Hibru 4 - Ika

Isi Nke Ẹnọ Ezumikẹn Osolobuẹ Kwademẹni Ndị Nke Ẹ

¹ Nị ẹnyi gikwọ nị nwan egun e bi, hụnnị nkwa ezumikẹn o kwe kelẹni gharị, makẹ ọ gha a nahịn onyẹ ọwụlẹ imẹ ụnụ.

² Makẹni, oziọma wẹ nụ kẹ ẹnyi nwẹn nụ, kanị ozi wẹ nụ abannịnị wẹ erere, makẹni wẹ nwẹn egini okukwe nabanhan a.

³ Ẹnyi hụn kwerini k'a banye d'e zu ikẹn hụ nọkẹ kẹ Osolobuẹ dọn ku imẹ Ẹkụkwọ-nsọ, sị, “Nọkẹ kẹ m dọn gi iwe kun enwẹn m, sị, ‘Abanyekọ wẹ d'e zu ikẹn ahụn m kwe nkwa a!’ ” Osolobuẹ kuzi oku ezumikẹnni, ọsụọn'a n'ọ rụnchanrịngụọ ọrụn a kete o kelẹ ụwa.

⁴ O nwọnghọ ebe ọ nọ ku oku ụhụọhịn nke ẹsanị imẹ Ẹkụkwọ-nsọ, sị, “Hụn mẹ ẹ akpọhịn ẹsa, Osolobuẹ nọ zu ikẹn ọrụn ile ọ rụn.”

⁵ Ya ọ nọzị nwan ku hụnnị ẹnyi rị e leban ẹnya ebeni, sị, “Abanyekọ wẹ d'e zu ikẹn ahụn m kwe nkwa a.”

⁶ Ebe o mẹ ni oghere ịhịan e gi banye d'e zu ikẹn hụ hụzị a, bụ ndị hụ bu ụzọ nụ oziọma abanyeni makẹni wẹ nupụ isi,

⁷ Osolobuẹ nọ kayezi ụhụọhịn ọzọ, kpọ a “tannị.” O biegụ ọhụnma-ọhụnma, ọ nọ ku ẹ imẹ Ẹkụkwọ-nsọ ghahanị Defidi — ebẹhụ ẹnyi rụtụ ẹka n'ọ sị, “Ụnụ nụ olu ẹ tannị, akpọkinkwọlẹ ni obi ụnụ.”

⁸ Omẹni Joshụa e te dubangụọ wẹ d'e zu ikẹn ahụn, Osolobuẹ eke kumẹzi oku ụhụọhịn ọzọ.

⁹ Ya wụ nwan nị ezumikẹn ọrụn hụkwọ e che ndị nke Osolobuẹ,

¹⁰ makẹni, onyẹ banye d'e sọn Osolobuẹ zu ikẹn, o zu ikẹn ọrụn a, nọkẹ kẹ Osolobuẹ dọn zu ikẹn ọrụn a.

¹¹ Nị ẹnyi lịlịma nị nwan, kẹni ẹnyi banye d'e zu ikẹn hụ, amamgbe ọ gha e nwọn onyẹ danpụnị yeni inupụ-isi kẹ ndị mbụ dọn nupụ isi.

¹² Makẹni, Oku Osolobuẹ rị ndụn; ọ rụn ọrụn; ọ tụ nkọ, tụkarị ọpịa-agha ọnụnaị ọwụlẹ: o zubanchanrịn imẹ, d'e ru umẹ-ndụn lẹ mmọn, d'e rudẹ okẹn-ẹhụ lẹ ụmị ọkpụkpụ, o rudẹ obi ịhịan d'e lele iroro ẹ lẹ ihiẹn o bu obi.

¹³ Ẹnya Osolobuẹ, onwọnni ihiẹn zuerini. Ẹghẹẹ, ihiẹn ile gba ọtọ, rị oghe, ẹnya onyẹ hụ ẹnyi jẹnkọ d'e ye mgbakọ.

Jizọsị: Okẹn Onyẹ-isi Nchụn-ẹjan Ẹnyi

¹⁴ Ebe o mẹ ni ẹnyi e nwọnghọ okẹn onyẹ-isi nchụn-ẹjan wụ Jizọsị Nwa Osolobuẹ, hụn ghafegụ elu-igwere, banye ebe Osolobuẹ rị, nị ẹnyi kwọnkẹnmẹ nwan ihiẹn ẹnyi kweri.

¹⁵ Makẹni onyẹ-isi nchụn-ẹjan ẹnyi ẹlẹ hụn marịnlẹni nị ndụn arị ẹnyi, kanị hụn wẹ nwangụ ụzọ ile nọkẹ ẹnyi kanị o gin'ẹ mẹ njọ.

¹⁶ Nị ẹnyi wepụ nwan egun, bịa ukpo ẹfọma Osolobuẹ, kẹni ẹnyi nwọnhẹn omikẹn, nwọnhẹnzikwọ ẹfọma k'e yeni ẹnyi ẹka ogẹn o k'a rị ẹnyi mkpa.