Ihiẹn Mẹni Nke Ẹbụọ 3 - Ika

Isi Nke Ẹtọ Solomọnụ A Tụn Ụnọ-nsọ

¹ Ịya kẹ Solomọnụ nọ rụnma Ụlọ Osolobuẹ elu Ugu-Moria rị imẹ Jerusalẹm, ebẹhụ Osolobuẹ nọ we enwẹn ẹ ghọsị Defidi nẹdi ẹ, ebẹhụ Defidi butọ wẹ k'a rụnye ẹ, ebẹhụ Ọnanị (Arụana) onyẹ Jebusu te nọ a kụkpọ ọka.

² Hụn mẹ ẹ akp'ọhịn ẹbụọ imẹ ifọn nke ẹbụọ imẹ ahụa nke ẹnọ ọ kịma k'ọ tụnma a.

³ Ọnwan wụ usue lẹ ụshịa iyetọ Solomọnụ gbeni Ụlọ-nsọ Chuku: usue ẹ wụ ọb'ụkụ iri kwasị ọgụn-ẹnọ, ụshịa a ọb'ụkụ iri kwasị ọgụn. (Wẹ gi ihiẹn wẹ gi a ma ihiẹn mbụ ma a).

⁴ Ẹtu-ụlọ rị ibe ihun Ụlọ-nsọ hụ. Ụshịa a wụ ụbụkụ iri kwasị ọgụn, hụn wụ ụshịa Ụlọ-nsọ ahụn; ojijẹn-elu ẹ wụ ụbụkụ ọgụn. Solomọnụ gi ezigbo goru wẹ buchelẹni ihiẹn ọzọ nyankwama imẹ ẹ.

⁵ Osisi bẹroshi zeni k'o gi makwama mmughẹ kanị rịn'a, gi ezigbo goru nyankwama a, tụyesọnmẹ nkụ lẹ ẹgan gi chọ a mma.

⁶ O gizi ọmụma pụ-ichẹn w'a chọ achọ chọsọnmẹ ụlọ-nsọ hụ mma. Goru alị Pavaịm k'o gi rụn ihiẹn o gi goru rụn imẹ Ụlọ-nsọ.

⁷ O gizi goru nyanchanrịn ifiri lẹ amanran-ụzọ lẹ ụsụọ-ẹjan lẹ ẹkwe ụnọ-nsọ hụ, ọ nọ tụsọnmẹ chẹrobu nwọn nku ye ụsụọ-ẹjan a ile.

⁸ O mẹmẹ Ebe Kachanrịn Nsọ, ụshịa wụ ụshịa Ụlọ-nsọ hụ; k'ọ shịahan k'o suehan: ụbụkụ iri kwasị ọgụn. Goru jun ẹkpa uku ọgụn-iri kwasị nnụ (600) k'o gi nyan a.

⁹ Ntu-goru rịn'a nyịnkarị pam ohu. Goru k'o gizi nyan mmughẹ ndị rị ibe elu ẹ.

¹⁰ Ọ kpụ ndị chẹrobu ẹbụọ imẹ Ebahụn Kachanrịn Nsọ, gi goru nyankwama wẹ ẹbụbụọ

¹¹ Nku ẹnọ ndị chẹrobu ẹbụbụọ hụ wụ ọb'ụkụ iri kwasị ọgụn, omẹni wẹ magbama wẹ. Nku ohu mmọn-ozi ibuzọ wụ ọb'ụkụ ẹsa lẹ mkpikpi, ọ sụntụ ụsụọ ẹjan; nku hụn rị a azụụn hụn ẹbọ wụ ọb'ụkụ ẹsa lẹ mkpikpi, ọ sụntụ nke mmọn-ozi hụn ẹbọ.

¹² Ẹrịra kẹ hụn ẹbọ rịzị: nku ẹ ohu wụ ọb'ụkụ ẹsa lẹ mkpikpi, ọ sụntụ ụsụọ ẹjan azụụn hụn ẹbọ, nku ẹ hụn ẹbọ wụzị ọb'ụkụ ẹsa lẹ nkirishi, ọ sụntụ nke mmọn-ozi ibuzọ.

¹³ Nku wẹ ndịnị ile wụ ụbụkụ iri kwasị ọgụn. Ndị chẹrobu hụ wuzo ọtọ ebẹhụ wẹ rị, bu ihun zinmẹ ebe wẹ gha a banhan.

¹⁴ Ihiẹn o gi mẹmẹ Ẹkwa wẹ gi a tankin Ebẹhụ Kachanrịn nsọ wụ ẹkwa rị e nwun bru lẹ nke pọpụ lẹ nke ododo lẹ ẹkwa linẹni riẹnni, ọ kpa ndị chẹrobu ye ẹkwa hụ.

¹⁵ Ọ kpụ adansụn ẹbụọ ihun Ụlọ-nsọ: usue wẹ wụ ụbụkụ mmẹbụọ lẹ mkpikpi kwasị ọgụnnaị. Isi-adansụn ohu-ohu rị elu adansụn ẹbụbụọ ndị hụ, ohu-ohu imẹ wẹ wụ ụbụkụ ẹsa lẹ mkpikpi.

¹⁶ Ọ nọ mẹmẹ ẹgan ndị wẹ kpagbama imẹ mmughẹ hụ rịchanrịn imẹ, bu wẹ che elu adansụn ndị hụ, gi chọ wẹ mma. Ọ kpụ ogbe pomegraneti ọgụn-isẹn, buchesọnmẹ wẹ elu ẹgan ndị ahụn.

¹⁷ O tumẹ adansụn ndị hụ ye ihun Ụnọ-NSỌ: ohu rị ẹbamịn ndịdan-mirin; ohu, ẹbamịn-ugu. Ọ nọ kpọ hụn rị ẹbamịn ndịdan-mirin “Jakini”, kpọ hụn rị ẹbamịn-ugu “Bụazị”.