Hibru 9 - Ika

Isi Nke Itenẹi Ofufe Mbụ Ahụn

¹ Nkwerigbama ibuzọ ahụn nwọnsọnmẹ iwu sọnn'ẹ lẹ Ọdụ-ofufe hụn rị elu-ụwanị.

² Mmughẹ ibuzọ rịn'a kẹ teburu lẹ obu-ukpẹ lẹ brẹdi nghọsị rị. W'a kpọ mmughẹni “Ebe rị nsọ.”

³ Wẹ ghafe ẹkwa mgbọnbepụ rị mmughẹni, a banye wẹ mmughẹ m'ẹ ẹbụọ, hụn w'a kpọ “Ebẹhụ Kachanrịn Nsọ.”

⁴ Ebeni kẹ ukpo goru wẹ gi a chụn ẹjan nsẹnsi rị. Ẹkpẹti-nkwerigbama wẹ gi goru nyan imẹ lẹ azụụn rịzị ebeni. Imẹ ẹ kẹ mkpu goru wẹ buche mana rị, ịya lẹ ọkpọ Ẹrọnụ ahụn gbọrịnị lẹ ibe ọmụma ẹbụọ hụ wẹ deye Iwu iri.

⁵ Chẹrobu ẹbụọ ahụn nwọn nku, hụn wẹ kpụ, hụn a ghọsị ebe Osolobuẹ rị, rịzị elu ẹkpẹtini, wẹ lẹ nku wẹ shịapụ elu ẹ — elu ẹ hụn wụ Oche-omikẹn. Kanị, ẹnyi a s'ẹka kuru ihiẹn ndịnị alị kikẹnni.

⁶ Ẹnịna kẹ wẹ e dọnmẹsọnmẹ ihiẹn ndịnị wẹ; ndị nchụn-ẹjan a banyesọnmẹ mmughẹ ibuzọ hụ ogẹn ile d'a rụn ọrụn ofufe;

⁷ kanị, onyẹ-isi nchụn-ẹjan sụọ a banye mmughẹ nke ẹbụọ, mgbe ohu ahụa. Ọ banyekọnị, o k'e girịrị ẹdeke o gi chụnye ẹjan njọ a lẹ njọ ndị Izrẹlụ kpachanpụlẹni ẹnya mẹ.

⁸ Mmọn-nsọ gi ihiẹn ndịnị a ghọsị nị omẹni echẹn kẹ wẹ rịkwọ e fe ofufe Ọdụ-ofufe ibuzọ hụ, ụzọ wẹ gha a banye ebahụn rị nsọ eke pụha.

⁹ Wẹ gi ihiẹnni a kọwa ogẹnni ẹnyi rị imẹ ẹ. Ọnwan rị a ghọsị nị oyiye w'e yesọnmẹ lẹ ẹjan ile w'a chụnyeni Osolobuẹ imẹ ofufe mbụ ahụn asanị ẹka mẹ obi ndị rị e fe ofufe ahụn rị ọchan.

¹⁰ Makẹni oyiye lẹ ẹjan ndịnị wụhụ oku ihiẹn-oriri lẹ ihiẹn-ọrịra lẹ nchanchan rị ichẹn-ichẹn wẹ gi e dọn nsọ, omẹnalị ẹnya e legha wẹ buche wẹ olu d'e ru ogẹn ihiẹn rịchanrịn mma e gi pụha.

Ofufe Ọhụn

¹¹ Kanị, Kraịstị a bịagụọ nwan d'a wụ onyẹ-isi nchụn-ẹjan ihiẹn ndị ahụn rị mma — makẹni o wẹhẹgụọ wẹ nwan. Ọ banyegụọ Ọdụ-ofufe kanị, zu oke, wẹ gilẹni ẹka mẹmẹ, Ọdụ-ofufe wẹ gilẹni ihiẹn wẹ ke eke rụn.

¹² O gini ẹdeke ewu lẹ nwa okẹn-efin banye, kama, ẹdeke ya lẹ enwẹn ẹ; ọ banye mgbe ohu banyechanrịn, gi ẹ wẹhẹ nzụọpụha itẹbitẹ.

¹³ Makẹni, omẹni ifekpuhụ ẹdeke ewu lẹ okẹn-efin lẹ ntụn nwa-efin wẹ dụn ọkụn kẹ onyẹ gi njọ rụ gi a wụbehi onyẹ rụnị,

¹⁴ ya wụ nị ẹdeke Kraịstị, onyẹ hụn gi enwẹn ẹ chụnyeni Osolobuẹ ẹjan nwọnlẹni ntụpọ ghahanị Mmọn itẹbitẹ, jẹnkọ d'a sa ẹka chanchan obi ẹnyi, chan a ezigbo ọchịchan, chanchanpụ ihiẹn ile ghalẹni e ye ndụn hụn ẹnyi mẹ, ẹnyi a hụn ụzọ fe Osolobuẹ rị ndụn.

