Hibru 6 - Ika

Isi Nke Isin Nị Ẹnyi Jẹnshi Ni Ihun

¹ Nị ẹnyi jẹnshi ni nwan ihun, la nkuzi ibuzọ ndịnị rị ofufe Kraịstị tọ, wụrụ ndị ka ẹhụ imẹ Kraịstị. Ẹlẹ hụn ẹnyi e gi gbemẹzi iyetọ, kuzimẹzi irogharịnị latọ ihiẹn ndị ahụn ghalẹni e ye ndụn, lẹ ikwerini Osolobuẹ

² lẹ ụdị mirin-Chuku rị ichẹn-ichẹn w'e mẹ lẹ ibu ẹka kwasị ịhịan lẹ ịgha ọnwụn lihi lẹ okinkin-ikpe itẹbitẹ.

³ Ẹghẹẹ, ẹnyi sikọ nwan d'e jẹnshi ihun, omẹni Osolobuẹ e kwerighọ.

⁴ Makẹni, oghere w'e gi wekinhẹn ịhịan d'e rogharịzị arịa, omẹni Osolobuẹ e te shịapụgụọ a ẹnya, ọ danmịngụ oyiye elu-igwee, Mmọn-nsọ e rugụ a ẹka;

⁵ omẹni ọ danmịngụọ oku Osolobuẹ, hụn a n'ọ rịka mma, omẹni ọ hụngụọ ikẹn elu hụ lalanị —

⁶ lazị Osolobuẹ tọ! Ewekinkọzị wẹ wẹ, makẹni wẹ rị a kpọgbuzi Nwa Osolobuẹ elu obe, e gbe ifẹnrẹn e ye ẹ ihun ogbe, e gi ẹ e mẹ enwẹn wẹ.

⁷ Alị hụn a ra mirin rị e zueyen'ẹ, e gi ẹ e mẹ ihiẹn wẹ kụnye ẹ a pụha, a bannị ndị kụnn'a erere, ngọzi k'ọ narịn ẹka Osolobuẹ.

⁸ Kanị, o pumẹ ogun-lẹ-ọkịnkan, ọ bannị erere ọwụlẹ, Osolobuẹ e d'a bụ a ọnụ; ọkụn kẹ wẹ k'a dụn a.

⁹ Kanị, ndị m bu obi, ọsụọn'a nị ẹnyi rị e ku ẹnịna, obi ru ẹnyi alị nị nke ụnụ jẹnkọ d'a ka mma; nị nke ụnụ k'a wụ nzụọpụha lẹ ihiẹn ya lẹ nzụọpụha wị.

¹⁰ Makẹni, Osolobuẹ ara mẹgbu ịhịan; ọ zọkọ ọrụn ụnụ lẹ ihiẹn-ọsụsụọ ụnụ ghọsị a ebe ụnụ nọ gi ufiri ẹfan a yeni ndị nke ẹ ẹka, hụn ụnụ rịkwọ nwan e mẹ.

¹¹ Kanị, ẹnyi a chọkẹnmẹkẹ nị onyẹ-onyẹ imẹ ụnụ gi adụdụ ohu hụ kwọnkẹnmẹ olilẹnya ụnụ d'e ru njẹndemẹ;

¹² amamgbe ụnụ a lama nzụnzụn; kama, nị ụnụ e sọn nzọmụkụ ndị gi okukwe lẹ ndidin nwọnhẹn ihiẹn Osolobuẹ kwe nkwa a.

Osolobuẹ K'e Mẹzurịrị Nkwa O Kwe

¹³ Ogẹn Osolobuẹ gi kwe Ebraham nkwa, Osolobuẹ nọ kun enwẹn ẹ — makẹni onwọnni onyẹ ka Osolobuẹ hụn Osolobuẹ k'e kun ẹfan a: ọ sị,

¹⁴ “M jẹnkọ d'a gọzirịrị ị, mẹ i mụba.”

¹⁵ Ebraham nọ din ndidin cheri; o mẹgụ, ọ nọ nwọnhẹn ihiẹn hụ Osolobuẹ kwe ẹ nkwa a.

¹⁶ Ihiẹn ka ịhịan kẹ ịhịan e kun; ịhịan kunhụ ihiẹn wẹ e kun, oku e bi.

¹⁷ Ẹrịra k'ọ rịzị, ogẹn Osolobuẹ gi chọ n'ọ ghọsị ndị o kwe nkwa n'o kuhutọkọ ọnụ, ọ nọ kun enwẹn ẹ:

¹⁸ kẹni obi ruchanrịn ẹnyi ndị gbaburun'ẹ alị kwọnkẹnmẹ olilẹnya o ye ẹnyi, makẹni Osolobuẹ e gigụọ ihiẹn ẹbụbụọ ahụn ghalẹni e gbehutọ ghọsịchanrịn nị ẹlẹ ntụ kẹ ọ rị a tụ.

¹⁹ Olilẹnyanị wụ agbụn zeni furu wẹ gi e dọn ẹnya hụn wẹ gi limẹ umẹ-ndụn ẹnyi. Olilẹnyanị e we ẹnyi a ghafe Ẹkwa-mgbọnbepụ hụ, e weban ẹnyi imẹ-imẹ ebẹhụ Osolobuẹ rị,

²⁰ ebẹhụ Jesu burugụnị ẹnyi ụzọ banye makẹ ọrịrịmma ẹnyi, makẹni ọ wụrụgụọ onyẹ-isi nchụn-ẹjan jẹnrin ejẹn, ụdị nke Mẹkizẹdẹkị.