Hosia 5 - Ika

Isi Nke Isẹn Osolobuẹ K'e Mẹshi Juda Ikẹn

¹ “Nụ nị ọnwan, ndị nchụn-ẹjan! Gọn ni ntịn, ndị Izrẹlụ! Gọn ni ntịn, ikpụlọ eze! Makẹni ikpe a magụọ ụnụ! Ụnụ wụ ọnyan wẹ gi a nwụn ndị nke m imẹ Mizpa; ọga wẹ gi a nwụn wẹ imẹ Tabọ;

² eje mgbugbu wẹ gutọnị wẹ ebẹhụ wẹ kụn Akashịa, kanị, m k'e ye ụnụ ile afụnfụn.

³ A marịngụọ m Ifrem; ẹghẹẹ, Izrẹlụ Ẹbamịn-ugu enwọn ihiẹn wẹ k'e zuemẹni m: ịgbaraja kẹ ụnụ ndị Ifrem wụ nwan; ndị Izrẹlụ a rụgụọ.

⁴ “Ihiẹn wẹ rị e mẹ anịzịnị wẹ kinhẹn ebe Osolobuẹ rị makẹni mmọn ịgbaraja rị imẹ wẹ lẹni amarịn wẹ Osolobuẹ.

⁵ Mpache Izrẹlụ hụ a shịagbu ẹ ẹri; ndị Izrẹlụ, ndị Ifrem, hụ a hanfie ụkụ yeni njọ; ndị Juda hụ e sọn wẹ a hanfie ụkụ.

⁶ Wẹ k'e gi atụnrụn lẹ efin chọ ihun Osolobuẹ, kanị o lekọ wẹ ẹnya ihun; o wepụgụọnị wẹ ẹka.

⁷ E gigụọ wẹ ẹkanaị sọn Osolobuẹ; a mụgụọ wẹ ụmụ ogbe! Ufiri ẹ, Mmẹmmẹ wẹ e mẹ Ifọn pụ sikọ nwan d'e bu wẹ lẹ ugbo wẹ ile ri.

Osolobuẹ K'e Mẹrịrị Alị Izrẹlụ Ihiẹn O Ku

⁸ “Gbu opi-agha imẹ obodo Gibia! Gbu opi-agha imẹ Rama! weshi olu elu hị imẹ obodo Bẹt-Avẹni! Buru ni ụzọ, ndị Bẹnjamini!

⁹ Ezioku kẹ m rị a gwa ebọn Izrẹlụ ile, Ifrem wụ Izrẹlụ Ẹbamịn-ugu k'a gba okpokoro ogẹn afụnfụn lalanị e gi bịa!

¹⁰ Osolobuẹ sị: Ndị ndu Juda nọ nwan kẹ ndị ohin, ndị e be alị ịhịan e cheni nke wẹ; m k'e gi okẹn iwe hu afụnfụn kpu wẹ rịkẹ okẹn mirin rị e huni.

¹¹ Wẹ rị a bịangbu Ifrem, e gi afụnfụn a zọkpụkpọ a, yeni mmọn ọ sị o k'e ferịrị.

¹² M rị e mẹ Ifrem ihiẹn ẹkịka e mẹ osisi; m rị e mẹ ndị Juda ihiẹn ụtụ e mẹ osisi!

¹³ Ndị Ifrem a hụn emu rị a kụ alị wẹ. Ndị Juda a hụngụọzị nị alị wẹ a rụgụọ ẹhụ. Ndị Ifrem e buru alị Asiria d'a rịọ eze-uku Asiria n'o d'e yeni wẹ ẹka! Kanị, ọ sakọ ẹka gwọ ụnụ ọrịa; ọ sakọ ẹka changbu ebe ụnụ rụ ẹhụ.

¹⁴ M k'e mẹ ndị Ifrem ihiẹn ẹwọrọ e mẹ anụ, e mẹ m ndị Juda ihiẹn okoro-ẹwọrọ e mẹ anụ: mmẹ lẹ enwẹn m k'a dọkịka wẹ; e buru m wẹ pụ, onwọnni onyẹ k'a sa ẹka zụọpụha wẹ.

¹⁵ A la m wẹ tọ, jẹnmẹ d'e ru mgbe wẹ kweri n'e mẹgụọ wẹ eje-ihiẹn, chọma ihun m. Eziẹ-eziẹ, wẹ tabe afụnfụn, e gi wẹ obi wẹ ile chọma m.”