Ihiẹn Mẹni Nke Ẹbụọ 4 - Ika

Isi Nke Ẹnọ Ihiẹn Ndị rị Ụlọ-nsọ

¹ O gi igwe-bronzu mẹmẹ ukpo nchụn-ẹjan, usue ẹ wụ ọb'ụkụ iri kwasị ọgụn, ụshịa a wụ ọb'ụkụ iri kwasị ọgụn, ojijẹn-elu ẹ wụ ọb'ụkụ mmisẹn.

² O gi igwe-bronzu kpụ tankị uku w'a kpọ “Ohimin”; o mẹ ohi-ohi; ọnụ a wụ ụbụkụ mmisẹn — gha azụụnnị d'e ru azụụnnị, ojijẹn-elu ẹ wụ ụbụkụ ẹsa-lẹ-mkpikpi; ụbụkụ isẹn kwasị ọgụnnaị k'ọ wụ wẹ gha a ohi-ohi.

³ Okẹn-efin wẹ kpụ rịsọnmẹ ẹhụ tankị okpuru ọnụ a. Okẹn-efin iri-iri rịsọnmẹ imẹ ọb'ụkụ ohu-lẹ-mkpikpi ọwụlẹ; wẹ dọn okẹn-efin ndịnị ogele ẹbụọ; wẹ kpụgbama efin ndị hụ lẹ tankị hụ, Ohimin hụ.

⁴ Elu okẹn-efin mmẹbụọ wẹ gi igwe-bronzu kpụ kẹ Tankị hụ rị: ẹtọ bu ihun zinmẹ ẹbamịn-ugu, ẹtọ e bu ihun zinmẹ ẹbamịn ọdịdan-ẹnyanwụn; ẹtọ, ẹbamịn ndịdan-mirin; ẹtọ, ẹbamịn ọwụwa-ẹnyanwụn. Elu wẹ kẹ tankị “Ohimin” rị; ikẹn wẹ ile rị okpuru ẹ.

⁵ Ulu ẹ han kẹ ọb'ẹka ohu; wẹ gbi ọnụ a nọkẹ ọnụ-mkpu, nọkẹ obobo lili. O ripụ galọnụ mirin nnụ-uku mmisin lẹ mkpikpi (16,500).

⁶ O mẹmẹ afẹrẹ iri wẹ gi a chanchan ihiẹn, bu isẹn che nkọ ẹbamịn ndịdan-mirin, buzi isẹn che ẹbamịn-ugu. Imẹ wẹ kẹ wẹ nọ a ṅanchan ihiẹn ndị wẹ gi a chụn ẹjan w'a dụn ọkụn, kanị Tankị uku hụ wụ Ohimin kẹ ndị nchụn-ẹjan gi a chanchan ẹhụ.

⁷ O mẹmẹ obu-ukpẹ iri kẹ Osolobuẹ sị wẹ mẹmẹ wẹ, bu wẹ che imẹ Ụlọ-NSỌ: isẹn ẹbamịn ndịdan-mirin, isẹn ẹbamịn-ugu.

⁸ O mẹmẹ teburu iri, bu wẹ che imẹ Ụlọ-NSỌ: isẹn rị ẹbamịn ndịdan-mirin, isẹn rị ẹbamịn-ugu. O mẹmẹzi afẹrẹ goru ọgụn-isẹn wẹ gi e fekpu ihiẹn.

⁹ O mẹmẹ ezi-ọgwa hụn ndị nchụn-ẹjan nọ a rụn ọrụn wẹ lẹ ezi-ọgwa ọzọ hụn shịanị lẹ ọnụmụzọ ndị rịn'a, gi igwe-bronzu nyankwama ọnụmụzọ ndị hụ.

¹⁰ O bu “Ohimin”, Tankị hụ, che ẹbamịn ọdịdan-ẹnyanwụn ihun ụlọ-nsọ, ebe mgbọn nọ gbugi azụụn hụ.

