịya kẹ Defidi wụ odibo Chuku sị wẹ mẹ.

¹⁵ Onwọnni akpụ ihiẹn ohu eze sị wẹ mẹ gbashịarị ndị nchụn-ẹjan lẹ ndị Livaị hụn wẹ mẹlẹni; ẹrịra kẹ wẹ mẹzikwọ ihiẹn o ku banyeni ebe wẹ butọ ihiẹn rị mkpa.

¹⁶ Wẹ rụnchanrịn ihiẹn ile Solomọnụ sị wẹ rụn, gha ụhụọhịn wẹ gbe iyetọ Ụlọ-nsọ Osolobuẹ d'e ru n'a tụnchanrịn w'a. Ẹrịra kẹ wẹ dọn tụnchanrịn Ụlọ-nsọ Osolobuẹ.

¹⁷ Solomọnụ nọ shi Eziọnụ-Gẹba lẹ Ẹlatị (Ẹlọtụ) hụn rị mkpẹnrẹn Ohimin Ufie imẹ alị Ẹdọm.

¹⁸ Hiram nọ zijẹnn'ẹ ụgbọ-mirin ndị o zijẹnn'ẹ; ndị ọrụn Hiram marịn Ohimin ọhụnma-ọhụnma kịha wẹ. Ndịnị lẹ idibo Solomọnụ nọ wịrị gi ụgbọ-mirin shi alị Ofiri, gha ebahụn buru ẹkpa goru uku iri kwasị ọgụnnaị kwasị nnụ (450), buhẹni Eze wụ Solomọnụ ya.