Ihiẹn Mẹni Nke Ẹbụọ 5 - Ika

Isi Nke Isẹn

¹ Ogẹn Solomọnụ gi rụngụ ọrụn ile ọ rụn Ụlọ-nsọ Osolobuẹ, ọ nọ kpọnbanhan ihiẹn ndị ahụn nẹdi ẹ wụ Defidi gi kwanị Osolobuẹ: kẹ siliva kẹ goru kẹ ihiẹn ile ya lẹ wẹ wị, bu wẹ che ebe w'e dọnmẹ ihiẹn ndị hụ imẹ Ụlọ-nsọ Chuku.

E Buban Wẹ Ẹkpẹti-nkwerigbama Imẹ Ụnọ-nsọ

² Solomọnụ nọ kpọ ndị-ichẹn Izrẹlụ, ndị-isi ebọn ichẹn-ichẹn lẹ ndị kịsọnmẹ ikpụlọ imẹ Izrẹlụ, sị wẹ bịa Jerusalẹm, nị wẹ d'e buhẹ Ẹkpẹti Nkwerigbama Osolobuẹ hụn rị Zayọnụ, Obodo hụ Defidi tụn.

³ Ya kẹ ikẹnnyẹ Izrẹlụ ile nọ bịa d'e kunrun eze wụ Solomọnụ; ogẹn mmẹmmẹ wẹ e mẹ ifọn nke ẹsa kẹ wẹ gi zu.

⁴ Ogẹn ndị-ichẹn ile rị Izrẹlụ gi bịagụ, ndị Livaị nọ buru Ẹkpẹti-nkwerigbama,

⁵ bupụha Ẹkpẹti-nkwerigbama ahụn lẹ Ọdụ-ofufe w'a kpụkpọrị wẹ te e butọ a lẹ ihiẹn ile rị nsọ rị imẹ ẹ. Ndị nchụn-ẹjan nọ buru wẹ makẹni wẹ wụ ndị ebọn Livaị;

⁶ eze wụ Solomọnụ nkẹ lẹ Izrẹlụ hụ ile fihunmẹn'ẹ nọ buruni Ẹkpẹti ahụn ụzọ, e gi atụnrụn lẹ efin bugbu enwẹn wẹ ọda wẹ salẹni ẹka de mọbụ gụn, a chụn ẹjan.

⁷ Ndị nchụn-ẹjan nọ bubanhan Ẹkpẹti-nkwerigbama Osolobuẹ ọnọdị a, imẹ mmughẹ hụ kachanrịn imẹ a rị imẹ Ụlọ-nsọ, Ebẹhụ Kachanrịn Nsọ, okpuru nku ndị chẹrobu hụ.

⁸ Ndị mmọn-ozi hụ shịa nku kpu ebe Ẹkpẹti hụ rị, kpu Ẹkpẹti lẹ akp'osisi ndị ahụn wẹ gi e bu ẹ.

⁹ Akp'osisi ndị ahụn wẹ gi e bu ẹ sue ọda-ọda nke wụnị w'a ghadẹ ihun mmughẹ hụ ọ rị e legha isi wẹ azụụnnị lẹ azụụnnị hụn wẹ gi gha ebe Ẹkpẹti rị suepụha, kanị w'a ra gha ihun ezi legha wẹ; wẹ hụkwọ nwan ebahụn d'e ru tannị.

¹⁰ Onwọnni ihiẹn ọzọ rị imẹ Ẹkpẹti ahụn karị ibe ọmụma ẹbụọ hụ Mozizi buche imẹ ẹ kẹ Izrẹlụ rị ugu Horẹbụ wụ Saịnaị, ebẹhụ Osolobuẹ nọ tumẹ nkwerigbama hụn kwọngbama ya lẹ ndị Izrẹlụ kẹ wẹ ghagụ alị Ijiptu pụha.

¹¹ Ndị nchụn-ẹjan nọ nwan gha Ebahụn Rị Nsọ pụha. Ndị nchụn-ẹjan ile rị ebahụn fepụ ẹhụ kẹ Chuku dọn gwa wẹ, mẹgbama mmẹmmẹ hụ, etuni wẹ itu onyẹ rị.

¹² Ndị Livaị ile hụn a kụ egu wuzo ihun ukpo nchụn-ẹjan, nkọ ọwụwa-ẹnyanwụn — kẹ Asafụ kẹ Hẹmanị kẹ Jedutunu kẹ ụmụ wẹ lẹ mmunẹ wẹ. Wẹ ile yi ẹkwa linẹ riẹnni, a kụ ibe kpajaị (simbalụ), a kpọ ụbọ-layẹ lẹ ụbọ-hapụ. Wẹ lẹ ndị nchụn-ẹjan ọgụn-isin rị e gbu opi wị.

¹³ Ndị rị e gbu opi lẹ ndị ọkụ-ẹbụ nọgbama, e gi olu ohu a ja Osolobuẹ mma, a kpanmịn a, e gi opi lẹ kpajaị lẹ ihiẹn-egu ndị ọzọ a kpọ egu, e weshi olu elu a ja Osolobuẹ mma, a bụ ẹbụnị: “Ọ rịka mma; ihiẹn-ọsụsụọ a rị jẹnrin ejẹn.” Ogẹn hụ kẹ orukpu gi jun Ụlọ-nsọ Osolobuẹ,

¹⁴ orukpu hụ anịzịnị ndị nchụn-ẹjan rụn ọrụn wẹ, makẹni ọghọ rị Osolobuẹ wụ Chuku ẹhụ e jungụọ Ụlọ-nsọ Chuku.