Ihiẹn Mẹni Nke Ẹbụọ 2 - Ika

Isi Nke Ẹbụọ Solomọnụ A Kịkwamama Ihiẹn O Gi Tụn Ụlọ-nsọ

¹ Solomọnụ nọ kwademẹ n'ọ tụn Ụlọ-nsọ makẹ Ẹfan Osolobuẹ, tụnrụnzịkwọ obi-eze.

² Ya Solomọnụ nọ gụnpụha mmadụ nnụ-uku iri-kwasị-ọgụn ẹtọ (70,000) hụn k'a gha e bu ibu, mmadụ nnụ-uku ọgụn-ẹnọ (80,000) k'a rị e jẹn d'e bepụha ọmụma elu ugu lẹ mmadụ nnụ-itenẹi (3,600) k'a kị ndị ọrụnnị.

³ Ya Solomọnụ nọ zi ozini jẹnni Hiram wụ eze Taya: Sị a, “Zihẹni m ogwe sida k'i dọn mẹni nẹdi m wụ Defidi ogẹn ahụn i gi zihẹn'ẹ sida o gi tụn obi-eze ẹ.

⁴ M jẹnkọ nwan d'a tụn Ụlọ-nsọ makẹ Ẹfan Osolobuẹ wụ Chuku m, we ẹ kwan'a, nị w'a nọ a a mụn'a nsẹnsi e shin ọhụnma, e bu brẹdi w'e wepụhan'a ogẹn ile a tọn'a ebẹhụ; nị w'a nọzị ebahụn a chụnyen'ẹ ẹjan ndị w'a dụn ọkụn ụtụntụn lẹ ẹnyasị ile lẹ ụhụọhịn Ezumikẹn lẹ Ifọn-Ọhụn ile lẹ ogẹn mmẹmmẹ ndị wẹ tumẹsọnmẹ hụn wẹ mẹni Osolobuẹ wụ Chuku ẹnyi. Ọnwan wụ ọdịnalị o sị ndị Izrẹlụ k'e mẹferi.

⁵ “Ụlọ-nsọ hụ m jẹnkọ d'a tụn k'a wụ okẹn ụlọ-nsọ, makẹni Chuku ẹnyi ka mmọn-lẹ-iyi ile.

⁶ Kanị, onyẹ k'a sadẹ nwan ẹka tụnnị Chuku ẹnyi ụlọ, ebe o mẹni kẹ igwereni kẹ hụn kachanrịndẹ elu e jẹn asakọ ẹka ru ẹ? Onyẹ kẹ m wụ nwan? Ụlọ ọwụlẹ m k'a tụnn'a, ọ karịkọ ebe w'a nọ chụnn'a ẹjan.

⁷ “Zihẹzini m nwan ọkaa ma kpụ goru lẹ siliva lẹ igwe-bronzu lẹ igwe-mmaka, hụn mazị gi oruru e nwun pọpụ, oruru ododo lẹ oruru bru kpa ẹkwa, mazị deye ihiẹn elu igwe lẹ ọmụma, n'o d'a rụnyeni ndị omẹ-nka m rị imẹ Juda lẹ Jerusalẹm ọrụn, ndị Defidi nẹdi m butọ makẹ ọrụn hụ.

⁸ “Y'a ghazị Lẹbanọnụ zihẹni m osisi sida lẹ osisi-paịnị lẹ osisi algumu, makẹni a marịnghọ m nị ndị nke i a maghọ gbu osisi ọhụnma-ọhụnma ebahụn. Ndị nke m lẹ ndị nke i jẹnkọ d'a rụngbama,

⁹ nị wẹ hụn ụzọ gbuhẹni m osisi bu ọda, makẹni ụlọ-nsọ hụ m sikọ d'a tụn k'e hirịrị ogbe, ma mma.

¹⁰ “Lee ihiẹn m k'a kụ ndị nke i hụn jẹnkọ d'e gbu osisi ndị hụ: ọka-witi wẹ gwe, ẹkpa kachanrịnnị, nnụ-uku ọgụn (20,000); ọka-bali, ẹkpa kachanrịnnị, nnụ-uku ọgụn (20,000); manya-vaịnị, drọm kanị, nnụ-uku ọgụn (20,000); ofigbọn-olivu drọm kanị, nnụ-uku ọgụn (20,000).”

¹¹ Hiram wụ eze Taya nọ de ẹkụkwọ-ozi, sị Solomọnụ, “Ihiẹn ndị nke Osolobuẹ sụọ a haịn o gi tumẹ i eze wẹ.”

¹² Hiram nọzị sị, “Ịja-mma ya rịnị Osolobuẹ wụ Chuku Izrẹlụ, hụn ke elu-igwee lẹ ụwa! O yegụọ Eze wụ Defidi nwa nwọn uche, hụn nwọn amamihiẹn lẹ nghọta, hụn k'a tụnnị Osolobuẹ ụlọ-nsọ, tụnrụn obi-eze.

¹³ “M zilan'ị Huram-Abi, hụn wụ ọkaa pụ-ichẹn;

¹⁴ nnẹ ẹ wụ onyẹ ebọn Danị ụnụ, nẹdi ẹ wụ onyẹ Taya ẹnyi. Ọ maka gi goru lẹ siliva lẹ igwe-bronzu lẹ igwe-mmaka lẹ ọmụma lẹ osisi rụn ihiẹn lẹzi kẹ wẹ dọn e gi oruru e nwun pọpụ lẹ hụn e nwun bru lẹ nke ododo lẹ linẹni riẹnni kpa ẹkwa. Ọ marịnzịghọ ẹnya ụdị ihiẹn ile w'e deye elu ihiẹn zeni, ọ marịnghọ k'o dọn deye ihiẹn ọwụlẹ ị gwa a. Ịya lẹ ndị omẹ-nka ị lẹ ndị omẹ-nka di-nwọnni m wụ Defidi nẹdi i k'a gba rụn.

¹⁵ “Zihẹni nwan ẹnyi wụ idibo i ọka-witi lẹ ọka-bali lẹ ofugbọn-olivu lẹ manya ndị hụ ịyụ wụ di-nwọnni m sị n'ị k'e zihẹ;

¹⁶ ẹnyi k'e gbu osisi ile i chọ imẹ Lẹbanọnụ, ẹnyi e kẹngbama wẹ, nu wẹ ye Ohimin, nyanhan obodo Jọpa. Y'a gha ebahụn bu wẹ shi Jerusalẹm.”

¹⁷ Solomọnụ nọ gụn abịamabịa ile rị Izrẹlụ wụ ikẹnnyẹ — ẹlẹkwọ ọgụngụn hụn nẹdi ẹ wụ Defidi gụn mbụ, a gba wẹ mmadụ nnụ-itenẹi kwasị nnụ-uku iri-kwasị-ọgụn-ẹsa (153,600).

¹⁸ O gi madụ nnụ-uku iri kwasị ọgụn-ẹtọ (70,000) imẹ wẹ họnrin ndị e bu ibu; mmadụ nnụ-uku ọgụn-ẹnọ (80,000) wụ ndị e bepụha ọmụma elu ugu; nnụ itenẹi (3,600) wụ ndị a kịnị wẹ, a hụn a nị wẹ hụ a rụn ọrụn wẹ.