¹¹ Huram-Abi mẹmẹsọnmẹzi ite, ọsẹkẹn-nta lẹ afẹrẹ ndị wẹ gi e fekpu ihiẹn. Ẹrịra kẹ Huram dọn rụnchanrịn ọrụn ile Solomọnụ buye ẹ imẹ ụnọ-nsọ Chuku, hụn wụ ndịnị:

¹² Adansụn ẹbụọ, isi-adansụn ndị rị elu adansụn ndị hụ ẹhụ wẹ fụpụha kẹ ugbẹgbẹ, ẹgan ndị wẹ kpagbama wẹ gi chọ isi-adansụn ẹbụbụọ hụ mma;

¹³ ogbe pomegraneti nnụ ahụn wẹ kpụ che ẹgan ndị ahụn wẹ kpagbama. (Ogele pomegraneti ẹbụọ kẹ wẹ gi chọ ẹgan rị adansụnnị mma, gizi ẹbụọ chọ ẹgan rị hụn ẹbọ mma);

¹⁴ lẹzi trọkụ hụ e bu afẹrẹ lẹ afẹrẹ wẹ iri;

¹⁵ lẹ Tankị “Ohimin” lẹ okẹn-efin mmẹbụọ wẹ kpụ rị okpuru ẹ;

¹⁶ lẹzi ite lẹ ọsẹkẹ lẹ ndụndụn anụ lẹ ihiẹn ile ya lẹ wẹ wị. Igwe bronzu wẹ finchanpụ ọhụnma-ọhụnma kẹ Huram-Abi gi mẹmẹni Eze wụ Solomọnụ ihiẹn ndịnị ile wẹ gi a rụn ọrụn imẹ Ụlọ-nsọ Osolobuẹ.

¹⁷ Kẹ eze dọn gwa wẹ, ụrụa kẹ wẹ gi kpụgụ wẹ, wẹ nọ hu igwe-bronzu ye imẹ ụrụa hụ, gi kpụ wẹ; ebe alị nọ riẹn mkpẹnrẹn Iyi Jọdanị, ẹgbata Sukọtụ lẹ Zarẹtanị kẹ wẹ nọ kpụ wẹ.

¹⁸ Ihiẹn ndịnị ile Solomọnụ mẹmẹ e hikẹmẹkẹ, nke wụnị amazịnị wẹ igwe-bronzu bann'a.

¹⁹ Solomọnụ mẹmẹchanrịnzịkwọ ihiẹn ndịnị ile rị imẹ Ụlọ Osolobuẹ: Ukpo nchụn-ẹjan goru, teburu goru wẹ gi e butọnị Osolobuẹ Brẹdi;

²⁰ lẹ obu-ukpẹ goru ndị hụ lẹ ukpẹ wẹ hụn wẹ gi ezigbo goru wẹ buchelẹni ihiẹn ọzọ mẹmẹ, hụn a nọ ihun Ebẹhụ Kachanrịn-nsọ rịchanrịn imẹ, e nwun. Wẹ mẹhụ kẹ Iwu Osolobuẹ dọn ku ẹ;

²¹ lẹ obobo goru ndị ahụn lẹ ukpẹ ndị ahụn lẹ akpa ndị hụ wẹ gi e biri ọkụn. Goru wẹ buchelẹni ihiẹn ọzọ kẹ wẹ gi mẹmẹ ndịnị ile,

²² uwẹ lẹ nwa-mbu, afẹrẹ ndị hụ wẹ gi e fekpu ihiẹn, afẹrẹ ndị ọzọ lẹ afẹrẹ ndị wẹ gi e weri ọkụn lẹzi ẹkwe rị ọnụmụzọ pụ Ebe Kachanrịn Nsọ lẹ ẹkwe ndị rị Mmughẹ kanị wẹ bu ụzọ e ru: goru wẹ buchelẹni ihiẹn ọzọ kẹ wẹ gi mẹmẹ wẹ ile.