Hibru 3 - Ika

Isi Nke Ẹtọ Jizọsị Ka Mozizi

¹ Umunẹ m ndị rị nsọ, ndị wẹ kpọzị oku elu-igwee, e roni Jizọsị, onyẹ ozi pụ-ichẹn Osolobuẹ gi wẹhẹ okukweni ẹnyi rị imẹ ẹ, hụn wụzịkwọ onyẹ-isi nchụn-ẹjan ẹnyi.

² Ọ ghọsịgụọ nị o furu onyẹ wẹ gi e dọn ẹnya ebe Osolobuẹ hụn tumẹn'ẹ rị, nọkẹ kẹ Mozizi dọn furu onyẹ wẹ gi e dọn ẹnya imẹ ọrụn ile rị ezi-lẹ-ụlọ Osolobuẹ.

³ Kanị, Jesu ka Mozizi ọghọ e nwọn kẹ onyẹ tụn ụlọ dọn ka ụlọ ọghọ e nwọn.

⁴ Makẹni, ọsụọn'a nị ụlọ ọwụlẹ nwọn onyẹ rụnn'a, Osolobuẹ ya rụn ihiẹn ile.

⁵ Mozizi a rụnghọ ọrụn a ọhụnma imẹ ụlọ Osolobuẹ ile; kanị ọ rụnhụ kẹ odibo wẹ zi d'a ghọsị ihiẹn Osolobuẹ jẹnkọ d'e ku ihun.

⁶ Kanị Kraịstị rụn ọrụn ọhụnma nọkẹ Nwa hụn ụlọ Osolobuẹ rị ẹka. Ụlọ Osolobuẹ hụ kẹ ẹnyi wụ, o mẹkwọ nị ẹnyi a tọ e kushi ikẹn, e nwọn olilẹnyanị, e nwọnshi ẹ ikẹn.

Y'e Kwerini, Ya wụ nị Y'e Nupụgụọ Isi

⁷ Ya wụ, nọkẹ kẹ Mmọn-nsọ dọn ku, “Ụnụ nụ olu Osolobuẹ tannị,

⁸ a kpọkinkwọlẹ ni obi kẹ ndị nẹdi ụnụ dọn mẹ, ogẹn ahụn wẹ gi nupụ isi; kẹ wẹ dọn mẹ ụhụọhịn hụ wẹ chọ ihiẹn rị m ọnụ imẹ atụ.

⁹ Ndị nẹdi ụnụ nọ nọ ebẹhụ nwan m, chọ ihiẹn rị m ọnụ, m nọ ghọsị wẹ ikẹn m ọrọgbọ ahụa ọgụnnaị.

¹⁰ Ya haịn iwe agbọ hụ gi we m, m nọ sị, ‘Ogẹn ile kẹ obi wẹ gi a kpahu, w'e ke marịnkwọ kẹ m'e mẹ.’

¹¹ M nọ gi iwe kun enwẹn m, sị, ‘Abanyekọ wẹ d'e zu ikẹn ahụn m kwe nkwa a!’ ”

¹² Umunẹ m, kpachanpụkwọ nị nwan ẹnya makẹ ọ gha enwọn onyẹ rị imẹ igunrun hụn nwọn eje-obi, obi ghalẹni e kweri, hụn k'e mẹ ịhịan latọ Chuku rị ndụn.

¹³ Kama, e gi ni oku-Chuku a kasị ibe ụnụ obi ụhụọhịn-ụhụọhịn, hụnnị “tannị” ahụn wẹ ku oku ẹ imẹ Ẹkụkwọ-nsọ kelẹni ghafe, amamgbe ọ gha e nwọn onyẹ njọ dufie, mẹ ẹ kpọkin obi.

¹⁴ Makẹni ẹnyi lẹ Kraịstị k'a rịsọnmẹ omẹni ẹnyi e kwọnkẹnmẹ ẹka ahụn ẹnyi gi bidọn d'e ru njẹndemẹ.

¹⁵ Nọkẹ kẹ wẹ dọn ku ẹ imẹ Ẹkụkwọ-nsọ: “Ụnụ nụ olu Osolobuẹ tannị, a kpọkinkwọlẹ ni obi ụnụ, kẹ wẹ dọn mẹ ụhụọhịn hụ wẹ nupụ isi.”

¹⁶ Elee ndị nụdẹ nwan olu ẹ nupụ isi? Ẹlẹ ndị hụ ile Mozizi dupụha imẹ alị Ijiptu?

¹⁷ Elee ndị kẹ ize wẹ ze Osolobuẹ ọrọgbọ ahụa ọgụnnaị? Ẹlẹ ndị ahụn mẹ njọ? Ẹlẹ wẹ nwụntọsọnmẹ imẹ atụ?

¹⁸ Elee ndị k'o kunni enwẹn ẹ nị abanyekọ wẹ d'e zu ikẹn ahụn ọ kwademẹ? Ẹlẹ ndị hụ nupụ isi?

¹⁹ Ẹnyi a hụngụọ a nwan nị abanyeni wẹ makẹni ekwerini wẹ.