¹⁵ Ya wụ nị Jizọsị wụ onyẹ e wegbamanị imẹ nkwerigbama ọhụn, hụn ndị wẹ kpọ oku e gi nwọnhẹn nkwa itẹbitẹ Osolobuẹ kwe, ebe o mẹni o nwọngụọ onyẹ nwụnhụnnị wẹ gi ndụn a gbapụha wẹ amamgbe njọ wẹ mẹ okpuru nkwerigbama ibuzọ e ri isi wẹ.

¹⁶ Makẹni, ịhịan kugụ kẹ wẹ k'e mẹ ukuu ẹ, wẹ sikọ d'a ghọsịgụ nị hụnyẹ a nwụnhụngụọ wẹ kebe mẹmẹ ihiẹn hụn o ku.

¹⁷ Ịhịan nwụnhụngụ sụọ kẹ ukuu ẹ o ke nọ e nwọn ire. Egikọ w'a rụn ọrụn ebe hụnyẹ rị ndụn.

¹⁸ Ya haịnzị nkwerigbama mbụ hụ gilẹni bidọn bụ ẹdeke arịa.

¹⁹ Makẹni, ogẹn Mozizi gi gwachanrịngụ ndị hụ ihiẹn ile Iwu hụ sị wẹ e mẹ, ọ nọ weri ẹdeke nwa-efin lẹ ewu wẹ gbu lẹ mirin, gi ẹṅẹnrẹn anụ e nwun ufie-ufie lẹ ukun ẹfịfịa w'a kpọ ẹrurushin-hisopu deri ẹdeke lẹ mirin hụ, fekpusọnmẹ kẹ Ẹkụkwọ-Iwu hụ lẹ enwẹn ẹ kẹ ndị Izrẹlụ ile —

²⁰ a sị wẹ, “Hụnnị wụ ẹdeke wẹ rị e gi e tumẹ nkwerigbama Osolobuẹ tumẹni ụnụ.”

²¹ Ẹrịra kẹ Mozizi fekpusọnmẹzi Ọdụ-ofufe hụ lẹ ihiẹn ile wẹ gi e fe ofufe.

²² Okpuru Iwu Mozizi, o d'a wụrụ nị ẹdeke kẹ wẹ gi e dọn ihiẹn ile nsọ: omẹni ẹdeke arịa, mgbagharị njọ arịkọ.

Ẹjan Kraịstị E Wepụ Njọ

²³ Onyinyọn mmakalaka rị a ghọsị ezigbo ẹ rị elu-igwee kẹ wẹ gi omẹnalị ndị ahụn ile e dọn nsọ. Ya wụ nị ẹjan ka ndị hụ mma kẹ ezigbo ẹ rị elu-igwee chọ.

²⁴ Makẹni, ẹlẹ ebe rị nsọ wẹ gi ẹka rụn hụn wụhụ onyinyọn nke ezigbo ẹ kẹ Kraịstị banye; elu-igwee lẹ enwẹn ẹ k'ọ banye, weri ọnọdị ebe Osolobuẹ rị makẹ ọrịrịmma ẹnyi.

²⁵ Ẹlẹkwọ hụn o k'e gi gi enwẹn ẹ chụnsọnmẹ ẹjan, a chụn a chụndọnzi kẹ onyẹ-isi nchụn-ẹjan rị elu-ụwa dọn e mẹ, e gi ẹdeke wụlẹni nke ẹ a banye Ebẹhụ Kachanrịn Nsọ ahụa-ahụa.

²⁶ Omẹni nke Jizọsị te rị ẹrịra, nkẹ ọ hụ a nwụn a nwụndọnzi kete wẹ kelẹ ụwa! Kama, ọ bịalẹ mgbe ohuni sụọ imẹ ọgụgụ-ogẹnni d'e wepụchanrịn njọ ghahanị igi enwẹn ẹ chụn ẹjan.

²⁷ K'o dọn wụrụ nị ịhịan a nwụnhụn mgbe ohu, o mẹgụ, okinkin-ikpe e sọn ẹ,

²⁸ ẹrịra k'o dọnzikwọ mẹ ni hụnnị Osolobuẹ gigụ Kraịstị chụn ẹjan mgbe ohu sụọ chụnchanrịn a, gi ẹ bupụ njọ ịhịan, ẹlẹ oku njọ kẹ Kraịstị k'a bịazịnị, kama, ọ lala d'a zụọpụha ndị rị e lee ẹnya a ọda-ọda.